Кёп болмай Битеуроссей халкъ фронтну (ОНФ) Къабарты-Малкъарда бёлюмюню келечилери «Биз биргебиз» деген жандауурлукъ акцияны чеклеринде Нальчикде уллайгъанла бла сакъатла тургъан интернат юйде болгъандыла. Ала биргелерине кёп тюрлю саугъала да келтиргендиле – жылы кийимле, чындайла, кёгетле, китапла эм башхала.
ОНФ-ни келечилерине жылы кийимлени жыяргъа жамауат тири болушханды. Жандауурлукъ ишге къатышханла бир ненча кюнню ичинде абериле келтиргендиле, волонтёрла уа, аланы айырып, тап жарашдыргъандыла. Бу ахшы башламчылыкъдан Май районну Октябрьское элинден фермер Сергей Бондарук бир жанында къалмагъанды. Ол быйылгъы тирлигинден иги кесек алма келтиргенди. Аны оюмуна кёре, абаданлагъа бла саусузлагъа эс тапдырырча жемишлени иги кесек витаминлери барды. Сууукъла келгенде уа ол бютюн кереклиди.
Интернатда жашагъанла жылы чындайлагъа, курткалагъа, кофталагъа эмда башха затлагъа да болмагъанча къууннгандыла. Художестволу китапла бла библиотекаларыны фонду байыкъланнганы бла уа аланы эрттегили муратлары толгъанды. Эсге сала айтсакъ, алгъаракълада жамауатчыла интернатда къонакъда болгъанларында мында жашагъанла китап окъургъа бек сюйгенлерин, жарсыугъа литература уа алай кёп болмагъанын билдирген эдиле. Болсада энди мындан арысында башхала да себеплик этип, болум иги жанына тюрлене барыр деп ийннырчады.
Магометланы Сулейман.