«ХъумапIэ бынкым» и Къэбэрдей-Балъкъэр къудамэр илъэси 180-рэ зэрырикъур Налшык Iэтауэ щагъэлъэпIащ.

Абы къыщызэрагъэпэща лъэпкъ пщIантIэхэм фащэхэр, пасэрей хьэпшыпхэр, IэпщIэлъапщIэхэм я IэрыкIхэр, тхылъ, шхынхэкI зэмылIэужьыгъуэхэр щыплъагъунут. А Iуэхухэм хэтащ ТуризмэмкIэ Федеральнэ агенствэм и унафэщI Догузовэ Заринэ, КъБР-м и Правительствэм, Налшык къалэ Администрацэм я лIыкIуэхэр.

«ХъумапIэ бынкым» и Къэбэрдей-Балъкъэр къудамэм и унафэщI Бейтыгъуэн Залинэ жиIащ мы IуэхухэмкIэ ди щIыналъэм и беягъэр, абы и тхыдэр, и щэнхабзэ дахэр ди республикэм щыпсэухэм иджыри зэ ягу къагъэкIыжын мурад зэраIэр.

- Хуабжьу дыщогугъ мыбы кърихьэлIахэр, музейм кIуа хуэдэ, лъэпкъхэм я щэнхабзэм, гъуазджэм, тхыдэм нэхъ гъунэгъу хуэхъуауэ. Ди гуапэщ ди мурадхэр хьэрычэт цIыкIу зыщIэхэм къызэрыддаIыгъар, - жиIащ абы.

КъБР-м щэнхабзэмкIэ и министр Къумахуэ Мухьэдин «ХъумапIэ бынкым» куэдым ящхьэпэн дауэдапщэхэр къызэрызригъэпэщыр жиIащ.

-Сэ егъэлеяуэ си гуапэ мэхъу, щэнхабзэм Iуэху хузимыIэхэм щэнхабзэ Iуэху щызэрахуэкIэ, къызэрагъэпэщыр куэдым ягу зэрырихьыным щыхущIэкъукIэ. Мы зэIущIэр абы и щыхьэтщ, - жиIащ министрым.

Абы кърихьэлIа дэтхэнэми лъэпкъ шхыныгъуэхэм хэIэбэну, зэрагъэпщэну Iэмал яIащ. Сабийхэм папщIэ къызэрагъэпэщат нэгузыужь программэ гъэщIэгъуэн.

 Къэбэрдей-Балъкъэрым и артист пажэхэу Текуев Амур, ЦокIыл Азэмэт, Бэч Азэмэт, Саралъп Марьянэ, Куэшей Темыркъан сымэ хэту абы щата концертыр гуIэфIтещIэж ящыхъуат къызэхуэсахэм.

ТЭРЧОКЪУЭ Дисэ