18 сентября, 2021 - 05:54
Быйыл 3 сентябрьден Нальчикден самолёт бла тюзюнлей Стамбулгъа учаргъа онг барды. Авиарейсни «Nordwind» компания бардырады. Тюркге Boeing 737-800 самолётда баш, орта эм байрым кюнледе учаргъа боллукъду. Аны юсюнден бизге КъМР-ни Транспорт эм жол мюлк министерствосундан билдиргендиле.
Стамбул Тюркню эм уллу шахарыды, ол къыралны экономика, турист арасыды. Анда эки аэропорт барды: «Стамбул» халкъла аралы эмда Сабих Гёкчен атлы. Аладан адамланы жюрютген пассажир транспорт иги айныгъаныны хайырындан рейслени бирге келишдирирге тынч болады.
Стамбулдан Нальчикге самолётла баш кюн 9 сагъат 45 минутда, орта кюн 22 сагъат 45 минутда учадыла. Нальчикден рейс баш кюн 13 сагъатда, байрым кюн а 2 сагъатда болады. Жолгъа 2 сагъат бла 15 минут къоратылады.
«Nordwind» авикомпанияны тарихлерине кёре, билетни багъасы 3900 сомду. Алай толу билдириуню компанияны сайтында алыргъа боллукъду: www.nordwindairlines.ru. Нальчикни аэропортуну сайтында «Рейслени тизмеси» бёлюмде да басмаланыпдыла тийишли шартла: http://nalchik-airport.ru/.
Тикаланы Фатима
хазырлагъанды.