Озгъан бараз кюн республикада «Шуёхлукъну гюл къысымы» деген ат бла миллет культура араланы фестивалы башланнганды. Ол Къабарты-Малкъар Республиканы Къыраллыгъыны кюнюне эмда «Маданият шабат кюн» деген битеуроссей акциягъа жораланады.
Республикада Владимир Вороков атлы маданият фодну председатели Люаза Макоева, байрамны ача, Нальчикде фонд жыйырма беш жылдан артыкъ заманны ишлегенин айтып, ары ол кюн онтогъуз миллет культура араны эмда жамауат организацияны келечилери жыйылгъанларын чертгенди. Аланы хар бири да ата журтларындан узакъда болгъанлыкъгъа, ата-бабаларындан къала келген ахшы тёрелени, адетлени, тилни, культураны, тепсеулени, музыканы, жырланы унутмагъанларын, ол угъай да, маданият арада бардырылгъан тюбешиуледе ала бла башхаланы да шагъырейлендиргенлерин айтханды. Андан сора къазакъланы «Шаудан» халкъ хору Россейни юсюнден жырны эшитдиргенди.
- Россей мени Ата журтумду деп РФ-ни жеринде жашагъан къайсы миллетни, динни келечиси да эркин айтыргъа боллукъду. Биз, Къабарты-Малкъарда жашагъанла, Шимал Кавказны жети республикаларындан бирибиз. Мында 900 минг адам жашайды. Республикабыз Россей Федерацияда бек кёп миллетлени келечилери бирге шуёхлукъда, къарындашлыкъда жашагъан жерден бириди. Минги тау да биздеди, - дегенди «Шауданны» художестволу башчысы Ольга Предиус да.
Сёзсюз, республикабыз саулукъ сакълау жаны бла белгили болуп къалмай, халкъла аралы туризм, альпинизм эмда спортну тау-лыжа тюрлюсю бла да атын айтдыргъанды. Мында 100-ден артыкъ миллетни келечиси жашайды. Миллет культураларыбыз а кёп тюрлю эмда сейирликдиле, жырларыбыз бла тепсеулерибиз а жюреклени къозгъамай къоймайдыла.
Миллет культура араланы ишлери – ол жамауат ишди, анга башчылыкъны миллетин, халкъын сюйген адамла этедиле. Аллайладан бири абхазлыланы «Абхазия» миллет араларыны таматасы Инга Гучапшевады. Ол кюн дагъыда Маданият фондда прохладначыланы «Росичи», дагъыстанчыланы «Дагестан», эстонлуланы «Кодумаа», чюйютлюлени «Товуши», белорусланы «Сябры», украинлыланы «Днипро» миллет культура араларыны келечилери тауча, къабартыча да жырлагъандыла. Къабарты-Малкъарда «Жангы бет» миллетле аралы культура араны башчысы Татьяна Соломонова да 33-чю номерли мектепден 5-чи классланы окъуучуларын келтиргенди, ала да жыйылгъанланы кёллерин кётюргендиле.
Таукенланы Галинаны башчылыгъында СГКИИ-ни студентлери дюгер тилде жырла айтхандыла.
Фондда кёрмючле да къуралгъандыла. Жюрини къаууму уа хар затха жютю кёз бла къарап, багъаны алай бергенди. Былайда дагъыда чертип айтыргъа тийишлиди: битеу культура арала миллетлерин кёп жаны бла тынгылы кёргюзтгендиле, хорлагъан а шуёхлукъ этгенди. Жырлагъанлагъа, тепсегенлеге, назму айтханлагъа да саугъала берилгендиле.
Ахырында уа 33-чю мектепни окъуучулары, устазлары да алада къуралгъанкёрмючге къараргъа чакъыргъандыла. Фестивальны гала-концерти уа 23 ноябрьде боллукъду.
Холаланы Марзият.
Суратны автор алгъанды
