Онбиринчи сентябрьде «Маданият шабат кюн» битеуроссей акцияны чеклеринде Нальчикде тюрлю-тюрлю къууанч жыйылыула ётерикдиле. 
Гитче Кизиловкада «Сосрукъ» комплексни къатында 11:00 сагъатда «Кюзню бояулары» кёрмюч-ярмарка. Анда къол  усталаны  чыгъармаларын эм миллет чыгъармачылыкъ ишлени  кёрюрге, сатып  алыргъа онг боллукъду.
Къабартыны Россейге кеси ыразылыгъы бла къошулгъаныны 400-жыллыгъыны майданында уа Къырал музыка театрны артистлери бардырып «Кюз артыны симфониясы» концерт къураллыкъды. 
КъМР-ни Миллет музейинде уа «Кюз арты-2021» атлы  кёрмюч ачыллыкъды.  Анда  республиканы белгили художниклерини  сурат, графика, скульптура  чыгъармалары бла шагъырейленирге жарарыкъды. Поэзияны сюйгенле уа социал сетьледе  Россейни миллетлерини  ёз тиллеринде назмула айтыу акциягъа къатышыргъа боллукъдула. 
Акцияны программасыны юсюнден толуракъ КъМР-ни Маданият министерствону сайтында https://mk.kbr.ru/info/afisha/  «Информация. Афиша» бёлюмюнде билдириледи.  Байрам жыйылыулада  эпидемиология мардалагъа  аслам эс буруллугъу да жамауатны эсине салынады.   

Магометланы Сулейман.