Къабарты-Малкъарда орналгъан Россельхозбанкны бёлюмюню таматасы Алим Сокуров билдиргеннге кёре, «Кесибизде этилген аш-азыкъла» деген белгини хайырындан, фермерлеге чыгъаргъан продуктланы алыучулагъа тапдырыргъа эмда башда сагъынылгъан майданда сатыучу жер ачаргъа онг береди. Аны хайырындан, ала заказланы да ортагъа адам къошулмай алыргъа боллукъдула. Эл мюлкде уруннганла чыгъаргъан товарланы битеу къыралгъа белгили этерге, аланы сагъынылгъан майданда сатаргъа, ол жер-жерли предпринимательлеге аламат онгду.
Белгилисича, хар фермер да кесини мюлкюн айнытыргъа, чыгъаргъан продукциясын кёбейтирге, татымлы продуктлары алыучулагъа терк жетерлерин сюеди. Производствону къурагъандан сора да, аны жюрютюрге керекди, ишинги къыйматлы болурча этиу да, уллу магъананы тутады. Сёз ючюн, бир-бир фермерлени заманлары да болмайды, чыгъаргъан продукциясын кёргюзтюрге, сайтны къураргъа, аны бла чекленип къалмай, ишин да тийишлисича бардыргъа, адамла товарланы табып заказ этерча. Аллай жумушланы тамамларгъа да иги кесек заман, ырысхы да къоратылады. Башда сагъынылгъан «Кесибизде этилген аш-азыкъла» деген белгини хайырындан, эл мюлкде уруннганла чыгъаргъан продукцияларын хакъсыз, битеу къыралгъа белгили сайтда орнатыргъа эм сатыу-алыу ишлерин хайырлы бардырыгъа боллукъдула, деп билдиредиле Россельхозбанкны Къабарты-Малкъарда бёлюмюню пресс-службасындан.
