КъБР-м и Парламентым и гъатхэ лэжьэгъуэр къызэрызэIуаха зэIущIэм депутатхэр щытепсэлъыхьащ цIыхухэм къагъэсэбэпа газым и уасэр кассэ терминалымкIэ зытахэм къратыжын хуейуэ Iуэху къызэрыкъуэкIам.
ЗэIущIэр къыщызэIуихым, КъБР-м и Парламентым и УнафэщI Егоровэ Татьянэ жиIащ республикэм и къэрал къулыкъущIапIэ псоми лэжьыгъэшхуэ зэфIагъэкIын хуейуэ къазэрыпэщы-лъыр.
- КъБР-м и Парламентыр зэлэжь хабзэхэр едгъэфIэкIуэн папщIэ, къэрал IуэхущIапIэ псоми дадэлэжьэн хуейщ. КъищынэмыщIауэ, сфIэкъабылщ республикэм и щIыналъэхэм щедгъэкIуэкI зэIущIэхэм пытщэну, сыту жыпIэмэ, щIыпIэхэр зыIууэ гугъуехьхэмрэ абыхэм я хэкIыпIэхэмрэ къэгъэнэIуэныр куэдкIэ абыхэм нэхъ тынш ящI, - жиIащ Егоровэм. - Мыхьэнэшхуэ зиIэхэм ящыщщ лъэпкъ проектхэр гъэзэщIэнри. Абы къыхэкIыу а Iуэхухэм хухах мылъкур къызэрагъэсэбэпым ди нэIэ тедгъэтыпхъэщ. ЦIыхухэм дадэлэжьэныр, ахэр зыпэщIэт гугъуехьхэр зэрытхузэфIэкIкIэ ящыдгъэпсынщIэныр ди къалэн нэхъыщхьэщ.
Егоровэ Татьянэ къытеувыIащ мы зэманым гугъуехь нэхъыщхьэу щыIэхэм ящыщ зым - къагъэсэбэпа газым и уасэр терминалхэмкIэ зытахэм я ахъшэр зэрыпхымыкIам.
«Газпром межрегионгаз Налшык» ООО-м и унафэщI Цыплухин Александр зэрыжиIамкIэ, мы зэманым уасэхэр зэратар къэзымыгъэлъэгъуауэ щыIэр «Интегра Софт» IуэхущIапIэм и къудамэрщ. НэгъуэщI системэхэр къэзыгъэсэбэпа-хэм я ахъшэр псоми я счётым кIуащ.
- Гу лъывэзгъэтэну сыхуейт, 2018 гъэм и дыгъэгъазэм «Интегра Софт» IуэхущIапIэм и агенткIэ уасэ зытахэм я ахъшэр 2019 гъэм и щIышылэм кърахьэкIыну квитанцэхэм къыщыгъэлъэгъуауэ зэрыщымытынур, ауэ ар абонентхэм зэран яхуэхъунукъым (нэгъуэщIу жыпIэмэ, пеня, къуэды хуэдэхэр тралъхьэнукъым), - жиIащ Цыплухиным.
Абы жиIащ 8-800-100-09-04 телефон номерым псалъэмэ, цIыхухэм Iуэхум теухуауэ чэнджэщ зэрагъуэтынур. «Къэхъуар щIагъуэу пхужыIэнукъым, ауэ дыщогугъ цIыхухэм дакъыгурыIуэну», - дыщIигъуащ абы.
Егоровэ Татьянэ Iуэхур зытетыр и чэзум цIыхубэм щIрамыгъэщIам и щхьэусыгъуэм щыщIэупщIэм, Цыплухин Александр къыхигъэщащ апхуэдэ къэхъункIэ хъуну езыхэм зэрамыгугъар икIи мы зэманым ар зэрагъэзэкIуэжыр. Депутатхэр щхьэхуэу къытеувыIащ фэтэр куэду зэхэт унэхэм газ шынагъуэншагъэр къызэрыщызэрагъэпэщым, газ уасэр зэрат щIыкIэм, нэгъуэщIхэми.
ЗэIущIэм щытепсэлъыхьащ «Ухуэныгъэм, зэгъэпэщыжыныгъэм къыщагъэсэбэпыну, апхуэдэуи автомобиль гъуэгухэр зэIузэпэщ ящIын папщIэ федераль-нэ бюджетым къыхэкIыу Къэбэрдей-Балъкъэр Республикэм кърат кредитым теухуа зэгурыIуэныгъэхэм иджыри щIэ хэлъхьэнымкIэ» КъБР-м и Хабзэм и проектым.
КъБР-м и Парламентым ПромышленностымкIэ, транспортымкIэ, связымрэ гъуэгу IэнатIэмкIэ и комитетым и унафэщI Гугу Владимир «ЦIыхухэмрэ хьэпшыпхэмрэ къезышэкI таксихэм я Iуэхутхьэбзэхэр зэрызэфIахым кIэлъыплъыныр къызэгъэпэщыным теухуауэ» КъБР-м и Хабзэм зэхъуэкIыныгъэхэр хэлъхьэным и IуэхукIэ» КъБР-м и Хабзэм и проек- тыр щIызэхагъэувам и щхьэусыгъуэу къыхигъэщащ таксим и Iуэхутхьэбзэхэр цIыхухэм яхуэзыщIэ IуэхущIапIэхэмрэ хьэрычэтыщIэхэмрэ я хуитыныгъэхэмрэ къалэн нэхъыщхьэхэмрэ абыкIэ зэрыщIагъэбыдар. А дэфтэрхэр IуэхущIапIэ зэхуэмыдэхэм Iэрагъэхьащ хагъэплъэ- ну.
Депутатхэр тепсэлъыхьащ нэгъуэщI федеральнэ хабзэхэмрэ жэрдэмхэмрэ я проектхэм. КъБР-м и Парламентым хэмыт политикэ партхэм я лIыкIуэхэр кърагъэблэгъауэ ирагъэкIуэкIыну зэIущIэр депутатхэм траухуащ щIышылэм и 31-м.