Владимир Путин эришиуню эсеплерин чыгъарыу эришиуге къатышырча Артекде жыйылгъан «Большая перемена» Битеуроссей конкурсну финалына чыкъгъан окъуучула бла видеоконференция халда тюбешгенди. Школчулагъа алгъышлау сёзюн айта, ол уллу шуёх къауумгъа быйыл бешинчи, алтынчы, жетинчи классланы окъуучулары биринчи къошулгъанларын белгилегенди.
«Бюгюн проектлеригизни эм жетишимлеригизни юсюнден айтырыкъбыз, алай эм алгъа сизни бетигизде «Большая переменагъа» къатышыргъа оноу этген школчуланы эм колледжлени окъуучуларын алгъышларгъа сюеме. Ала уа къыралыбызны битеу регионларындан, уллу шахарларыбыздан эм гитче эллерибизден эки бла жарым миллион жаш россейлиледиле», - деп белгилегенди Владимир Путин. Къыралны Президенти энчи ыразылыгъын конкурсчуланы ата-аналарына, аппаларына бла ынналарына, устазларына эм юйретиучюлерине айтханды.
Эришиуню «Россейни бил!» деген ызында ахыргъы урумуна чыкъгъан Нальчикден Сафия Кумышева Къабарты-Малкъарны бек ариу жерге санагъанын билдиргенди. «Туризмни айнытыргъа керекди. Мени шахарым аламатды, аны битеу Россей кёрюрге тийишлиди», - дегенди ол.
Владимир Путин Къабарты-Малкъаргъа биринчи жолоучулугъуну хычыуун эсгериулерин эсине келтирип, бизни республиканы сюйюп къойгъаныны юсюнден хапарлагъанды.
«Билемисе, биринчи кере келгенимде сезимлерим эсимдедиле. Таугъа минип къарагъанымда, аллай жарыкъ кюн тийип эди, акъылыма аллай жарыкъ оюмла келген эдиле. Ол аламатлыкъгъа къарап, кеси кесиме бу ариулукъну алгъаракъ кёрмегениме сокъураннганма. Къалай иги болгъанды аланы кёргеним. Ол биринчи танышыудан сора сизни республиканы бек сюйгенме. Бек айбат жерле. Бек ариу республика. Анда кёп кере болгъанма. Лыжалада учханма сизде. Ол аламат сейир таулада», - деп хапарлагъанды Россейни алчысы.
