Чечен Республиканы ара шахары Грозныйде Шимал Кавказны басма органларыны «Цифровые медиа. Мир без границ» деген 6-чы халкъла аралы форуму ачылгъанды. Аны «Шимал Кавказ» МЦОИ РФ-ни Президентини СКФО-да толу эркинликли келечисини аппаратыны, Чеченни Башчысыны бла Правительствосуну администрациясыны эмда Президент грантланы фондуну себепликлери бла къурагъанды.
Анга  башха регионладан, къыралладан окъуна мингнге жууукъ адам къатышады. Специалистле  цифралы медианы бла миллет прессаны айнытыуну амалларын сюзерикдиле, сынауларындан хапар айтырыкъдыла, СМИ-де ишлегенлени къайгъы этдирген соруулагъа жууапла излерикдиле.     
Форумну кезиуюнде кёп тюрлю «тёгерек столла», мастер-классла, атлары айтылгъан журналистле бла тюбешиуле къураллыкъдыла. Къонакъланы Чечен Республиканы башчысы Рамзан Кадыровну атындан регионну правительствосуну Председатели Муслим Хучиев алгъышлагъанды. Ол бу жыйылыуну баш мураты басма органланы болушлукълары бла халкъланы араларында шуёх халланы кючлендириу болгъанын айырып айтханды.
Форумгъа Къабарты-Малкъардан да журналистле баргъандыла. Аны экинчи кюнюнде «Медиа-Кавказ» конкурсда хорлагъанланы саугъалау боллукъду. Анга битеу да СКФО-ну жети регионундан 100-ден артыкъ иш берилгенди.