КъБР-м и Iэтащхьэ КIуэкIуэ Казбек щэбэт кIуам зыщигъэгъуэзащ «Шынагъуэншэ икIи фIагъ лъагэ зиIэ автомобиль гъуэгухэр» лъэпкъ проектым хыхьэу гъуэгухэр зэгъэпэщыжыным ехьэлIа лэжьыгъэхэр зэрекIуэкIым, 2021 гъэм и щIыналъэ программэхэм япкъ иткIэ зэфIагъэкIхэм. Лэжьыгъэ IуэхукIэ ежьэри, республикэм и УнафэщIым зэпищIащ щIыналъэ зыбжанэ: Бахъсэн - Прохладнэ - Май - Аруан - Шэджэм районхэр.
Республикэм и Iэтащхьэм щIыгъуащ КъБР-м транспортымрэ гъуэгу хозяйствэмкIэ и министр ДыщэкI Аслъэн.
Прохладнэм КIуэкIуэ Казбек къыщипщытащ Головко и цIэр зезыхьэ уэрамым щрагъэкIуэкI лэжьыгъэхэр. Мыбдежым гъуэгу километритхум щытралъхьэнущ асфальтрэ бетонрэ зэхэлъу, гъуэгур зэблэкIыгъуиплIу гуэшауэ щытынущ. Я мурадщ гъуэгум и IуфитIри къагъэнэхуну, лъэс зекIуапIэхэр, щхъуантIагъэхэр щыхасэну щIыпIэхэр хуащIыну. Зэрагъэпэщыжынущ автомобиль гъуэгум къекIуалIэхэри, абыхэм Почтовэ, Больничнэ, Лесной уэрамдэкIхэри, ТекIуэныгъэм и уэрамри яхэту.
ЩIыналъэм и Iэтащхьэм гулъытэ хэха хуищIащ Прохладнэ, Май къалэхэм я зэхуакум хуэзэ Iыхьэм, Прохладнэ - Елъхъуэт трассэм щыщу километрибгъурэ ныкъуэрэ зи кIыхьагъым. Ар республикэм дежкIэ нэхъ мыхьэнэшхуэ зиIэ гъуэгухэм ящыщщ, щIыналъэхэми зэхуэдэу къагъэсэбэп - абы зэпещIэ Кавказ Ищхъэрэ федеральнэ округым хыхьэ щIыналъищ: Ставрополь крайр, Къэбэрдей-Балъкъэр Республикэр, Осетие Ищхъэрэ - Алание Республикэр. Мы зэманым абы щызокIуэ цIыху къызэрырашэкI транспорт, хьэлъэзешэ автомобиль куэд дыдэ.
«Гъуэгур зэгъэпэщыжыным теухуа проектыр хьэзырщ, иджы федеральнэ центрыр абы арэзы зэрытехъуам теухуа унафэ къищтэным дыпоплъэ, - къыхигъэщащ КIуэкIуэ Казбек. - Бахъсэнрэ Шэджэмрэ я зэхуаку дэлъ гъуэгур къызэрагъэнэхуам хуэдэ дыдэу Май, Прохладнэ къалэхэр зэпызыщIэ гъуэгури и кIыхьагъкIэ, лъэныкъуитIымкIэ къэдгъэнэхунущ, абы тетхэм я шынагъуэншагъэр къызэгъэпэща хъун папщIэ. КъимыдэкIэ, ди мурадщ мыбдежым технологиещIэхэр къыщыдгъэсэбэпыну, абыхэм я фIыгъэкIэ гъуэгур нэхъыфIи хъунущ, текIуадэри игъэмэщIэнущ, ахъшэ къыдэхуэмкIэ нэгъуэщI жылэхэм гъуэгу километр зыбжанэ щытхузэгъэпэщыжынущ. Ди мурадщ мы гъэм мыбдежым япэ категорием хыхьэ гъуэгу щыдиIэну».
Лэжьыгъэ IуэхукIэ щежьам къапщытащ Май къалэм Герценым и цIэр зезыхьэ и уэрамымрэ Старэ Шэрэдж къуажэм и гъуэгухэм ящыщу километриплI зи кIыхьагъымрэ зэрызэрагъэпэщыж щIыкIэр. А гъуэгухэм кумблъэмбхэр зэрагъэсеиж щхьэфэ тралъхьащ, лэжьыгъэхэм пащэ. Республикэм и УнафэщIыр апхуэдэуи ирикIуащ километритIым щIигъу и кIыхьагъыу зэрагъэпэщыжа, Нарткъалэ - Аруан - Рыбопитомник гъуэгум, Нартан и гъуэгухэм ящыщу километриблым щIигъу зи кIыхьагъ, зи зэгъэпэщыжыныр и кIэм нэса Iыхьэм лэжьыгъэхэр зэрыщекIуэкIри къипщытащ.
Зэрыщыту къапщтэмэ, дызэрыт илъэсым къапэщытщ автомобиль гъуэгу 32-рэ къызыхуэтыншэу зэрагъэпэщыжыну е кIэлъыIэбэну, псори зэхэту ахэр километри 114-м щIигъунущ.
