КъБР-м и Парламентым и УнафэщI Егоровэ Татьянэ щэкIуэгъуэм и 29-м иригъэкIуэкIащ зи чэзу зэIущIэр. Абы хэтащ УФ-м и Къэрал Думэм и депутат Геккиев Заур, УФ-м и Федеральнэ Зэхуэсым ФедерацэмкIэ и Советым хэт Ульбашев Мухьэрбий, КъБР-м и Правительствэм и УнафэщIым и япэ къуэдзэ КIэрэф Мурат, депутатхэр.
ЗэIущIэр къызэIуахын и пэ, Къэбэрдей-Балъкъэрым и комсомол зэщIэхъееныгъэм и ветеранхэм я советым и тхьэмадэ Жыджэт Александр 2018 гъэм ВЛКСМ-р илъэси 100 зэрырикъуар гъэлъэпIэным хэтахэм фIыщIэ яхуищIащ. «Комсомолыр илъэси 100 ирокъу» фIыщIэ тхылъыр абы иритащ Егоровэ Татьянэ. Апхуэдэуи КъБР-м и комсомол зэщIэхъееныгъэм и ветеранхэм я советым и ЩIыхь тхылъхэр зыхуагъэфэща депутат зыбжанэм - Къудали Мухьэ- мэд, Мэшыкъуэ Барэсбий, Беслъэней Аслъэн сымэрэ КъБР-м и Парламентым и Аппаратым и УнафэщI ФочыщIэ Натальерэ яритыжащ.
КъБР-м и Парламентым УхуэныгъэмкIэ, псэупIэ-коммунальнэ IэнатIэмрэ гъэсыныпхъэ-энергетикэ IуэхущIапIэхэмкIэ и комитетым Кебеков Владимир къыхагъэкIащ, «Захуагъэ здэщыIэ Урысей» партым и депутатхэм я палатэм и советым и унафэщIым и къуэдзэу зэрыха- хам къыхэкIыу.
ЗэIущIэм япэ еджэгъуэм къыщащтащ «Къэбэрдей-Балъкъэр Республикэм и бюджетыр 2019 гъэм, 2020-2021 гъэхэм ятещIыхьауэ» КъБР-м и хабзэм и проектыр. КъБР-м финансхэмкIэ и минист- рым и къалэнхэр зыгъэзащIэ Лисун Еленэ жиIащ 2019 гъэм республикэм и хэхъуэр сом мелард 31-рэ мелуан 60,6-м зэрынэсынур, къигъэсэбэпыну зыхуеи-нур сом мелард 30-рэ мелуан 37,8-рэ зэрыхъунур. «Налог ахъшэмрэ налогым щымыщ нэгъуэщI хэхъуэхэмрэ сом мелард 11-рэ мелуан 346,8-рэ къыхэкIы-нущ. Къэбгъэлъагъуэмэ, а бжыгъэм и процент 95-р налог хэхъуэхэращ (сом меларди 10-рэ мелуан 741,6-р). 2019 гъэм КъБР-м и бюджетым федеральнэ ахъ-шэу къыIэрыхьэнущ сом мелард 19-рэ мелуан 713-рэ. Абы щыщу сом меларди 5-рэ мелуан 329-р мурад пыухыкIахэм тедгъэкIуэдэну ди мурадщ. Сом меларди 2-м нэблагъэр хуэдутIыпщынущ мэкъумэш IэнатIэм елэжьхэм защIэгъэкъуэным. Къэрал щIыхуэр зытегъэкIыным сом мелуан 401,5-рэ хухэтхынущ», - жи-Iащ къэпсэлъам.
Депутатхэм къыхагъэщащ егъэджакIуэхэм я улахуэр 2019 гъэм щIышылэм и 1-м къыщыщIэдзауэ къэпщытэжыным, бюджет IэнатIэ Iутхэм ику иту къахь лэжьапщIэм хэгъэхъуэным, курыт школитIрэ сабий гъэсапIитIрэ къызэIухы-ным, школкIуэгъуэ ныбжьым нэмыса- хэм я IуэхущIапIэхэм зегъэубгъуным текIуэдэнур къалъытэн зэрыхуейр.
КъБР-м фIэкIыпIэ зимыIэ медицинэ страхованэмкIэ и щIыналъэ фондым и унафэщI Бгъэжьнокъуэ Зурьят жиIащ 2015 гъэ лъандэрэ «Къуажэ дохутыр» программэр Къэбэрдей-Балъкъэрым зэрыщыщамыгъэзащIэр икIи щIэупщIащ 2019 гъэм ар бюджетым къызэрыхалъытам. Лисун Еленэ жиIащ программэр, нэхъ пэжу жыпIэмэ, дохутырхэм я мызакъуэу, къуажэхэм щылажьэ медицинэ лэжьакIуэхэм защIэгъэкъуэным зэрытеухуар икIи а Iуэхум къэкIуэну илъэсым сом мелуан 91-рэ зэрыхухахынур (сом мелуан 54,6-р федеральнэ ахъшэу).
ЗэIущIэм депутатхэр арэзы щытехъуащ хамэ къэралхэм къикIауэ Къэбэрдей-Балъкъэрым патенткIэ щылажьэхэм ят налогыр 2019 гъэм къыщыщIэдзауэ хуэдитIкIэ хэгъэхъуэным. Абы тепсэлъыхьащ КъБР-м лэжьыгъэмрэ социальнэ дэIэпыкъуныгъэмкIэ и министр Асанов Алим. Мы зэманым зи гугъу ящI лэжьакIуэхэм мазэ къэс бюджетым сом 2023-рэ ират. 2018 гъэм и щIышылэ - накъыгъэ мазэхэм республикэм ику иту къыщахь улахуэр сом мин 25-рэ 140-рэ зэрыхъуам къыхэкIыу, щIыналъэм щыпсэухэм я налогыр сом мини 3-рэ 268-м щIигъуащ. Министрым зэрыжиIамкIэ, апхуэдэ щытыкIэм къегъэлъагъуэ хамэ щIыпIэ къикIауэ мыбдеж щылажьэм ит налогыр процент 38-кIэ зэрынэхъ ма-щIэр Къэбэрдей-Балъкъэрым щыпсэум ейм нэхърэ. Абы къыхэкIыу, 2019 гъэм хамэ къэралхэм къикIахэм мазэ къэс республикэм и бюджетым сом мини 4-м щIигъу иратын хуей хъунущ. «Нэхъыщхьэращи, дэ ди гугъэщ визэ къыщамыгъэсэбэп къэралхэм къикIыу республикэм лэжьакIуэ къакIуэхэм я бжыгъэр абы нэхъ мащIэ ищIыну, апхуэдэ щIыкIэкIэ щIыналъэм щыпсэухэм Iэмал нэхъыбэ яIэнущ лэжьыгъэ ягъуэтынымкIэ», - къыхигъэщащ министрым.
Депутатхэм къащтащ «Къэбэрдей-Балъкъэрым и бюджетымрэ ФIэкIыпIэ зимыIэ медицинэ страхованэм и щIыналъэ фондым и бюджетыр 2019 гъэм, 2020 - 2021 гъэхэм ятещIыхьауэ», «Къэбэрдей-Балъкъэрым и ЩIы кодексым зэхъуэкIыныгъэхэр хэлъхьэным теухуауэ», «Къэбэрдей-Балъкъэр Республикэм нэгъуэщI щIыналъэхэм ярищIылIэ зэгурыIуэныгъэхэм ятеухуауэ» КъБР-м и хабзэхэм я проектхэр, нэгъуэщIхэри.
ЗэхъуэкIыныгъэхэр халъхьащ КъБР-м и Парламентым и Регламентым. Апхуэдэуи КъБР-м и Парламентым и еханэ зэхуэсым и ЩIалэгъуалэ палатэм хагъэхьахэм арэзы техъуащ. Абы цIыху 45-рэ хэтынущ: 13-р республикэ жылагъуэ зэгухьэныгъэхэм я лIыкIуэщ, 14-р - щIыпIэ жылагъуэ IуэхущIапIэхэм, 10-р еджапIэхэм я студент советхэм, 8-р урысей политикэ партхэм я щIыналъэ къудамэхэм щыщщ.
Егоровэ Татьянэ депутатхэр къыхуриджащ дыгъэгъазэм и 12-м КъБР-м и Парламентыр къызэрызэрагъэпэщрэ илъэс 25-рэ зэрырикъум къыхэкIыу екIуэкIыну Iуэхугъуэхэм жыджэру хэтыну.