Бу кюнледе белгили къазах назмучу Джамбул Джабаев туугъанлы жюз бла жетмиш беш жыл болгъаны бла байламлы «Жамбулну поэзия хазнасы эмда аны бла байламлы ишле» деген аты бла халкъла аралы онлайн конференция баргъанды.
Акъ ын поэтни юсюнден къысха билдириу. Ол 1846 жылда Къазахстанда Джамбул тауну этегинде туугъанды. Атасы Джабай Ыстыбаев анга тауну атын атап къойгъанды. Жашчыкъ сабийликден домбрада ойнай, кеси жырла тагъа юйреннгенди, халкъ чыгъармачылыкъны да билгенди. Ол айтып, «Суранши-батыр», «Утеген-батыр» деген къазах эпосла сакъланнгандыла. Ол айтышлада эришгенди. Октярь революция дунияны тюрлендиргенде, анга жетмишден атлагъан эди, алай а ол жангы къарыу бла жырлап башлагъанды. Аны бек сюйгендиле. 1938 жылда токъсан жылдан атлагъан акъынны Къазах ССР-ни Баш Советине дупутатха айыргъандыла.
Шаркъ акъылман, назмучу узакъ ёмюр жашагъанды – сау ёмюр тенгли бир. Ол аны жашын жойгъан Уллу Ата журт уруш бошалып, аны Хорламын кёрюп, 22 июньда ауушханды. Уллу къырал тюрлениулени, уруш къазауатланы да шагъаты совет поэтге саналгъанды. Сталинни премиясына тийишли болгъанды.
Конференцияны ишине Юнескону маданиятланы байламлы этерге аталгъан халкъла аралы арасы, Къазахстанны билим бериу эм илму министерствосу, культура эм спорт министерствосу, М. Ауэзов атлы Юг Казах университет, «Рухани жангыру и Ассамблеи народов Казахстана» деген ара къатышхандыла.
Бизде бу онлайн конференция Шимал Кавказны къырал искусствола институтуну мурдорунда баргъанды. Башында сагъынылгъан организацияланы келечилерине бизден проректору философия илмуланы доктору, профессор Эфендиланы Фуад, КъМР-ни халкъ поэти, республиканы Жазыучуларыны союзуну правленини председатели КЪМР- ни халкъ поэти Беппайланы Муталип, Къабарты-Малкъарны культурасыны сыйлы къуллукъчусу, Россейни журналистле союзуну члени, Шимал Кавказны искусстволарыны къырал институтуну тамата устазы Ботталаны Мурат эм башхала къошулгъандыла.
Эфендиланы Фуад Шимал Кавказны къырал искусствола институтуну ректору, искусствоведенияны доктору Рахайланы Анатолийни атындан конференциягъа жыйылгъанланы тюрк халкъланы, битеу дунияны да быллай магъаналы байрамы бла алгъышлагъанды. Ол Джамбул Джабаевни ёмюрлюк поэзиясыны, аны адамлыгъыны, къазах тюзлеча, кенг фахмусуну юсюнден айтханды.
Беппайланы Муталип «Уллу акъын, халкъ чыгъармаланы устасы Джамбул Джабаев» деген докладын этгенди. Ызы бла кеси Къазахстанны уллу шайырына атагъан назмусун окъугъанды. Ботталаны Мурат конференциягъа жыйылгъанланы «Ол белгили налмас» деген иши бла шагъырей этгенди.
Халкъла аралы конференцияны ишини юсюнде уллу материал жыйылгъанды – юч жюзге жууукъ бет. Бу жумуш бла кюрешгенле аланы бирге этип, энчи илму китап чыгъарыргъа умутлудула.
