Бахсан районну администрациясында КъМР-ни Башчысы Казбек Коков Бахсан шахардан эмда Бахсан, Элбрус, Зольск районланы эллеринден Уллу Ата журт урушну фронтларына кетген 40 батырны туудукъларына жигитле урушда тийишли болуп, алай алмай къалгъан къырал саугъаланы удостоверенияларын бергенди. Уллу Хорламдан сора 76 жылдан аскерчилени сабийлери, туудукълары Россейни Президенти къол салгъан удостоверенияланы алгъандыла.
Жыйылгъанланы Ата журтну къоруулаучуну кюню бла алгъышлай, Казбек Коков Къабарты-Малкъарны жашларыны бла къызларыны батырлыкълары ёмюрлеге сакъланырыгъын, Ата журт урушну жигитлерини атларын тохташдырыу жумушла мындан ары да бардырыллыкъларын чертгенди.
Ол кюн берилген къырал саугъаланы удостоверенияларыны арасында Ата журт урушну орденини 1-чи эм 2-чи даражасы, Къызыл Жулдузну ордени, «Кишилиги ючюн», «Сталинградны къоруулагъаны ючюн», «Ленинградны къоруулагъаны ючюн», «Кавказны къоруулагъаны ючюн», «Совет Заполярьени къоруулагъаны ючюн», «1941-1945 жыллада Уллу Ата журт урушда Германияда хорлам ючюн» майдалла бардыла.
Саугъаланы бериуге аталгъан къууанчлы жыйылыугъа КъМР-ни Башчысыны Администрациясыны таматасы Мухамед Кодзоков, Бахсан, Элбрус районланы администрацияларыны оноучулары Артур Балкизов бла Залийханланы Къаншаубий, Бахсан шахарны башчысы Хачим Мамхегов, жер-жерли къаугъаланы ветеранлары, жаш тёлю-патриот организацияланы келечилери да къатышхандыла.
Алай бла ол кюн гвардий аскерчи Штымов Каральби Цуевичге Ата журт урушну орденини 1-чи даражасыны, гвардий тамата сержант Физиков Нури Муталибовичге Ата журт урушну орденини 2-чи даражасыны бла Къызыл Жулдузну орденине, кичи лейтенант Амшуков Чарим Батырбековичге «Кишилиги ючюн» майдалны удостоверениялары берилгендиле .
Аскерчи Дикинов Абу Татурович урушну жылларында жигитлиги ючюн «Сталинградны къоруулагъаны ючюн» эмда «1941-1945 жыллада Уллу Ата журт урушда Германияда хорлам ючюн» майдаллагъа тийишли болгъан эди.
Дагъыда аскерчиле Отарланы Сарамурзаны жашы Адрахманны, Абазов Данила Хакяшевични, Апшев Мустафара Ханаховични, Гетаов Зариф Олиевични, Дикинов Бац Татуровични, Жанов Талим Хизировични, Калмыков Даут Дзадзуевични, Мазашоков Гали Ляцовични, Мамхегов Али Хаджимурзовични, Мурзаканов Зулкарней Хажмусовични эм башха жигитлени жууукъларына «Сталинградны къоруулагъаны ючюн» майдалны удостоверениясы берилгенди.