|
ЩIалэгъуалэ палатэм и еханэ зэхуэсым и лэжьыгъэр къапщытэж
16 февраля, 2021 - 07:00
Къэбэрдей-Балъкъэр Республикэм и Парламентым щекIуэкIащ ЩIалэгъуалэ палатэм и 6-нэ зэхуэсыр зэрылэжьа пIалъэм къриубыдэу зэфIагъэкIахэмрэ зыхунэмысахэмрэ къыщапщытэж, бжьыпэр къыкIэлъыкIуэ зэхуэсым щратыж иужьрей зэIущIэ.
Къэбэрдей-Балъкъэрым и Парламентым и УнафэщI Егоровэ Татьянэ зэIущIэр къыщызэIуихым, ЩIалэгъуалэ палатэм иIэ хъуа жылагъуэ мыхьэнэм кIуэ пэтми зэрызиубгъумкIэ, иригъэкIуэкI лэжьыгъэми щIэупщIэрэ гулъытэу игъуэтым зэрыхэхъуэмкIэ и псалъэр къыщIидзащ.
«Фи япэ итахэм къыхалъхьауэ щыта гупыж дахэхэм пыфщэн фхузэфIэкIащ, гъунэ зралъэу намыгъэсыфа Iуэхугъуэ куэд вгъэкIуэтэфащ. ЩIалэгъуалэ палатэм зэхуэсыгъуэу иIам къызэдащта хабзэщ зым къыщIидзэр адрейм адэкIэ нигъэсынуи, ар къызэпывудакъым, уеблэмэ лъэныкъуэ куэдкIэ къызэрыкIыу сыт хуэдэ Iуэхугъуэри зэфIэфхын флъэкIащ. ЩIалэгъуалэ палатэр къэрал IэнатIэм и зы къудамэ нэс хъун лъэкIащ, ауэ щыхъукIи а лъагапIэм удэкIыфынри къызэрымыкIуэу гугъут, фызыхиубыдари лъэхъэнэ зэблэкIыгъуэт, тынштэкъым», - жиIащ Егоровэм.
Абы къищынэмыщIауэ, Егоровэм къыхигъэщащ ЩIалэгъуалэ палатэм и 6-нэ зэхуэсым хэта ныбжьыщIэхэм уадэлэжьэну гъэщIэгъуэну зэрыщытар. Гукъинэж щыхъуахэм я гугъу щищIым, унафэщIым жиIащ «Си хабзэубзыху жэрдэмыр» зи фIэщыгъэ зэхьэзэхуэр иджы хуэдэу купщIафIэ, гупсысэ зэхуэмыдэхэмкIи хьэлъафIэ щыхъуа зэи къызэрыхэмыкIар. ЩIалэгъуалэ палатэм щыщу а зэныкъуэкъум зыкъыщызыгъэлъэгъуахэм къыхалъхьахэр цIыхур зыгъэпIейтей экономикэ, жылагъуэ-политикэ, щэнхабзэ Iуэхугъуэхэм хэлъ зэIумыбзхэр къызыхэкIыр зыгъэнахуэ, ахэр зэрызэблэбгъэкI хъуну Iэмалхэр утыку къизылъхьэ лэжьыгъэу зэрыщытам шэщIауэ и гугъу ищIащ.
«Хабзэр убзыхуныр, абы щыщIагъэ иIэхэр къызэнэкIыныр, нахуэу, гуитIщхьитIагъ, зэIумыбз къыхэмыкIыу зэхэлъхьэныр Парламентым и пщэрылъ нэхъыщхьэщ. Абы и лъэныкъуэкIэ уеплъмэ, зэпеуэм къыхэкIауэ щыта къэхутэныгъэхэр парламент сыхьэт зэIухахэм къыхэплъхьэу урипсалъэ хъуну лэжьыгъэфI хъуат. ИпэжыпIэкIэ жыпIэмэ, апхуэдэхэри къыхэкIащ. Арыххэуи, узэрыгушхуэ хъун фкъуэлъщ, уригушхуэни хуейщ», - тригъэчыныхьащ Егоровэм.
Зэкъуэту, гупсысэкIэ зэтемыхуэми, акъылыр щызэлъэIэс щIыпIэхэр я тегъэщIапIэу лэжьэн зэрыхуейми тепсэлъыхьащ Парламентым и УнафэщIыр. «Фызэкъуэувэн, зыр зым и дамэгъуу фылэжьэн флъэкIащ. - къыхигъэщащ Егоровэм. - Iэмал имыIэу щыткъым псомкIи узэгурыIуэу щытыныр. Гупсысэрэ псалъэу цIыхум къыхилъхьэр псори зэщхьу щытамэ, щIэщыгъуи гъэщIэгъуэни щыIэнтэкъым. Ауэ зым жиIэм адрейр едаIуэу, гъащIэмрэ щытыкIэмрэ къезэгъ Iэмалыншэр къыхэфхыу фылэжьащ. Армырамэ волонтёр лэжьыгъэу вгъэхъеям и зы щани фхузэфIэкIынтэкъым, хабзэубзыху жэрдэму къыхэфлъхьам щыщи фхуэгъэкIуэтэнтэкъым. Гуращэ нэхъ дахэр пщIыми, цIыхум уащыхыхьэкIэ, узэакъылэгъуу, зым зыр и щIэгъэкъуэну узэрыщытыр къыбдамылъагъумэ, дзыхь къыуагъэзынукъым, яхуэпщIэну узыхуейри зыхыуагъэщIэнкIэ фIэщ щIыгъуейщ. А волонтёр Iуэхур езыр къапщтэмэ, пагэныгъэ гуэри хэзагъэркъым, арыншауэ цIыхум и гукъеуэхэр, и гурыгъухэр пхузэхэщIыкIынукъым. Фи гулъытэрэ фи щабагъкIэ куэдым щIэгъэкъуэн фахуэхъуащ, арыххэуи ЩIалэгъуалэ палатэм и пщIэр ину фIэтащ. Мыбдеж щывлэжьамрэ щызэвгъэгъуэта IэпэIэсэныгъэмрэ зыщIыпIи кIуэнукъым, ар гъащIэми къызэрыщыфхуэщхьэпэжынум шэч къытесхьэркъым. ДэнэкIэ фымыгъазэми, Iуэхуу къефхьэжьэм пщIэ иIэу, пщIэ къыфхуащIу фыпсэуну сынывохъуэхъу!»
Парламентым и УнафэщIым и псалъэр иуха нэужь, ЩIалэгъуалэ палатэм и 6-нэ зэхуэсыр зэрылэжьа зэманым къриубыдэу иригъэкIуэкIа Iуэхухэр къызыхэщ кинотеплъэгъуэм къызэхуэсахэр ирагъэплъащ.
Абы иужькIэ «Зи узыншагъэм сэкъат иIэхэм я махуэм» ирихьэлIэу ЩIалэгъуалэ палатэм къызэригъэпэщу Iэтауэ иригъэкIуэкIауэ щыта махуэщIым траха видео кIэщIи ягъэлъэгъуащ.
ИлъэситIкIэ лэжьа ЩIалэгъуалэ палатэм и 6-нэ зэхуэсым и лэжьыгъэм жыджэру хэтахэм Къэбэрдей-Балъкъэрым и Парламентым и ФыщIэ тхылъыр щаритым, Егоровэм къыхигъэщащ апхуэдэ гулъытэ дэтхэнэми зэрыхуэфащэр.
Парламентым ЕгъэджэныгъэмкIэ, щIэныгъэмрэ щIалэгъуалэм я IуэхухэмкIэ и къудамэм и унафэщI Емуз Нинэ псалъэр щратым, ЩIалэгъуалэ палатэм и лэжьыгъэм хэта дэтхэнэри дуней щхьэхуэ зэрырикъур, жану, зыпэрыува IэнатIэр жэуаплыныгъэ пылъу зэрагъэзэщIар къыхигъэщащ. НэхъапэкIэ лэжьа зэхыхьэгъуэхэм къакIэрымыхуу, уеблэмэ мы зэхуэсым хэта щIалэгъуалэм нэхъыбэж яхузэфIэкIауэ къилъытащ Емузым. «Къапщтэмэ, ар зэрыщытын хуейри аращ - ипэ итахэм ящIамрэ ялэжьамрэ хэбгъахъуэу, зебгъэужьу, зебгъэIэту улажьэмэщ, гукъинэж уащыщыхъунури, Iэужь-лъэужьхэм лъапсэ щадзынури. Мы 6-нэ зэхуэсым хэтахэр абы и лъэныкъуэкIэ гукъинэж зэрыхъунум пцIы хэлъкъым», - жиIащ Емуз Нинэ. Езыр зи унафэщI къудамэм къыбгъэдэкI ФIыщIэ тхылъхэр ЩIалэгъуалэ палатэм хэтхэм яритащ.
ЗэIущIэр и кIэм щынэсым, ЩIалэгъуалэ палатэм и 6-нэ зэхуэсым и унафэщIу лэжьа Созаев Кязим псоми фIыщIэ яхуищIащ, нэхъыжьхэм я дэIэпыкъуныгъэрэ гулъытэрэ мыхъуамэ, апхуэдиз зэрахузэфIэмыкIынури жиIащ.
Фигу къэдгъэкIыжынщи, мазэ ипэкIэ ЩIалэгъуалэ палатэм и 7-нэ зэхуэсым хыхьэну хуейхэм я хэдэрыхэплъэр Къэбэрдей-Балъкъэр Республикэм и Парламентым щекIуэкIащ, и лэжьыгъэри дызытехьэ мазэм щIедзэ. Абы хыхьэну хуагъэфэщащ 6-нэ зэхуэсым и лэжьыгъэм жыджэру зыкъыщызыгъэлъэгъуа зыбжанэми.
|
29.03.2024 - 08:57 Урысей Ипщэмрэ Кавказ Ищхъэрэмрэ регби 7-мкIэ пашэныгъэр къыщыхьыным теухуа зэхьэзэхуэ иджыблагъэ Налшык къалэм щекIуэкIащ. |
|
29.03.2024 - 08:56 КъБР-м щIыхь зиIэ и журналист, Урысей Федерацэм, Къэбэрдей-Балъкъэрым щэнхабзэмкIэ щIыхь зиIэ я лэжьакIуэ, жылагъуэ лэжьакIуэ, «Советская молодёжь» газетым и редактор нэхъыщхьэу щыта Къардэн Мухьэм |
|
29.03.2024 - 08:56 Пхъэщхьэмыщхьэмрэ хадэхэкIымрэ къыхащIыкI консерву Кавказ Ищхъэрэм къыщыщIагъэкIым и процент 90-р Къэбэрдей-Балъкъэрым къылъос. |
|
28.03.2024 - 09:03 ЩIыгум и ныбжьым ебгъапщэмэ, псэ зыIут дунейм еплъытмэ, цIыхум къикIуа гъуэгуанэр кIэщI дыдэщ, тхыдэм и щапхъэхэмкIэ ар мащIэщ. |
|
28.03.2024 - 09:03 Кавказ Ищхъэрэм и щIыналъэхэм алыдж-урым бэнэкIэмкIэ я спортсмен нэхъ лъэщхэр, илъэс 24-рэ зи ныбжьхэр, иджыблагъэ щызэхуэсащ Дагъыстэным и Каспийск къалэм. |
|