Къабарты-Малкъар къырал университетде бу кюнледе энди ахшы тёреге айланнган Шимал Кавказны жаш алимлерини инновациялы проектлерини кёрмючю онбешинчи кере озгъанды. Энди уа анга жаланда студентлеге угъай, колледжледе, школлада окъугъанлагъа да къатышыр онг барды. Ол кеси да Россейде Илмуну кюнюне аталып къуралады.
Жыл сайын да сагъынылгъан экспозицияда кеслерини ишлерин кёргюзтгенлени саны кёпден-кёп бола барады. Сёз ючюн, былтыр анга алтмыш жаш адам къатышхан эселе, быйыл а илмуну башха-башха бёлюмлеринде сексен проектни хазырлагъандыла. Ала уа къуру бизни республикадан болмай, Россейни бирси регионларындан да келгендиле эмда проектлеринде медицина, космос, генетика, роботехника, шёндюгюлю материалланы тинтилиулери дегенча ызланы жангычылыкъларын ачыкълагъандыла.
Сёз ючюн, КъМКъУ-ну прогрессив материалла лабораториясы быйыл синтетикалы мурдорда жарашдырылгъан медициналы маскаланы къайтарып экинчи сырьёну орунунда хайырланыуну, алай бла уа табийгъатны кирлендирмеуню технологиясын жарашдыргъанды. «Кюн шахар» сабий чыгъармачылыкъ академияны келечилери да аслам сейир затны келтиргендиле. Сёз ючюн, София Федоренко больницалада саусузлагъа дарманланы юлеширге боллукъ роботну юсюнден хапарлап, алай бла врачланы жукъгъан ауруудан сакъланыр амал чыгъарыгъына ийнандыргъанды.
КъМКъУ-ну магистранты Илья Ниязов а «IT-турист» деген жангы приложенияны жарашдыргъанды. Ол бизни республикагъа тышындан келип солугъанланы санын кёбейтирге бурулгъан проектди. Андан сора да, аны баш борчу туристни юсюнден социал сетьлени болушлукълары бла аслам информацияны билирча этиудю.
Ставропольну Къойчулукъну эмда эчкичиликни битеуроссей илму-излем институтуну келечилери бу жол да келгендиле кёрмючге. Озгъан жылда аспирант Виктория Плахтюкова сагъынылгъан малланы этлерини адамгъа хайырлы болуруну юсю бла проектин кёргюзтген эди. Быйыл а специалист Нина Гусейнова ууакъ аякълыланы аш эритген системалары бла байламлы жарашдыргъан жангы ишини юсюнден айтханды.
Ол кюн жыйылгъанланы КъМР-ни Парламентини Билим бериу, илму эмда жаш тёлюню ишлери жаны бла комитетини председатели Нина Емузова, билим бериу, илму эмда жаш тёлюню ишлери жаны бла министрни къуллугъун болжаллы халда толтургъан Анзор Езаов, КъМКъУ-ну ректоруну къуллугъун болжаллы халда толтургъан Юрий Альтудов, Жаш алимлени бла специалистлени союзуну башчысы Алексей Абазов, университетни проректору Светлана Хаширова, бирсиле да алгъышлагъандыла. Ала илму экспозиция жаланда регионну угъай, саулай да къыралны бу ызда айныууна къошумчулукъ этгенин чертгендиле.
Андан сора да, кёрмюч жаш алимлени бла иш бериучюлени бирикдирген майданнга айланнганын да белгилей, ол эки жанына да хайырлы жумуш болгъанын ангылатхандыла. Школчула, колледжлени окъуучулары, студентле да тамамлагъан проектлерин кёргюзте, алай бла кеслерини иш кёллюлюклерин, неге сейирлери барлыгъын ачыкълагъанларын, жылдан-жылгъа уа аланы ол сейирлери жетишимлеге бурулгъанларын айтхандыла. Уллу илмуну хар ызын да айнытырыкъла бюгюннгю жаш тёлю болгъанын чертгендиле.
Кёрмючню кезиуюнде айырмалы проектлени сайлагъан комиссия да ишлегенди. Аны башха-башха бёлюмлеринде белгиленнгенле да асламдыла. Аланы санында уа Саракъайланы Джамиля, Жазаланы Елена (КъМКъУ, «Эм иги инновациялы оюм»), Улбашланы Мухаммат («Кюн шахар» сабий чыгъармачылыкъ академия, «Проектни эм ахшы халда ачыкълау»), Жабелланы Самат (КъМКъУ, «IT- Турист»), бирсиле да бардыла. Комиссияны эсеплерине тийишлиликде патент берилирге жарарыкъ проектлени жарашдыргъанлагъа аны хакъсыз алырча онг да боллукъду.
