Къабарты-Малкъар Республиканы Башчысы Казбек Коков «муниципал сагъат» бардыргъанды. Анда сюзюлген сорууланы араларында эпидемиология болум, вакцинацияны къуралыуу, миллет проектлени бардырылыулары болгъандыла. Муниципал къуралыуланы таматалары бла кенгешде школланы ремонтларына да энчи эс бурулгъанды.
Казбек Коковха республиканы мектеплерини мониторинги кёргюзтюлгенди. КъМР-ни Жарыкъландырыу министерствосуна эм муниципал къуралыуланы таматаларына алгъын бардырылгъан «муниципал сагъатда», 3 февральда, тёбен черекли школну халыны юсюнден социальный сетьледе билдириуден сора школланы болумларына къараргъа буйрукъ берилген эди. Озгъан шабат кюн Башчы, Тёбен Черекге келип, мекямгъа къарап, эллилени учреждениягъа ремонт этиллигине ышандыргъанды.
Бу жолгъу «муниципал сагъатда» Казбек Коков КъМР-ни Правительствосуна муниципал къуралыула бла бирге битеулю билим берген школланы ремонтлары жаны бла республикалы программа жарашдырыргъа буйрукъ бергенди.
Кенгешде миллет проектлени бардырылыулары да сюзюлгенди. КъМР-ни Правительствосуну Председатели Мусукланы Алий муниципалитетледе аланы жашаугъа кийирилгенлерини юсюнден айтханды. Республиканы оноучусу муниципалитетледе социал объектле бла байламлы излемлеге къарагъанлай турургъа кереклисин чертгенди.
Эпидемиология болум бла байламлы Казбек Коков коронавирус бла ауругъанланы саны иги да азая баргъанын, аны бла бирге асламлы вакцинация жукъгъан аурууну жайылмазына уллу себеплик болгъанын белгилегенди.