Къабарты-Малкъарны Башчысы Казбек Коков республиканы финансла министри Елена Лисун бла ишчи тюбешиу къурагъанды. Ол ведомствону былтыргъы ишине ахшы багъа бичгенди, къыйын болумлагъа да къарамагъанлай, республика социал халлы битеу борчларын толтургъанын белгилегенди.
Аны бла бирге Башчы 2021 жыл андан тынчыракъ болмазлыгъын чертгенди. Ол экономиканы пандемия бла байламлы тыйгъычлары ючюндю. Аны бла бирге ол бардырылгъан тинтиулеге кёре быйылны борчлары да толусунлай толтуруллукъларын белгилегенди, министрге чыгъаргъа боллукъ къоркъууланы алгъадан билип эм аланы азайтырча онгла излерге буюргъанды.
Елена Лисун регионну оноучусуна былтыргъы болумлада республикалы бюджетге 12 миллиарддан артыкъ налог эм налог болмагъан башха тёлеуле келгенлерин айтханды. Бусагъатда, бу кезиуде бир кесек азайтылгъаннга да къарамагъанлай, келиулени андан да кёп ёлчеми сакъланады эм ол жаны бла магъаналы иш толтурулады.
Казбек Коков республиканы бюджетинде миллиард сомдан артыкъ дефицит 2021 жылгъа бюджет кредитлени жабыу жаны бла борчла ючюн къуралгъанын белгилегенди. Елена Лисун бюджет кредит жаны бла борчну реструктуризациясыны алыкъа да бардырылып тургъан болумларына тийишлиликде 870 миллион сом ёлчемде эркин этилген ырысхы жангы инвестиция проектлени жашауда бардырыу инфраструктура объектлеге, андан сора да, керек болса, коронавирусха къажау жумушлагъа бёлюнюрюгюн ангылатханды.
Ол дагъыда республиканы къырал борчу бла болумну юсюнден да айтханды. Аны 2020 жылда азайтыргъа онг болгъанды, бусагъатда ол 7,3 миллиард сомду, 2018 жылда уа ол 12 миллиард сомдан артыкъ эди. Аны бла бирге республиканы таматасы коммерческий кредитле алмазча битеу болгъан къолайлыкъны тирилтирге кереклисин энчи чертгенди. Финансла министрни информациясына кёре, къырал борчну азайгъаны республикагъа юч жылны ичинде коммерция кредитлени обслуживаниясында экиден артыкъ миллиард сомну экономия этерге онг бергенди.