КъМР-ни Башчысы Казбек Коков Правительствону юйюнде коронавирус аурууну профилактикасы эм аны жайылыууна контроль жаны бла Оператив штабны кезиулю жыйылыуун бардыргъанды.
Республиканы оноучусу эпидемиология болум тапланнганын, ауругъанланы саны азая баргъанын чертгенди. «Жангы жылгъы байрамладан сора госпитальлада кеслерине 1,5 минг адам бакъдыргъан эсе, бюгюнлюкде саусузланы саны эки кереге азайгъанды»,-дегенди ол.
Роспотребнадзорну КъМР-де Управлениясыны 9 февральгъа шартларына кёре республикада коронавирус 19 541 адамгъа жукъгъанды, аладан 18226 сау болгъандыла, 349 адам ауушханды. Бу кезиуде 423 минг тест бардырылгъанды. Бюгюнлюкде госпитальлада медицина болушлукъ 620 пациентге бериледи, аладан 52-си реанимация бёлюмдедиле.
КъМР-ни баш санитар врачы Жирослан Пагов жууукъ кезиуде эпидемиология болум тапланырыгъын чертгенди. Ол вакцинация бардырылгъаны бла байламлыды. Ол вузланы бла колледжлени студентлери очно халда окъуп башлагъанларына да къарамай, ауругъанланы саны азайып баргъанын белгилегенди. Болсада пандемия бла байламлы кийирилген чеклени кетерирге ашыкъмазгъа чакъыргъанды. Ол санда жамауатны асламыны къатышыуу бла жыйылыуланы бардырмазгъа кереклисине эс бургъанды.
Казбек Коков жукъгъанланы саны азая баргъаны бла бирге медицина тестлени кёбейтирге кереклисин айтханды. Ол а вирусну женгил, аны ышанлары билинмей ауругъанланы ачыкъларгъа онг берликди.
КъМР-ни саулукъ сакълау министерствосу белгили этген шартлагъа кёре, республикада беш госпиталь ишлейди, алада 931 жер барды, ол санда 652-си кислород, 113-сю уа ИВЛ-аппаратла бла жалчытылыныпдыла. Коронавирус жукъгъан аурууну диагностикасы эм багъыу жаны бла амбулатория аралада 4025 адам медицина болушлукъ алгъандыла.
Кеслерине амбулатория халда бакъгъан пациентле дарманла бла хакъсыз жалчытылынадыла. 2020 жылда июньдан бери дарман 23 962 адамгъа берилгенди. Республиканы Башчысы саулукъ сакълау министрге кеслерине юйде бакъдыргъан саусузланы керекли дарманла бла жалчытыуну контрольда тутаргъа буюргъанды.
Казбек Коков иммунизацияны сорууларына энчи эс бургъанды. Ол власть органланы келечилерине вакцинация бийик даражада къуралыргъа кереклисин эсгертгенди. «Вакцинация бардырылса, адамланы асламыны ауруугъа иммунитетлери къуралса, ма ол заманда жашау алгъын ызына къайтып, экономика ишлеп башларыкъды»,-дегенди ол.
Республикада 5151 адам вакцинаны салдыргъандыла, битеу да бирге 12 652 дарман берилгенди. Вакцинация бардырылырча 49 жер къуралгъанды. Организациялада уа уколну медицина бригадала келип саладыла.