КъМР-ни Парламентинде депутатла эмда законла чыгъарыучу органны Аппаратыны келечилери коронавирусха къажау «Гам-Ковид-Вак» дарманны салдыргъандыла. Аланы бир къаууму вакцинаны алгъаракълада этдиргендиле. Аланы арасында спикерни орунбасары Жанатайланы Салим да. «Врачла бла кенгешгенме, ала коронавирусха къажау дарманны этдирип, саулугъума къайгъырмай жашаргъа боллугъун билдиргендиле. Алагъа ышанып, айтханларын этгенме. Уколну биринчи кесегин КъМР-ни Правительствосуну башчысыны орунбасары Муаед Кунижев бла бирге 12 декабрьде салдыргъанма.
Бир затым да къыйнамагъанды. Ызы бла 3 январьда уколну экинчи кесегин этдиргенме. Медиклени эсгертиулерин толтургъанма, алай бла дарман мени къыйнамагъанды.
Ал кезиуде, шёндю да саулугъум тапды. Эки ыйыкъдан анализле бергенме, алагъа кёре санларым вирусха зарансыз тюберге хазырдыла. Вакцина – ата журтлу медицинада артыкъда магъаналы жетишим болгъанын айтыргъа сюеме.
Коронавирусха къажау дарманны салдыргъанла тюз сайлау этедиле. Аны ючюн республиканы инсанларын, саулукълары къоя эсе, уколну этдирирге чакъырама», -дегенди Жанатайланы Салим.
Жамауат къоркъуусузлукъ эм коррупциягъа къажау комитетни башчысы Михаил Кривко уа дарманны ол кюн Парламентде салдыргъанды.
-Вакцина хазыр болгъаны белгили этилгенлей, аны салдырыргъа кереклисине тюшюннгенме. Дарман республикагъа келтирилирин сакълап тургъанма. Хар адам да вакцинациядан ётерге керекди. Ол кесибизни, жууукъларыбызны, тенглерибизни алларында жууаплы сайлауду, -дегенди депутат.
Парламентарийлеге КъМР-де Адамны эркинликлери жаны бла уполномоченный Зумакъулланы Борис да къошулгъанды. «Россейде халкъгъа дарманны салдырыу бардырылгъаны къууандырады. Бизни дарманнга ышанама - аны ата журтлу медицина академияны алимлери хазырлагъандыла. Уколну этдирирге неда къалыргъа деген ишеклик ахырда болмагъанды.
Парламентде вакцина салдыргъан пункт къуралгъанын билгенлей, очередьге жазылып, бери келгенме. Барыбыз да бу атламны этерге борчлубуз. Къоркъуп, бугъунуп турургъа жарамайды, уколну салдырып, жашауну андан ары бардырыргъа тийишлиди»,-дегенди Зумакъулланы Борис.
Алгъаракълада соруу бардырылып, «Спутник-V» дарманны салдырыргъа сюйгенлени тизмеси къуралгъан эди. Бу уколну сайлагъанла да аз болмагъандыла. Нальчикни 3-чю номерли поликлиникасыны терапевти Амина Шогенова дарманны юсюнден айтханды, аны не кезиуде салдырыргъа жарамагъанын да ангылатханды,
Прививканы аллында уа уколну салдырыргъа сюйгенле медицина тинтиуледен ётгендиле: аланы къан басымларын ёнчелегендиле, юслеринден кетмеген ауруулары болгъанын бла къалгъанын соргъандыла. Вакцинаны экинчи кесегинден ала 21 кюнден ётерикдиле.
