Россейни Правительствосуну Председателини орунбасары Марат Хуснуллин видеоконференция халда Россей Федерацияда Регионланы айнытыу жаны бла правительстволу комиссияны президиумуну жыйылыуун бардыргъанды. Аны ишине Къабарты-Малкъарны Башчысы Казбек Коков да къатышханды. Анда 2020 жылда ырахат шахар болумланы къурау регион проектлени бардырылыуларыны эсеплери, келлик жылгъа планла да сюзюлгендиле.
Къабарты-Малкъарда былтыр 39 жашау тийреде 122 арбаз тапландырылгъанды (планда 177 белгиленип эди) эм 34 жамауат кенглик. Къуралгъан экономияны хайырындан муниципал контрактланы тохташдыргъанда къошакъ халда 5 арбаз тапландырылгъанды.
КъМР-ни «Шёндюгюлю ырахат шахар болумланы къурау» къырал политикасыны ырысхы бла жалчытылыныуу 248 миллион сомдан артыкъ болгъанды. Битеу ишле заманында толтурулгъандыла.
Бахсанда жангы паркны тапландырыу да ахырына жетгенди. Аны салыугъа 85 миллион сомну Бахсан районну административ арасы гитче шахарлада ырахат болумланы къурау жаны бла эм иги проектлерини Битеуроссей конкурсунда хорламы ючюн алгъанды. Объектни уллулугъу 26 гектарды.
2020 жылда ырахат шахар болумланы къурау жаны бла эм иги проектлени IV Битеуроссей конкурсуну «Гитче шахарла» бёлюмюне дагъыда Чегем шахарны заявкасы да тюшгенди. Чегемге бюджетле аралы башха трансфертлени ёлчеми 50 миллион боллукъду.
Бусагъатда Россейни Минстроюну бла Къабарты-Малкъарны араларында жумушланы толтуруу низамгъа къол салыннганды, ол санда проектированияны юсюнден информация, къурулуш (ремонт, жангыртыу) эм тынгылы къурулуш объектлени хайырланыугъа бериу жаны бла къошулгъанлагъа да. Графикге тийишлиликде «Чегем – Паркны» къурау бла байламлы проект документация жарашдырылгъанды.
«Шёндюгюлю ырахат шахар болумланы къурау» регион проектни 2021 жылда жашауда бардырыугъа КъМР-ни 40 муниципал къуралыуу къатышырыкъды. Планнга 31 жамауат кенгликни эм 89 арбаз тийрени тапландырыу салыннганды. Бюгюнлюкде муниципалитетле 2021 жылда ишлени бардырыу контрактлагъа къол салыуну тамамлап бошайдыла.
Жыйылыуну чегинде 2020-2021 жыллада жылыу берген кезиуню къалай ётгенине къаралгъанды. «Саулай алып айтханда, къышны эки айы тап халда озгъандыла, алай авария болумла да жерлерин тапхандыла. Субъектлени башчыларына аллай кезиуледе сакъ болгъанлары ючюн ыразылыгъымы билдирирге сюеме, авария болумланы эм чурумланы кетериуде орталыкъ заман кёрюмдю сагъатдан азды», - дегенди Хуснуллин Регионланы айнытыу жаны бла правительстволу комиссияны президиумуну жыйылыуунда.