Къабарты-Малкъарны Парламентини депутаты, «Ленинцы» эл мюлк кооперативни башчысы Владимир Бердюжа бла Май районну жер-жерли администрациясыны таматасы Татьяна Саенко Ново-Ивановское элде ишлене тургъан жангы школгъа къарагъандыла.
Бюгюнлюкге аны  мекямы толусунлай хазырды. Шёндю аны ичинде сюртюу-бояу ишле бардырыладыла. Специалистле жылыу бла жалчытхан системаны орнатхандыла, суу  быргъыланы да тартхандыла.
Подряд организацияны келечиси Виктор Костин къонакълагъа мекямны ичин кёргюзтгенди. Районну башчысы аны отоулары, спорт эмда актовый заллары эркин болгъанларын белгилегенди, ашханагъа, кабинетлеге, школну саулай архитектурасына бийик багъа бергенди.
Владимир Бердюжа оюм этгенича, школ битсе, ары жаланда элни сабийлери угъай, шахардан да келирге сюерикдиле. Аны себепли  билимли педагогланы чакъырыуну къайгъысын да этерге керекди.
КъМР-ни Башчысы Казбек Коков былтыр районда болгъан кезиуюнде Ново-Ивановское элде 440 жерли школ сюерге кереклисин чертгенди. Проект-смета документацияны жарашдырыу эмда аны къырал экспертизагъа жибериу къоранчланы толусунлай республиканы бюджети жалчытханды. Къурулушу уа «Шимал Кавказ федерал округну айнытыу»  къырал программаны чеклеринде бардырылады. Анга битеу да 342 миллион сом къоратыллыкъды. Айтханларына кёре объект быйыл июльда хазыр боллукъду.