Быйыл мартда Къабарты-Малкъарны таматаларыны башламчылыгъы бла «Нальчик — Саратов — Нальчик» тюзюнлей жангы авиарейс ачыллыкъды. Ол ыйыкъгъа эки кере къураллыкъды. Аны «PegasFly» бла байламлыкъда «Nordwind Airlines» компания тамамларыкъды.
«Нальчик» аэропортну коммерциялы таматасыны къуллугъун толтургъан Ислам Шомахов айтханнга кёре, жерлешлерибизни арасында бардырылгъан соруугъа кёре, Самарадан эсе Саратов шахаргъа бюсюрегенле кёп болгъандыла.
-Аланы сайлауларын ангыларчады. Саратовну билим бериу учрежденияларында бизни республикадан аслам адам окъуйду. Андан сора да, Элбрусда бла санаторийлерибизде солургъа андан иги кесек къонакъ келеди,- деп къошханды ол.
Бусагъатда Къабарты-Малкъарда жашагъанлагъа Саратовха барыр ючюн Ставрополь крайда автобусха неда поездге минерге тюшеди. Ислам Шомахов, быйыл мартны ахырында Нальчикден Санкт-Петербургга рейслени жангыртырча мурат этилгенин да билдирип, Нальчикден Москвагъа «Аэрофлот», «Победа» эм «Якутия» авиакомпанияланы самолётлары бла учаргъа онг тапдырылгъанын да эсгертгенди.
