КъМР-ни Парламентини спикери Татьяна Егорованы башчылыгъында законла чыгъарыучу органны президиумуну жыйылыуу ётгенди. Кенгеш эпидемиология излемле сакъланып бардырылгъанды.
Депутатла КъМР-ни Административ бузукълукъланы кодексине тюзетиулени сюзгендиле. Профильли комитетни башчысыны орунбасары Ахмед Есенкуловну айтханына кёре, документде сёз федерал законлагъа тийишлиликде терроризмге къажау муниципал комиссияла чыгъаргъан оноуланы толтурмагъанланы административ жууапха тартыуну юсюнден барады.
«Бир-бир республикалы законлагъа тюзетиуле кийириуню эмда «КъМР-де жашау этерге жетерик ахчаны эм аз ёлчемини юсюнден» закон кючюн тас этгенини юсюнден» республикалы законнга да къаралгъанды. Ол 2020 жылда 29 декабрьде «РФ-ни бир-бир законларына тюзетиуле кийириуню юсюнден» Федерал закон кючюне киргени бла байламлы хазырланнганды.
Урунуу, социал политика эм саулукъ сакълау комитетни башчысы Хусейн Кажаровну айтханына кёре, федерал закон субъектлеге инсанлагъа жашау этерге жетерик ахчаны эм аз ёлчемин тергеу жаны бла полномочиялары кетерилгендиле. Энди аны низамын РФ-ни Правительствосу тохташдырлыкъды.
-Дагъыда социал тёлеуле хар кварталдан жашау этерге жетерик ахчаны эм аз ёлчемине кёре тохташдырылгъан республикалы законла да тюзетиледиле,-дегенди ол.
Жыйылыуда депутатла федерал законланы проектлерин сюзгендиле, башха субъектледе коллегаларыны законодательный башламчылыкъларына къарагъандыла. Алада сёз эл мюлк жерлени сатыу-алыуну, пенсияланы тохташдырыуну, билим бериуню юслеринден баргъанды.