КъБР-м и Парламентым и УнафэщI Егоровэ Татьянэ зи чэзу зэIущIэр иджыблагъэ иригъэкIуэкIащ. «Правительствэм хухах сыхьэтым» хыхьэу, депутатхэр едэIуащ афиянымрэ фадэмрэ дихьэхахэм Къэбэрдей-Балъкъэрым зэращыдэIэпыкъум теухуауэ КъБР-м узыншагъэр хъумэнымкIэ и министр Къалэбатэ Рустам ищIа докладым.
Къэпсэлъам зэрыжиIамкIэ, узыншагъэр хъумэн IэнатIэм зегъэужьыным тещIыхьа къэрал программэм къыщыгъэлъэгъуахэр ягъэзэщIэн папщIэ, республикэм щолажьэ «Наркотик лIэужьыгъуэхэмрэ цIыхум и акъылыр зыгъэутхъуэ нэгъуэщI пкъыгъуэхэмрэ зэрызрахьэлIэмрэ апхуэдэхэр хабзэм къемызэгъыу зэрызэбграгъэкIымрэ пэщIэтыным хуэунэтIа Iуэхугъуэ хэхахэр» гуэдзэныр.
А Iуэхур зи нэIэ щIэт IуэхущIапIэхэм я лэжьыгъэр псом япэу зыхуэунэтIар акъылыр зыгъэутхъуэхэр ерыщу зэзыхьэлIэхэм я бжыгъэр нэхъ мащIэ зэращIынырщ, къищынэмыщIауэ, афияныншэу мыпсэужыф цIыхухэм ират дэIэпыкъуныгъэм и фIагъым зэрыхагъэхъуэнырщ.
Къалэбатэ Рустам къытеувыIащ дэIэпыкъуныгъэр зэрырат Iуэхугъуэ нэхъыщхьэхэм: наркотик лIэужьыгъуэхэр ерыщу зэзыхьэлIэхэм япэщIэтынымкIэ яубзыхуа Iэмалхэм, а Iуэхум тещIыхьауэ лажьэ диспансерым игъэзащIэ къалэнхэм. Апхуэдэуи министрыр тепсэлъыхьащ щIыналъэ IуэхущIапIэхэмрэ зэгухьэныгъэхэмрэ щIалэгъуалэм драгъэкIуэкI лэжьыгъэм.
Апхуэдэ дэIэпыкъуныгъэхэр республикэм щагъуэт КъБР-м Узыншагъэр хъумэнымкIэ и министерствэм епха Наркологие диспансерымрэ (гъуэлъыпIэ 200-м тещIыхьащ) район сымаджэщ нэхъыщхьэхэм психиатр-наркологхэм щаIэ кабинет 12-мрэ. Фадэм, наркотикым, химие, хущхъуэ лIэужьыгъуэ хэхахэм ирисымаджэхэм якIэлъоплъ лэжьакIуэ 400-м щIигъу. Сымаджэщым къыщахутэ цIыхум и Iэпкълъэпкъым фадэ е акъылыр зыгъэутхъуэ нэгъуэщI пкъыгъуэхэм щыщ хэтрэ хэмытрэ. Абдеж иджырей мардэхэм тету сымаджэхэм щоIэзэ икIи зыхуей Iэмэпсымэхэр щIэтщ.
Республикэм и наркологие IэнатIэм медицинэ дэIэпыкъуныгъэ псори къызэщIеубыдэ: сымаджэхэм амбулаторнэуи якIэлъоплъ, сымаджэщми ягъэгъуэлъыну Iэмал щыIэщ, апхуэдэуи я узыншагъэр щрагъэфIэкIуэж IуэхущIапIэ мэлажьэ.
Къалэбатэм къыхигъэщащ психиатр-нарколог дохутырхэм я бжыгъэр иужьрей илъэсхэм хэпщIыкIыу нэхъыбэ зэрыхъуар. Абы сэбэп хуэхъуа щхьэусыгъуэхэм ящыщ зыщ дохутыр IэщIагъэм хуеджэ студентхэм зэрызыщIагъакъуэр. Апхуэдэу, 2019 гъэм федеральнэ еджапIэхэм епха клиникэ ординатурэмрэ КъБКъУ-м и «Психиатрия - наркология» унэтIыныгъэмрэ IэщIагъэлIи 6 программэ хэхакIэ щIагъэтIысхьащ, ахэр къаухмэ, республикэм и медицинэ IуэхущIапIэхэм щылэжьэну ягъэувыну.
Мы зэманым район сымаджэщ нэхъыщхьэ псори медицинэ лэжьакIуэхэмкIэ къызэгъэпэщащ, Бахъсэн къалэ округым, Бахъсэн муниципальнэ щIыналъэм, Зеикъуэ къуажэм я сымаджэщхэм къищынэмыщIа. Абыхэм я психиатр-наркологхэм лэжьыгъитI зэдахьу аращ. Медицинэ лэжьакIуэхэр гъэхьэзырынымрэ я Iэзагъэм храгъэгъэхъуэнымкIэ республикэм лэжьыгъэ купщIафIэ щрагъэкIуэкI «Къуажэ дохутыр» программэм ипкъ иткIэ.
Дохутыр психиатрхэм мыхьэнэшхуэ зиIэ къалэн куэд зэфIагъэкIын хуейщ, республикэм и диспансерым и учётым мин бжыгъэхэр щытщи. 2020 гъэм сымаджэхэр 6572-рэ хъууэ щытащ (2019 гъэм - 6676-рэ). Абы щыщу наркотикым ирисымаджэхэр цIыху 820-рэ мэхъу, фадэм дихьэхахэр - 5444-рэ, токсикоманием - 72-рэ. Я узыншагъэм зэраныгъэшхуэ хуэхъужу егъэлеяуэ а щхъухьхэр зэрызрахьэлIэм къыхэкIыу 2020 гъэм учётым ягъэуващ цIыху 1502-рэ. Сымаджэхэм я нэхъыбэм зрахьэлIэр афиянрауэ ятх (процент 44,6-м).
Къалэбатэ Рустам тепсэлъыхьащ цIыхухэм я узыншагъэр зэрырагъэфIэкIуэж дэIэпыкъуныгъэр зыхуэдэм, щхьэхуэу къытеувыIащ наркологие IэнатIэм балигъ ныбжьым нэмысахэмрэ щIалэгъуалэмрэ ядригъэкIуэкI профилактикэ лэжьыгъэм.
ЦIыхум наркотикрэ нэгъуэщI пкъыгъуэхэмрэ зрихьэлIэн щыщIидзагъащIэм деж ар къахутэн щхьэкIэ КъБР-м Узыншагъэр хъумэнымкIэ и министерствэм зэпымыууэ лэжьыгъэ ирегъэкIуэкI. 2019 гъэм и фокIадэм къыщыщIэдзауэ 2020 гъэм и гъатхэпэ пщIондэ школхэм щеджэхэмрэ курыт IэщIагъэ зэзыгъэгъуэтхэмрэ ящыщ цIыху 4380-м якIэлъыплъащ. 2020 гъэм апхуэдэ къэхутэныгъэм пхыкIащ балигъ ныбжьым нэмысауэ 3250-рэ.
Къалэбатэм къыхигъэщащ гугъуехь зыбжанэми ахэр зэрыIууэр - адэ-анэ псори занщIэу арэзы хъуркъым я быным я узыншагъэр абы и лъэныкъуэкIэ кърагъэпщытэну. АрщхьэкIэ психиатр-наркологым Iуэхур зытетыр къагуригъэIуа нэужь, къэхутэныгъэхэм пащэ.
Наркологие IэнатIэм и гугъуехь нэхъыщхьэхэр зэпхауэ министрым къилъытэр цIыхухэм щеIэзэ, щакIэлъыплъ IуэхущIапIэхэр къазэремэщIэкIырщ.
- Илъэс къэс ирагъэкIуэкI къэхутэныгъэхэм я бжыгъэри нэхъыбэ мэхъу, цIыхуу щызэблэкIми хохъуэ. Ауэ поликлиникэр, кабинетхэмрэ лабораторэмрэ здэщыIэ пэшхэр мардэхэм къезэгъыркъым, - къыхигъэщащ абы.
КъБР-м и Парламентым и УнафэщI Егоровэ Татьянэ упщIэ зыбжанэ министрым иритащ, афияным дихьэхахэр къызэрыщIагъэщ щIыкIэм, наркологие сымаджэщым зэуэ ягъэгъуэлъым и бжыгъэм, наркотикым дихьэха цIыхум зигъэхъужа нэужьи, абы и узыфэм къытригъэзэж къыщыхъум, балигъ ныбжьым нэмысахэм ящыщу зэ закъуэ наркотик лIэужьыгъуэ зэзыхьэлIам зэрыдэлажьэм, коронавирусым зыщиубгъуа зэманым диспансерым и Iуэхухэр зэрызэфIигъэкIым, нэгъуэщIхэми ятеухуауэ.
Наркологие диспансерым и дохутыр нэхъыщхьэ Удаловэ Ольгэ тепсэлъыхьащ IэщIагъэлIхэм я Iуэху бгъэдыхьэкIэм. Абы зэрыжиIамкIэ, щIалэгъуалэм наркотикым дихьэх яхэтрэ яхэмытрэ къащIэн мурадкIэ, школхэм анкетэ щрагъэтх. Абы наIуэ къещI гугъуехь щыIэхэр. Наркотикым дихьэхауэ щытам зигъэхъужа нэужь, абы и узыфэм къытригъэзэжынкIэ зэрыхъунум и гугъу щищIым, Удаловэм жиIащ ар цIыхум и узыншагъэр зыхуэдэм, апхуэдэуи наркотик зэрызрихьэлIа пIалъэм елъытауэ зэрыщытыр.
Апхуэдэуи абы къыхигъэщащ коронавирусыр къыщекIуэкI зэманым я лэжьэкIэр Iуэхугъуэ пыухыкIахэм тету зэрагъэбелджылар. Псалъэм папщIэ, пэшхэм цIыху бжыгъэ пыухыкIа фIэкIа щIагъэлъыркъым икIи дэтхэ-нэ сымаджэми Iэмал имыIэу ирагъэт коронавирус узыфэр пкърытрэ пкърымытрэ къэзыгъэлъагъуэ тестыр.
КъБР-м и Парламентым и УнафэщIым и къуэдзэ Жанатаев Сэлим къыхигъэщащ илъэс зыбжанэ ипэкIэ республикэм гугъуехьхэр зэрыщыIар, «Лирика», «Тропикамид» хущхъуэхэм хуэдэхэр хабзэм къемызэгъыу ящэу зэрыщытам къыхэкIыу.
КъБР-м и МВД-м Наркотикхэр зэрызэбграгъэкIым кIэлъыплъынымкIэ и управленэм мыхьэнэшхуэ зиIэ IуэхугъуэхэмкIэ и оперуполномоченнэ нэхъыщхьэ, полицэм и подполковник Давыдовэ Иринэ жиIащ 2020 гъэм Къэбэрдей-Балъкъэр Республикэм наркотик лIэужьыгъуэхэмрэ нэгъуэщI хущхъуэ гуащIэхэмрэ къызэрашэ Iэмал 37-рэ къызэрыщызэпаудар, абыхэм ящыщу 21-мкIэ «Лирика»-р зэбгрыкIырт. Аптекэхэр хуиткъым сымаджэм а хущхъуэр дохутырым хуимытхауэ иращэну. Ауэ наркотикым дихьэххэр иужь йохьэ абы ещхь нэгъуэщI хущхъуэхэр къащэхуну. Абы и лъэныкъуэкIэ иджыпсту лэжьыгъэ ирагъэкIуэкI.
Депутатхэр тепсэлъыхьащ наркологие сымаджэщым и унэр зэгъэпэщыжыныр щыIэ программэхэм хагъэхьэ зэрыхъуну щIыкIэм, IуэхущIапIэм къыIэрыхьэ ахъшэр зыхуэдэм, фадэр щыпкърагъэкIыж IэнатIэ республикэр хуэныкъуэрэ хуэмыныкъуэрэ. Апхуэдэуи къыхалъхьащ афиян зэзыхьэлIэхэм я бжыгъэр гъэмэщIэным хуэгъэза Iэмал зыбжанэ.
- СызэреплъымкIэ, адэ-анэхэмрэ егъэджакIуэхэмрэ нэхъыфIу дадэлэжьапхъэщ, сабийм къемызэгъыу зыгуэр япэу ищIэн щыщIидзэр къэтхутэфын щхьэкIэ. Ди жагъуэ зэрыхъунщи, абы и лъэныкъуэкIэ гугъуехьхэр, зэрыжаIащи, щыIэщ. Адэ-анэхэм къахуегъэкIуркъым апхуэдэ гугъуехь унагъуэм зэраIэр хэIущIыIу ящIыну. ИтIани, IуэхущIапIэ псори дызэкъуэувэу а Iуэхум делэжьын хуейщ, ди щIэблэр узыншэу къэтэджын папщIэ, - жиIащ Егоровэ Татьянэ зэIущIэр щызэхуищIыжым.