КъБР-м и Парламентым и УнафэщI Егоровэ Татьянэ дыгъэгъазэм и 29-м пресс-конференц иригъэкIуэкIащ. ЗэIущIэр къыщызэIуихым, псом япэу абы журналистхэм фIыщIэ яхуищIащ, республикэм и хабзэубзыху IэнатIэ нэхъыщхьэм и лэжьыгъэр цIыхухэм я деж жыджэру, зэхэщIыкIыгъуэу зэрынахьэсым папщIэ.
Япэ упщIэр зытеухуауэ щытар КъБР-м и Парламентым и депутат хэхыныгъэхэр зэрыщыIамрэ абы иджы япэу хыхьахэр Iуэхум хуэхьэзыру къызэрыщIэкIамрэт. Егоровэ Татьянэ жиIащ депутатхэм ягъэтIылъа лъабжьэм сыт щыгъуи хуэдэу зэрызрагъэужьыныр. КъБР-м и Парламентым и еханэ зэхыхьэгъуэм щыщ депутат 44-р щIэрыщIэу хахыжащ, 26-м мандатыр иджы япэу иратащ.
- Къыхэзгъэщыну сыхуейт законхэр убзыхуным ехьэлIа Iуэхухэм дяпэкIи зыхуей хуэгъэзауэ депутатхэр елэжьыну сызэрыщыгугъыр. Къыдгуэувахэр зэфIэкI зиIэ, щIэныгъэ куу зыбгъэдэлъ цIыхухэщ. Абыхэм яхэтщ узыншагъэр хъумэнымкIэ, щIэныгъэмкIэ, щэнхабзэмкIэ, спортымкIэ IэнатIэхэм я лIыкIуэхэр (ахэр процент 25-рэ мэхъу), хьэрычэт Iуэхум хэтхэр - проценти 8,6-рэ, юрист, экономист IэщIагъэхэр зиIэхэр - процент 46-м нэблагъэ, - жиIащ Егоровэм. - Депутатхэм я ныбжьыр ику иту къэбгъэлъагъуэмэ илъэс 54-рэ мэхъу, зи ныбжьыр илъэс 40-м фIэмыкIауэ цIыхуи 5 диIэщ. КъищынэмыщIауэ, мыхьэнэ мымащIэ иIэщ депутат цIыхубзхэм я бжыгъэми хуэмурэ зэрыхэхъуэм. Нобэ ахэр 14 хъуащ. Зэбгъапщэмэ, КъБР-м и Парламентым и еплIанэ зэхыхьэгъуэм цIыхубзу хэтар 9 къудейт.
Егоровэ Татьянэ къытеувыIащ 2020 гъэм КъБР-м и Парламентым и лэжьыгъэр коронавирусым земыгъэубгъуным тещIыхьауэ къызэрызигъэпэщам. Абы журналистхэм ягу къигъэкIыжащ блэкIа илъэсым жэпуэгъуэм и 3-м Къэбэрдей-Балъкъэрым и дежкIэ мыхьэнэшхуэ зиIэ Iуэхугъуэм депутатхэр зэрыхэтар икIи щIыналъэм и Iэтащхьэу къагъэлъэгъуа КIуэкIуэ Казбек псоми зэдэарэзыуэ зэрыдаIыгъар. Апхуэдэуи депутатхэм лэжьыгъэшхуэ ирагъэкIуэкIащ УФ-м и Конституцэм халъхьэ зэхъуэкIыныгъэхэм папщIэ урысейпсо IэIэтыр щрагъэкIуэкIами, псом хуэмыдэу абы и мыхьэнэр цIыхухэм гурагъэIуэным я лэжьыгъэр тещIыхьауэ щытащ.
- Нобэ ди къалэн нэхъыщхьэхэм ящыщщ УФ-м и Конституцэм халъхьа зэхъуэкIыныгъэхэм тету Къэбэрдей-Балъкъэрым и законодательствэр зыхуей хуэгъэзэныр. Шэч хэмылъу, мы гъэм ди лэжьыгъэм гугъуехьхэр хилъхьащ коронавирусым, ауэ абыи емылъытауэ, зэбгъэтIылъэкI мыхъуну унафэхэр псори къызэдгъэпэщыну тхузэфIэкIащ. Абы и лъэныкъуэкIэ икъукIэ къытхуэщхьэпащ видеоконференц мардэр къэдгъэсэбэпыныр. Ди иужьрей зэхыхьэгъуэм лэжьэн зэрыщIидзэрэ Парламентым и зэIущIэу 20 едгъэкIуэкIащ. Абыхэм Iуэхугъуи 180-м щIигъу дыщыхэплъащ, норматив акту 80-м щIигъу (76-р закону) къыщытщтащ, – дыщIигъуащ Егоровэм.
Республикэм и хабзэубзыху орган нэхъыщхьэр коронавирусым пэщIэтынымрэ дохутырхэм защIэгъэкъуэнымрэ ехьэлIа лэжьыгъэхэми хэтащ. «Къыхэзмыгъэщу къэзгъэнэфынукъым депутатхэм дэIэпыкъуныгъэ хуэныкъуэу зыкъыхуэзыгъэзахэр зыри зэрамыгъэщIэхъуар», - жиIащ Егоровэ Татьянэ.
КъБР-м и Парламентым и еханэ зэхыхьэгъуэм къищта закон нэхъыщхьэ дыдэхэм щытепсэлъыхьым, Егоровэм къыхигъэщащ коронавирусыр нэхъыбэу зэран зыхуэхъуа хьэрычэтыщIэхэм ят налогхэр зэрыхуагъэмэщIар. КъищынэмыщIауэ, хьэрычэтыщIэу япэу зезыгъэтххэм налог емыгъэтыныр зытещIыхьа пIалъэр 2024 гъэ пщIондэ ягъэIэпхъуащ.
- Шэч хэмылъу, ди Iуэхугъуэ нэхъыщхьэр сыт щыгъуи Къэбэрдей-Балъкъэрым и бюджетыр илъэс къэс къызэрытщтэм епхащ. Нэхъапэхэми хуэдэу, къэкIуэну илъэсми ар социальнэ Iуэхухэм нэхъыбэу тещIыхьауэ щытынущ - процент 70-м щIигъукIэ. Къэбгъэлъагъуэмэ, 2021 гъэм щIыналъэм и бюджетым и хэхъуэр сом мелард 43,7-рэ хъуну траухуэ, къигъэсэбэпыну зыхуеинур сом мелард 44,8-м ноблагъэ, - къыхигъэщащ Егоровэм. - УФ-м и Президент Путин Владимир Урысей Федерацэм и Федеральнэ Зэхуэсым Зэрызыхуигъэзам къыщыхилъхьауэ щытащ сабий зиIэ унагъуэхэм зэрызащIэдгъэкъуэн хуей Iэмалхэр икIи а пщэрылъыр КъБР-м и Парламентым жыджэру игъэзэщIащ. Псалъэм папщIэ, 2020 гъэм щIышылэм и 1-м щегъэжьауэ дгъэбелджылащ ещанэ сабийрэ къыкIэлъыкIуэхэмрэ къызыхэхъуэ унагъуэхэм мазэ къэс цIыхур ирипсэун папщIэ нэхъ мащIэ дыдэу зыхуейм хуэдиз зэреттынур.
Егоровэ Татьянэ щапхъэу къихьащ зи ныбжьыр илъэси 3-м къыщыщIэдзауэ 7-м нэс хъу сабийхэм ахъшэ зэрыхухах щIыкIэм, мэкъумэшым ехьэлIа щIыр къызэрагъэсэбэпыпхъэм, акъылыр зыгъэутхъуэхэр емыгъэщэным, нэгъуэщIхэми теухуа законопроектхэркъызэращтар.
- Федеральнэ законхэм щелэжьым дэри ди зэфIэкI абы зэрыхэтлъхьэным жыджэру дыхущIокъу. Абы и лъэныкъуэкIэ ди щIэгъэкъуэнщ Къэбэрдей-Балъкъэрым къыбгъэдэкIыу УФ-м и Къэрал Думэм хэтхэр. Къэбгъэлъагъуэмэ, КъБР-м и Парламентым и етхуанэ, еханэ зэхыхьэгъуэхэм УФ-м и Къэрал Думэм ягъэхьа законодательнэ жэрдэму 26-м ящыщу 10-р федеральнэ закон хъуащ, 3-м хоплъэ. Абы щыгъуэми иужьрейм щыщу 2-р япэ еджэгъуэм къащтащ. Аращи, УФ-м и Къэрал Думэм халъхьэ жэрдэмхэм я фIагъкIэ ди хабзэубзыху IэнатIэ нэхъыщхьэр Уры- сейм щыпашэхэм ящыщ зыщ, - дыщIигъуащ КъБР-м и Парламентым и УнафэщIым.
Егоровэ Татьянэ къыхигъэщащ республикэм и хабзэубзыху орган нэхъыщхьэм я гугъуехьхэмкIэ зыкъыхуэзыгъазэ цIыхухэм ядэлэжьэныр я къалэн нэхъыщхьэхэм ящыщу къызэрилъытэр.
- Тхьэмахуэм зэ, мэрем махуэр хэтхауэ, депутатхэр районхэмрэ къалэхэмрэ макIуэ хэхакIуэхэм яIущIэну, упщIэ яIэмэ едэIуэну. Мы гъэм, дауи, лэжьыгъэм и нэхъыбэр цIыхухэм япэщIэхауэ къызэдгъэпэщын хуей хъуащ, ауэ абы щхьэкIэ къэдгъэнакъым цIыхухэм зыкъызэрытхуагъэза тхыгъэхэм жэуап едмыту - а лэжьыгъэр телефонкIэ, видеозэпыщIэныгъэкIэ къызэдгъэпэщащ. Нэхъыбэу зыкъызэрытхуагъазэр лэжьапIэ зэрамыгъуэтымкIэщ, унэ зэрамыIэмкIэщ е псэупIэ-коммунальнэ IэнатIэм ягъэув уасэхэм арэзы къызэрамыщIымкIэщ. Ахэр Парламентым и къалэну щымытми, дэ дыхущIокъу ар зи пщэрылъ IэнатIэхэм зэхагъэкIын папщIэ захуэдгъэзэну, - жиIащ къэпсэлъам.
Егоровэ Татьянэ дыщIигъуащ депутатхэм Хэку зауэшхуэм и ветеранхэмрэ социальнэ IуэхущIапIэу 6-м щыIэ сабийхэмрэ я нэIэ зэрытрагъэтыр, ехъулIэныгъэ зиIэ ныбжьыщIэхэм, сабий зеиншэхэм, щытыкIэ гугъу ихуахэм «Урысейм дрицIыхущ» Iуэхум хыхьэу, я дэфтэр нэхъыщхьэр - паспортыр - КъБР-м и Парламентым ирагъэблагъэурэ зэрыратыр.
Журналистхэм гулъытэ хуащIащ КъБР-м и Парламентым и УнафэщIыр илъэситху хъуауэ Европэм и Советым и щIыпIэ, щIыналъэ унафэщIхэм я конгрессым (Страсбург щекIуэкIым) Урысейм и лIыкIуэхэм я гъусэу зэрыхэтымрэ иджыри апхуэдиз пIалъэкIэ абы зэрыхагъэхьамрэ. Егоровэ Татьянэ жиIащ а пщэрылъым пщIэшхуэ зэрыпылъыр икIи жэуаплыныгъэ ин ихьыр зэрызыхищIэр.
- КъБР-м и Парламентым и еханэ зэхыхьэгъуэм щыIа ЩIалэгъуалэ палатэм и лэжьыгъэр иджыблагъэ къызэщIэткъуэжащ. Къэбгъэлъагъуэмэ, ар къызэрыунэхурэ блэкIа илъэс 12-м купщIэ зиIэ IэнатIэу зыкъигъэлъэгъуащ икIи щIалэгъуалэ 300-м щIигъу абы кIуэцIрыкIащ. Ди гуапэ зэрыхъунщи, илъэс къэс а Iуэхум хыхьэну гукъыдэж зиIэхэм я бжыгъэм хохъуэ. ЩIалэгъуалэ палатэм хэта куэдым нобэ къулыкъу яIыгъщ, - къыхигъэщащ Егоровэм.
2021 гъэм КъБР-м и Парламентыр зэлэжьынухэм я гугъу щищIым, Егоровэ Татьянэ жиIащ УФ-м и Конституцэм халъхьа зэхъуэкIыныгъэхэм тету КъБР-м и Конституцэмрэ республикэ законхэмрэ зэрызэрагъэзэхуэжынур, къищынэмыщIауэ, адрей илъэсхэми хуэдэу, цIыхухэм лэжьыгъэрэ социальнэ IуэхухэмкIэ я хуитыныгъэхэр хъумэнымкIэ депутатхэр дэIэпыкъуэгъу зэрахуэхъунур.
ЗэIущIэм и кIэухым Егоровэ Татьянэ журналистхэм фIыщIэ яхуищIащ икIи ИлъэсыщIэм узыншагъэрэ ехъулIэныгъэрэ яIэну ехъуэхъуащ.