КъМР-ни Парламентини депутатлары законла чыгъарыучу органны спикери Татьяна Егорова бла бирге «Тилеклени назысы» битеуроссей жандауурлукъ акциягъа къошулгъандыла. Ала, 200 жашчыкъны бла къызчыкъны тилеклерин толтуруп, жангы жылгъы саугъала этерикдиле.
Назы терек Правительствону юйюнде орналыпды. Депутатла анда болгъан открыткаладан кеслерине сайлагъандыла. Алада уа республиканы социал учрежденияларында окъугъан, саулукъларына кёре чекленнген онглары болгъан, кёп сабийли, къолайсыз юйюрледе ёсген жашчыкъла бла къызчыкъла Жангы жылгъа къаллай саугъа сюйгенлерин жазгъандыла.
- Депутатла бу сейир акциягъа сюйюп къатышадыла. Ёксюз сабийле ёсген учреждениялагъа шеф болушлукъ этиу, саулукълары осал сабийлеге къонакъгъа барыу ахшы тёреледиле. Быйыл къыйын болгъанды, сабийлени тилеклерин аны ючюн бютюнда сюйюп толтурабыз. Аланы жюреклери жарысын. Быйыл, алгъынча, байрамла къураллыкъ тюйюлдюле, алай саугъала сабийлени къууандырырла деп бек ышанама. Жангы жыл сабийле, таматала да бирча сюйген, жарыкъ, ышаныуладан толу байрамды,-дегенди Татьяна Егорова.
Парламентни спикери уа юч сабийни тилегин толтурлукъду: Эльдар Кардановну, Виктор Беловну эм Омран Паунежевни. Депутатла открыткалада жазылгъан тилеклени жылны ахырына дери тамам этерикдиле.