Урысей Федерацэм и Президент Путин Владимир, хабзэ зэрыхуэхъуам тету, илъэсыр зэрекIуэкIар къыщапщытэж зэIущIэ ин журналистхэм ядригъэкIуэкIащ.
Мы гъэм пандемием дызригъэува щытыкIэ гугъум къыхэкIыу, пресс-конференцыр онлайн жыпхъэм иту екIуэкIащ. УФ-м и Президент Путин Владимир къыздипсэлъыкI Ново-Огаревэ хэщIапIэм щIэсахэм нэмыщI, журналистхэр СатумкIэ дунейпсо центрым щызэхуэсащ, Урысей Федерацэм и федеральнэ округым ис журналистхэм я упщIэхэр къали 8-м къратыкIащ, къищынэмыщIауэ, Москва щылажьэ Колл-центрым щызэхуахьэса упщIэхэри иратащ.
Дэ, Кавказ Ищхъэрэм и журналистхэр, Ставрополь къалэм дыщылэжьащ, Япэ каналым и корреспондент Краснов Павел Iуэхур зэригъакIуэу.
СыхьэтиплIрэ ныкъуэкIэ екIуэкIа зэIущIэм упщIэ зэмылIэужьыгъуэ куэд къыщаIэтащ. Ахэр теухуат къэрал кIуэцIым, къэрал щIыбым къыщыхъу-къыщыщIэхэм, экономикэм, егъэджэныгъэм, медицинэм. Ауэ, дауи, нэхъыбэр зыгъэпIейтейр 2020 гъэм коронавирус уз зэрыцIалэм къэралыр зэрыпэщIэтымрэ абы жылагъуэр щыхъума зэрыхъунумрэщ. Журналистхэр нэмысу къэнакъым Навальный Алексей, Сафронов Иван, Шамалов Кирилл, Фургал Сергей сымэ я Iуэхухэми.
Пресс-конференцыр къыщызэIуихым Путин Владимир жиIащ апхуэдэ жыпхъэм ит зэIущIэм мыхьэнэшхуэ зэрыритыр, къэралым щекIуэкI псоми я хъыбарыр и чэзум къыIэрыхьэ пэтми, Урысей Федерацэм ис цIыхухэм занщIэу ядэуэршэрыным нэхърэ нэхъ лъапIэ зэрыщымыIэр, псэукIэр ефIэкIуэн папщIэ ящIэн хуейуэ цIыхубэм къалъытэр зэхихмэ, зэригуапэр.
Пресс-конференцыр езыгъэкIуэкIа Песков Дмитрий япэ псалъэр лъигъэсащ Владивосток щызэхуэса журналистхэм ящыщ зым. Ди дежкIэ зэIущIэр сыхьэт 12-м щIидзами, КъуэкIыпIэ Жыжьэ федеральнэ округым зэманыр пщыхьэщхьэм щынэблэгъат. Магадан щыщ Щербаковэ Людмилэ щIэупщIащ псоми къатехьэлъа 2020 гъэр къэралым дежкIи гугъу дыдэт хьэмэрэ фIы гуэри хэта мы илъэсым жиIэри.
- ГъащIэр, дунейр зэрекIуэкIым хуэдабзэу фIыи, Iеи хэтащ мы илъэсым, - жиIащ Путиным. - Пэжщ, псори дызыгъэпIейтей гугъуехьщ коронавирус уз зэрыцIалэм къытхуихьа пандемиер. Ауэ абы щыты-кIэ гугъу иригъэувар Урысейм и закъуэкъым, атIэ дуней псор бэлыхь хидзащ. Узыншагъэр хъумэнымкIэ дунейпсо зэгухьэныгъэр щыхьэт зэрытехъуамкIэ, цIыху мелуан 70 Iууащ абы. Пандемием къытхуихьащ жыпхъэ пыухыкIахэр - къыщIэдгъэкIхэмрэ тщIыхэмрэ зэрыхэщIар, къэралхэм яхуедгъашэхэр нэхъ мащIэ зэрыхъуар, лэжьапIэ IэнатIэхэр зэрызэхуащIар, цIыхухэм я хэхъуэм зэрыкIэрыхуар. А псори къыщыхъуащ ди гъащIэм.
Ауэ а гугъуехьхэм дыпэлъэщын хуэдэу дыпэщIэуващ икIи зэпIэзэрыту къызыдонэкI. Зи экономикэ щытыкIэм иригушхуэ, зи медицинэр зи напщIэ телъ, псэукIэ тэмэм щызэтеухуа къэрал куэдым нэхърэ нэхъыфIу дыполъэщ дэ мы къытлъыкъуэкIа гугъуехьым. Дэ иджыпсту ди ВВП-м проценти 3,6-кIэ кIэрыхуащ, ар нэхъ мащIэщ Европэм, Евросоюзым хыхьэ къэралхэм, США-м яIэ хэщIыныгъэм нэхърэ. Промышленностым къыщIигъэкIыр проценти 3 хуэдизкIэ ехуэхащ, ар къэзышар щIыдагъэр щэным ехьэлIа Iуэхухэращ. Мэкъумэш IэнатIэм и гугъу пщIымэ, иужьрей илъэсхэм зиужь зэпытщ, иджыпстукIэ процент 1,8-рэ хэхъуэу диIэщ. Банкым мы гъэм хэхъуэу сом зы триллионрэ мелард 300-рэ иIэщ, ар щыхьэт тохъуэ финанс лъэныкъуэм зэрызиужьым. Улахуэхэр зэрыхэхъуар илъэсым и кIэм ирихьэлIэу процент 1,5-рэ хъунущ. Ауэ абы къикIыркъым цIыхухэм я хэхъуэр нэхъыбэ хъуауэ. Ди жагъуэ зэрыхъущи, хьэрычэтыщIэхэр мы гъэм гугъуехь зэрыхэхуам къыхэкIыу, цIыхухэм я хэхъуэр проценти 3-кIэ кIэрыхуауэ жыпIэ хъунущ.
Къэрал Iэтащхьэм жиIахэм къыхэщащ лэжьапIэншэхэм я бжыгъэр илъэсым и пэщIэдзэм проценти 4,7-рэ хъууэ щытамэ, иджы проценти 6,3-м зэрынэсар, ар илъэс къакIуэ ягъэзэкIуэжыну зэрамурадыр, Урысейм и бюджетым и процент 70-р щIыдагъэм къит хэхъуэм зэремыпхар, щIыдагъэмрэ газымрэ дяпэкIэ куэд елъытауэ зэрыщымытынур, къэралым телъ щIыхуэм доллар меларди 10 зэрыхэщIар, нэгъуэщIхэри.
ДызыхуэкIуэ илъэсым екIуэкIыну хэхыныгъэхэм нэгъуэщI къэралхэр къыхэIэбэнкIэ зэрыхъунум щытепсэлъыхьым, Президентым жиIащ Урысейм исхэр хэ-ту, я фIэщ хъууэ, кърикIуэнум пщIэ хуащIу хэхыныгъэр екIуэкIыныр езым и дежкIэ зэрынэхъыщхьэр. США-м щекIуэкIа президент хэхыныгъэхэм Урысейм и Iуэху зэрыхимылъхьар, абы теухуауэ ягъэхъыбар псалъэмакъхэр ди къэралитIыр зыщызыгъэIеину хуейхэм къагупсысу зэрыарар къыхигъэбелджылыкIащ Путиным. Президентым къыхигъэщащ къэралитIым я зэхуаку дэлъ гугъуехь куэд Байден Джо зэфIихыну зэрыщыгугъыр, апхуэдэуи жиIащ Трамп Дональд и къэралым Iулыджышхуэ зэрыщиIэр, абы америкэ политикэ гъащIэм хэкIыжыну зэрызимыгъэхьэзырыр.
Украинэмрэ Урысеймрэ я зэхущыты-кIэм теухуа упщIэм и жэуапу Путин Владимир жиIащ ар Киев и Iуэху зехьэкIэм куэдкIэ елъытауэ зэрыщытынур, Минск зэгурыIуэныгъэхэм зэхъуэкIыныгъэхэр дяпэкIэ хэплъхьэжыныр къызэремызэгъыр, абы дунейпсо законым и къару зэриIэм къыхэкIыу.
2024 гъэм екIуэкIыну президент хэхыныгъэхэм езыр хэтынрэ хэмытынрэ иджыри зэрытримыухуар, ауэ, Конституцэм халъхьа зэхъуэкIыныгъэхэм папщIэ Iэ зэраIэтам къыхэкIыу, цIыхухэм абыкIэ хуит къызэращIар къыхигъэщащ къэрал Iэтащхьэм. Къэрал унафэщIхэм я зэхущытыкIэм щытепсэлъыхьым Урысейм и Президентым жиIащ лIыщхьэхэр цIыхуфIрэ цIыху IейкIэ зэрызэхимыгъэкIыр, Урысейм и фейдэ къыпэкIуэну щытмэ, хэти дэлэжьэну зэрыхьэзырыр. Мыбдежым Президентыр къытеувыIащ Тыркум и УнафэщI Эрдогъан Реджеп Тайипрэ езымрэ я еплъыкIэхэр щызэтемыхуэ куэдрэ къызэрыхъум.
Путиным кърата упщIэхэм ящыщ зым жэуап щритым жиIащ Урысейм и къуажэ псоми газыр еужьэрэкIыу зэрынагъэ-сыр, 2025 гъэм ирихьэлIэу ар жылэхэм я процент 90-м зэралъэIэсынур.
Къэрал гъунапкъэхэр щызэIуахыжынум щIэупщIам жэуап щритыжым, Президентым жиIащ дохутырхэм я хуитыныгъэ къазэрыIэрыхьэу ар хуит зэрыхъужынур. Путиным зэрыжиIамкIэ, урысей туристхэм хамэ къэралхэм доллар мелард 35-рэ щагъэкIуэд, ар къэралым къинэжу щытамэ, фейдэ хъарзынэ къыпэкIуэнут. Турист IэнатIэр ирагъэфIэкIуэным мы гъэм хухаха мылъкур къызэрамыгъэсэбэпыфам къыхэкIыу, ар етIанэгъэ зэрагъэIэпхъуэр къыхигъэщащ Путин Владимир. Сом мелард 15-м щыщу 2020 гъэм къагъэсэбэпыфар сом мелард 1,2-рэщ.
- Нобэ журналистхэм ята упщIэхэм къыхэщащ дяпэкIэ иджыри унагъуэхэм, сабийхэм къэралыр зэрадэIэпыкъуну щIыкIэр зыхуэдэм зэрыригузавэр. Ди жагъуэ зэрыхъущи, мы гъэм ИлъэсыщIэм епха махуэшхуэхэр, зэхуэсхэр, гуфIэгъуэ зэIущIэхэр екIуэкIынукъым, псей гъэщIэрэщIам деж цIыкIухэр щагъэгуфIэнукъым. Абы къыхэкIыу, УФ-м и Правительствэм сечэнджэщри, унафэ сщIащ, илъэси 7 ныбжьым нэс сабийхэм илъэсыщIэ саугъэт яхуэтщIыну - сом мин тхурытху еттыну, - жиIащ Путин Владимир.