КъМР-ни Башчысы Казбек Коков «Единая Россия» партияны битеу волонтёр аралары ишине къошулгъан биринчи социал онлайн-форумуна къатышханды. Россейни Президенти Владимир Путин форумда добровольчествону баш ызларын белгилегенди, волонтёр къымылдаулагъа регионланы себеплик этерге чакъыргъанды, «Единая Россия» партияны волонтёр араларыны ишлерине бийик багъа бергенди.
Пандемия башланнганлы бери Къабарты-Малкъарда жюзле бла волонтёрла къарыусузлагъа болушлукъ этиу ишге къошулгъандыла: абаданлагъа аш-азыкъ пакетле, дарманла келтиргендиле, госпитальлада уруннган медицина ишчилеге продуктала бергендиле. Предпринимательлени асламысы госпитальлагъа аш эм энчи къорууланыу затла бла болушхандыла.
Ол кеси ыразылыкъ бла кюрешилген жумушла энтта да тапдырылгъанлай турадыла. Волонтёр-медиклени къыйынлары энчи белгиленнгенди, ала бюгюнлюкде поликлиникалада, госпитальлада, исси ызлада урунадыла.
«Единая Россияны» регион араларыны волонтёрлары добровольчествогъа билеклик этиу жаны бла бир ненча предложенияны эшитдиргендиле. Партияны председатели Дмитрий Медведев, форумну эсеплерин чыгъара, волонтёрланы битеу башламчылыкъларына къараллыгъын эм алагъа себеплик этиллигин чертгенди.