УФ-м ФедерацэмкIэ и Советым Къэ­бэрдей-Балъкъэр Республикэм и цIэкIэ сенатору щыIэ, ди щIыналъэм и Президент къулыкъур зэманкIэ езыхьэкIа, зэфIих псапащIэ IуэхуфIхэмкIэ цIэ­рыIуэ ди хэкуэгъу Къанокъуэ Арсен гъэмахуэ кIуам къыхилъхьауэ щытащ «Start Up 5642» проектыр. Псапэ щIэ­ныр зи лъабжьэ а зэпеуэм и мурад нэхъыщхьэр коронавирус уз зэрыцIалэ лIэужьыгъуэщIэм, дэнэкIи хуэдэу, ди щIыпIэри зэрызэщIищтам къыхэкIыу, щIыналъэ экономикэмрэ социальнэ ­гъащIэмрэ щыщыIэ хъуа хэщIыныгъэхэр зэрыхъукIэ гъэзэкIуэжынырщ, жылагъуэм и сэбэпынагъ зыхэлъ Iуэхугъуэхэм бизнесым зыщегъэужьы­нырщ.
Бадзэуэгъуэ мазэм къыщыщIэдзауэ жэпуэгъуэ мазэм и кIэхэм нэс къызэ­щIиубыдэу екIуэкIа а зэпеуэм и утыку ­кърахьащ щIыпIэ экономикэм зегъэу­жьыным хуэунэтIа проект куэд. Абыхэм гупсэхуу хэплъащ Къанокъуэ Арсен зи пашэ эксперт гуп щхьэхуэ икIи лэжьыгъэ нэхъыфIхэр къыхагъэбелджылыкIащ, лIэу­жьыгъуищу зэщхьэщыхауэ ягъэува грантхэр зыхуагъэфэщахэри наIуэ къащIащ.
«Start UP 5642» проект зэпеуэм кърикIуахэр мы махуэхэм хэIущIыIу щащIащ Налшык дэт «Синдика» интур-хьэщIэщым конференцхэр щекIуэкI хабзэу хэт пэ­шышхуэм. Абы ирагъэблэгъащ зэпеуэм къыхэжаныкIа ди хэкуэгъу 20. Онлайн щытыкIэм иту зэхуэсым хэлэ­жьы­хьащ Къанокъуэ Арсен. Зэпеуэм зи проектхэр нэхъыфIу къыщалъытахэм хуа­гъэфэща саугъэтхэм щыхьэт техъуэ тхылъхэр абы и дэIэпыкъуэгъуу щIыпIэм щиIэхэм Iэрагъэхьэжащ Къанокъуэм и цIэкIэ. Апхуэдэ щIыкIэм тету зэхуэсым щагъэлъэпIахэм ящыщу цIыхуи 6-м иратащ сом мелуан зырыз, цIыхуи 4-м - сом мин 500 зырыз, цIыхуи 10-м - сом мин 250-рэ зырыз. Къэбэрдей-Балъкъэрым хьэрычэтыщIэ Iэ­натIэ мыиным зыщегъэужьыным псапащIэ хьэлъхьэныгъэу а зы Iуэхугъуэр и ­лъабжьэу халъхьар псори зэхэту мэхъу сом мелуани 105-рэ. Проект зэпеуэм щытекIуахэм ящыщу цIыхуитIым ахъшэр ­къаIэрыхьакIэщ. Адрейхэми грантыр къы­хахыфынущ дыгъэгъазэ мазэм и кIуэцI­кIэ.
Къанокъуэм къызэрыхигъэщамкIэ, ди жагъуэ зэрыхъущи, проект зэхьэзэхуэм хэтахэм икIи абы щытекIуахэм ящыщ зы, КIэщт Людмилэ Бэлэтокъуэ и пхъур, Iуэхур и кIэм нэмысу дунейм ехыжащ. Людмилэ хуагъэфэща саугъэтыр иратыжынущ ипхъу Сабинэ. Абы и мурадщ и анэм игъэхьэзыра проектыр - Этно­графие музей зэIуха ди республикэм къыщызэгъэпэщыныр - гъащIэм хипщэну.
Саугъэтхэр зыхуагъэфэщахэм яритыжа нэужь, зэпеуэм и жэрдэмщIакIуэр икIи къызэгъэпэщакIуэр абы хэтахэм еп­сэ­лъы­лIащ, я мурадхэр бэIутIэIуншэу зрагъэхъулIэнуи ехъуэхъуащ.
- Си гуапэщ мыпхуэдиз цIыху проект ­зэпеуэм жыджэру зэрыхэтар, - жиIащ ­Къанокъуэм. - Абы къегъэлъагъуэ ди республикэр зэрыт щытыкIэм иригузавэ, и къэкIуэну дахэм я зэфIэкIхэр ирахьэ­лIэну хьэзыр хэкупсэ куэд ди лъахэм зэрисыр. Хуей хъумэ, проектхэр зэрыгъэ­зэ­щIапхъэм ехьэлIа чэнджэщхэмкIэ дэ­Iэпыкъуэгъу дыфхуэхъуну дыхьэзырщ. Нобэ къыфхуагъэфэща саугъэтхэр лъабжьэ зыхуэхъуа IуэхущIапIэхэм, хьэп­шы­пыщIэхэм, IуэхутхьэбзэщIэхэм, лэжьапIэ IэнатIэщIэхэм ятеухуа хъыбарыфIхэр дызытехьэ илъэсыщIэм къриубыдэу ди щIыналъэм щызэхэсхыну согугъэ. Фи Iуэху фIы ирикIуэ!
Зэпеуэм щытекIуащ хьэрычэтыщIэхэу Ахматов Ахъмэтрэ Куэшмэн Iэминэрэ, Думэн Мухьэрбий, Щоджэн ФатIимэ, БищIо БетIал, Бер Артуррэ Абазэ Къа­сымрэ, Мэшыкъуэ Астемыр, Щоджэн Астемыр, Нэзрэн Назиррэ Мамхэгъ Рузан­нэрэ, Тхьэмадокъуэ Дианэ, Iумэт Мурат, Къуныжь Таймураз, Дохъущо­къуэ Каринэ, Хьэгъэжей Иринэ, Ту­тыкъу Фаризэ, Аккуловэ Лейлэ, Дзэ­гуей Лианэ, Чэртбийхэ Мадинэрэ Индирэрэ, Вэрокъуэ Софят, Жэмыхъуэ Мадинэ сымэ къы­халъхьа проектхэр. Ахэр ятещIыхьащ ди республикэм и экономикэмрэ социальнэ IэнатIэхэмрэ дызэрыт лъэхъэнэ гугъум щIэмыгъэужьыхэным, адэкIи зегъэу­жьы­ным.