РФ-ни МЧС-ини КъМР-де Баш управлениясында КъМР-ни Правительствосуну Председателини биринчи орунбасары – Республикада къыйын болумланы кетериу жаны бла комиссияны таматасыны орунбасары Муаед Кунижев ведомствону башчысыны къуллугъун толтургъан Михаил Черныйни къатышыуу бла кенгеш бардыргъанды.
Вирус бла байламлы эпидемиология халны эсге ала, аны видеосвязь амалны хайырланып ётдюрюрге тюшгенди. Кенгешге чыгъарылгъан сорууланы сюзюуге министерстволаны бла ведомстволаны таматалары, шахар эм район башчыла къатышхандыла. Жыйылыуда Къабарты-Малкъар къыш кезиуге къалай хазырланнганын тинтгендиле.
-Энчи эс от тюшюу, курт юзюлюу, энергетика эм жашау журт-коммунал мюлк бла байламлы соруулагъа бёлюннгенди, - деп билдиреди бизге РФ-ни МЧС-ини КъМР-де Баш управлениясыны пресс-секретары Кантемир Беров.
Кенгешгенле, тёрели амалладан сора да, къошакъ онгла болургъа кереклисин да белгилегендиле. Сёз ючюн, юйледе газ оборудование бла хайырланнганда адамла къоркъуусузлукъну жорукъларын къалай сакълагъанларын тинтиу изленеди.
Андан тышында да, жаз кезиуде кёлледе жууунуу бла байламлы эсеплени да сюзгендиле. Хар соруу бла байламлы жууаплыла докладла этгендиле эм алагъа кёре тийишли оноула чыгъарылгъандыла.