Россей Федерацияны Правительствосуну Председателини орунбасары Татьяна Голикова регионла бла кенгеш бардыргъанды. Анда коронавирус жукъгъан ауруу бла къажау кюрешни чеклеринде Россейни Президентини буйрукъларыны толтурулууларына къаралгъанды. Аны ишине КъМР-ни Башчысы Казбек Коков да къатышханды.
Видеоконференцияны ача, Татьяна Голикова субъектлени оноучуларын Правительствону аны аллында ётген жыйылыуунда къыралны Президенти белгиленнген къауум оноу бла шагъырейлендиргенди. Баш темаланы араларында – медицина ишчилеге тёлеуле. 2020 жылны 1 ноябринден аллай тёлеулени низамы тюрленнгенди. Энди ала энчи социал тёлеуледиле, аланы медицина организацияла билдиргенлерине кёре Социал страхование фонд тёлерикди. Ол борчлагъа жылны ахырына дери федерал бюджет фондха 26 миллиард сомдан артыкъны бёлгенди.
Вице-премьер ол жангы низам эм тёлеуле 15 декабрьге дери толтурулургъа керек болгъанлары ючюн, тохтаусуз финансирование болурча эм регионланы подстраховкаларын этерча дотация халда федерал бюджетден 10 миллиард сом бёлюннгенин да белгилегенди. 1 декабрьге дери субъектлеге бёлюннген ырысхы бла байламлы тийишли норматив актланы къабыл кёрюрге буйрукъ берилгенди.
Татьяна Голикова медицина ишчилеге декабрь ючюн тёлеулени 2020 жылны ахырына дери берирге тийишлисин магъаналыгъа санагъанын билдиргенди. Декабрьде тёленмей къалгъан кюнле ючюн тёлеу 2021 жылны январында берилликди.
Россейни вице-премьери жангы коронавирус жукъгъан ауруу жайылгъан болумлада медицина болушлукъ тапдырыугъа къошулгъан бийик билим берген окъутуу махкемелени студентлерине, аспирантларына эм ординаторларына, орта билим берген энчи окъутуу махкемелени студентлерине бериллик тёлеулеге энчи эс бургъанды. Ол «къызыл зоналада» ишлеген 60 мингден артыкъ студент эки айгъа онушар минг сом аллыкъларын белгилегенди. Орта билим берген окъутуу махкемелени студентлери – жетишер минг сом.
Татьяна Голикова дагъыда автомобиль транспортну алыу сорууну юсюнден да билдиргенди. Президентде кенгешде саулукъ сакълау биринчи звенону жангыртыу программаланы, ала уа 2021 жылны 1 январында башланыргъа керек эдиле, болжалдан алгъа толтурургъа оноу этилгенди. Къыралны Промышленность эм сатыу-алыу министерствосу 2 минг женгил автомобиль аллыкъды, ала Россей Федерацияны субъектлерине 2020 жылны ахырына дери жетдирилликдиле. Юлешиу белгиленнген регион программалагъа кёре боллукъду.
Россейни Правительствосуну Председателини орунбасары регионланы башчыларын коронавирусдан ауругъанланы дарманла бла жалчытыугъа да эслерин бургъанды, бек биринчиден, амбулатор кезиуде. Хар субъектге, дарманла бла жалчытыу болумну шарт тинтип, тийиишли информацияны хазырларгъа буюрулгъанды. Андан сора да, регионла «Спутник V» вакцинаны салыргъа хазырланыу ишле къалай баргъанларын билдирирге керекдиле, ол санда препаратны жерине жетдириу эм сакълау болумланы жарашдырылгъанларын, дагъыда вакцинацияны этер ючюн медперсонал къаллай юйрениуле ётгенлерин да, деп чертгенди Татьяна Голикова.