Счастивалым и программэр унэтIыныгъэ зыбжанэкIэ зэщхьэ­щыхауэ щытащ. Апхуэдэхэщ «Уна­гъуэ», «НыбжьыщIэхэм папщIэ», «ЩIэ­ныгъэ», «IэщIагъэлIхэмрэ адэ-анэхэмрэ папщIэ». Абы хыхьэу зэ­хыхьи 150-м нэблагъэ ирагъэкIуэкIащ. Фестивалым и сайтым «зыщызы­плъыхьахэм» нэхъ гъэщIэгъуэн ящыхъуащ «Унагъуэ» программэр. Абы я зэфIэкI щеплъыжащ тхакIуэхэу Усачев Андрей, Дядинэ Галинэ, Бородицкая Маринэ, Кружков Григорий, Басов Евгений, мультипликатор Норштейн Юрий, сурэтыщI Петелинэ Ири­нэ сымэ, нэгъуэщIхэри. Псом хуэ­мыдэу щIэупщIэ нэхъыбэ зиIар усакIуэ Есеновский Михаил «Вконтакте» сайтым щыдрагъэкIуэкIа зэIущIэрщ.
Хухаха программэхэм хыхьэу ныбжьыщIэхэр тхакIуэхэм IуагъэщIащ. Апхуэдэщ Рой Олег, Вербовская Аннэ, Веркин Эдуард, Розофф Мег сымэ зэпэIэщIэу зрагъэблэгъар. Къищы­нэмыщIауэ, абы хыхьэу ира­гъэ­кIуэкIащ комиксхэм ятеухуа зэпсэ­лъэныгъэхэр, фэнтези жанрым щыщ тхылъхэм я гъэлъэгъуэныгъэхэр, мастер-класс зэмылIэужьыгъуэхэр.
ЩIэныгъэ программэм къызэщI­рагъэубыдащ IуэхущIапIэр зыдэла­жьэхэм къагъэхьа видео-лекцэ щхьэ­пэхэр. IэщIагъэлIхэмрэ адэ-анэхэмрэ хухаха Iыхьэм гулъытэ щыхуащIащ унагъуэхэр тхылъ еджэным лъэпощхьэпо хуэхъухэм, апхуэдэуи сабий психологхэм я лекцэхэр къызэрагъэпэщащ, тхакIуэ, литературэ критикхэу Улицкая Людмилэ, Алдонинэ Риммэ, Юзефович Галинэ сымэ, нэгъуэщIхэм IуагъэщIащ.
Зи гугъу тщIа программэхэм къа­дэкIуэу, фестивалым хыхьэу утыку ­кърахьащ цIыхухэр тхылъым дегъэхьэхыным хуэунэтIа проект нэхъыфIхэр. Апхуэдэщ Урысейм и щIыналъэ 19-м я библиотекэхэм щрагъэкIуэкIахэр. Гуапэщ ПащIэ Бэч­мырзэ и цIэр зезыхьэ Сабий биб­лиотекэр абыхэм зэращыщыр.
Унагъуэхэр еджэным драгъэхьэ­хыным, ахэр тхылъ хъумапIэхэм нэхъыбэрэ ирашэлIэным и IуэхукIэ библиотекэхэм я лэжьакIуэхэм гъэщIэ­гъуэн куэд къыхалъхьэ. Абы и щапхъэщ щIэблэм тхылъыр фIыуэ ирагъэлъагъун папщIэ адэ-анэхэм я гъусэу ирагъэкIуэкI «День читающей семьи «С книгой по жизни!» проектыр. Ар хуэунэтIащ нэхъапэхэм хуэдэу унагъуэхэр тхылъым драгъэхьэ­хыжыным, и пщIэр къаIэтыжыным, сабийхэр тхылъ еджэу къагъэхъуным. Зи гугъу тщIы проектым жыджэру ­хэтащ тхылъыр фIыуэ зылъагъу, Тхьэ­зэплъыжхэ я унагъуэр.