Фестивальны энчи саугъасы – «Минги-Таугъа»

Озгъан ыйыкъда Чебоксары шахарда миллет энчилиги болгъан регионлу фильмлени халкъла аралы фестивалы ётгенди. Ол къуралып бардырылгъанлы 13 жыл болады. Анга быйыл бизни фахмулу режиссёр жашыбыз Къумукъланы Магомет да къатышханды
Фестивальда ол композитор Малкъондуланы Ахматны «Минги-Тау» симфониясына алдыргъан фильмин кёргюзтгенди. Эришиуню сюзгенле анга бийик багъа бичип, «Бек иги музыкалы фильм» деген энчи диплом бла саугъалагъанлары уа битеу миллетге да, сёзсюз, аламат саугъа болгъанды.
Бу жетишим бла байламлы мен Магомет бла къысха ушакъ этгенме.
-Магомет, алгъышлайма кезиулю жетишиминг бла. Айтсанг эди «Минги-Тауну» фестивалгъа къалай тюшгенини юсюнден.
- Фестивальны къурагъанла мени кеслери табып сёлешгендиле. Ол къыш кезиу эди. Андан сора уа, Covid бла байламлы, аны бир ненча кере кёчюрюрге тюшгенди. Бу жол да манга аны ачылыууна бир кюн къалгъанлай сёлешгендиле. Битеу къоранчланы да кеси боюнларына алып, алай къонакъбайлыкъ этгендиле.
Чувашда ётген фестивальны энчилиги башхаладан недеди десегиз, регион эм миллет фильмлени бла режиссёрланы ачыкълаудады. «Минги-Тау» а малкъар халкъны тарых жашауундан бир болумну суратлагъаны себепли, аны излемлерине толусунлай келишеди.
Къалай-алай болса да, вирус аны ётдюрюуге кесини энчиликлерин кийирмей болмагъанды. Программада алгъадан белгиленнген бир къауум тюбешиуле болмай къалгъандыла неда къысхартылып ётгендиле.
- Сен а къайсы регионладан фильмлени жаратханса?
- Татарстандан, Башкириядан, Чувашияны кесинден, Якутиядан, Юг Кореядан, Белоруссиядан бек иги конкурс ишле болгъандыла. Аллай кинофильмлени араларында кеси номинациянгда баш саугъагъа тийишли болууну уа жетишимге санаргъа боллукъду.
Жюриге белгили режиссёр Дмитрий Астрахан башчылыкъ этгенди. Ыйыкъны ичинде ала фестивальда кёргюзтюлген кинофильмлеге къарап чыкъгъандыла. Регионну асламлы информация органларыны юсюнден айтханда, ала да болмагъанча уллу эс бёлгендиле бу маданият жумушха. Толусунлай алып айтханда, не жаны бла да бек бийик даражада ётгенди.
- Къараучула уа бармы эдиле? Соргъаным эпидемиология болум бла байламлыды.
- Хау, адам бек кёп келгенди. Бизни фильм болмагъанча уллу сейир туудургъан эди. Ол бошалгъандан сора адамладан кёп соруу болгъанды. Асламла малкъарлыланы адет-тёрелерини, маданиятыбызны, тепсеулерибизни, кийимлерибизни, Минги тауну, табийгъатыбызны юслеринден да билирге излегендиле. Мен да билгенимча жууап берирге кюрешгенме. Бек уллу жетишимге къараучуну сейирин къозгъаялгъаныбызны, аны жюрегине тюшалгъаныбызны санайма.

Таппасханланы Аминат.

Поделиться:

ЧИТАТЬ ТАКЖЕ:

29.03.2024 - 09:05

БАХЧАЛАНЫ БУЗДАН КЪОРУУЛАРГЪА – 40 МИЛЛИОН СОМ

Быйыл эл мюлк жерлени буз уруудан къорууларча мадарлагъа Къабарты-Малкъарны бюджетинден 40 миллион сом бёлюнюрюкдю.

29.03.2024 - 09:04

КАРТОФДАН БАЙ ТИРЛИК КЪУУАНДЫРАДЫ

Шимал-Кавказстатны управлениясындан  билдиргенлерича, былтыр Къабарты-Малкъарны  мюлклерини барысында да картофдан  154,6 минг тонна  жыйылгъанды.  Ол былтырдан 1,8 процентге кёпдю.

29.03.2024 - 09:04

ТАНГ КЕСЕК КОНСЕРВА ЧЫГЪАРЫЛАДЫ

Къабарты-Малкъар тахта кёгетледен консервала жарашдырыу бла эки жылны ичинде алчы жерни алады. Ол санда былтыр, 363,8 миллион банка чыгъарылгъанды.

28.03.2024 - 10:01

НИЕТ ХАЗНАБЫЗНЫ АЙНЫТХАНЛА

Халкъыбызны ниет жетишимин кёргюзтген Къулийланы Къайсын атлы Малкъар театрны къуралыуу озгъан ёмюрню 1930-чу жылларында башланнганды. 1935 жылда А.

28.03.2024 - 09:03

ГИТЧЕ ЭМДА ОРТА БИЗНЕСНИ МАГЪАНАСЫ УЛЛУДУ

Къайсы къыралда неда аны ичинде субъектде экономиканы айнытыугъа уллу къошумчулукъ этгенле гитче эмда орта бизнес бла кюрешгенледиле эмда энчи предпринимательледиле.