Ахыр эки ыйыкъны ичинде республикада коронавирус жукъгъанланы саны 83-85 адамдан озмагъанды. Ол санда тюнене вирус 83 адамгъа жукъгъаны ачыкъланнганды. Алай бла КъМР-де коронавирус аурууну профилактикасы эм аны жайылыууна къажау оператив штабдан белгили этгенлерича, бюгюнлюкде вирусдан 10 854 адам ауругъанды.
Тийишли багъыудан сора 7852 адам сау болгъандыла, ол санда тюнене аны 54 пациент хорлагъанды. Бюгюнлюкде медицина болушлукъ 2839 пациентге бериледи. Алай жарсыулу тарихле да бардыла. Пандемияны аллындан бери вирус 163 инсаныбызны жашауун юзгенди. Тюнене аны ауурлугъундан юч адам ауушхандыла.
Коронавирус КъМР-де жайылып башлагъандан бери 253,9 мингден аслам тест бардырылгъанды (бир кюннге - 1337 тинтиу). Госпитальлада 1512 пациент бардыла, аланы арасында тест коронавирус ауруу жукъгъанын ачыкъламагъанла да. Реанимация бёлюмде 92 саусуз турадыла.
Оператив штабдан белгили этгенлерича, вирус бютюнда 65 жылдан таматалагъа, ауруулары юслеринден кетмегенлеге къоркъуулуду. «Аны себепли профилактика мадарла бютюнда магъаналыдыла. Адамла кёп жыйылгъан жерледе, транспортда медицина маскала жюрютюрге, бир бирден бек аздан метр кенгликде турургъа, къолланы сапын бла терк-терк жууаргъа тийишлиди. Онг болгъанына кёре, адам бла да саламлашмазгъа, къучакълашмазгъа кюрешигиз»,-деп эсгертгендиле Оператив штабдан.
Бюгюнлюкде республикада COVID-19 жукъгъанланы 9 госпитальда багъадыла, алада 1,8 мингден аслам жер барды. Хал осалгъа кетеди деген къоркъуу болса, къошакъ жерле къураллыкъдыла.
Республиканы Саулукъ сакълау министерствосу жангы коронавирус аурууну шартларын, андан сакъланыуну амалларын ангылатыуну магъаналылыгъын белгилеп, врачла бла онлайн тюбешиуле къурайды. Вирусну юсюнден толу шартланы WhatsApp мессенджерде 8-928-701-16-91, 8-928-701-08-36 телефон номерлеге сёлешип, билдирирге онг барды.
Аурууну жайылыуун бир кесек тыяргъа онг этерча школчуланы кюз арты каникулларын энтта бир ыйыкъгъа созаргъа оноу этилгенди. КъМР-ни Башчысы Казбек Коковну айтханына кёре, ол ахыр эки ыйыкъда ауругъанланы саны артыкь ёсмегени бла байламлыды. "Бу ёлчемни сакълар ючюн чыгъаргъанбыз биз ол оноуну", - дегенди ол.
Россейде бир кюннге вирус жукъгъанланы саны 21,7 мингди. Алай бла къыралны битеу субъектлеринде COVID-19 вирус жагъылгъанланы саны 1,796 миллиондан асламды. Пандемияны аллындан бери миллион адам сау болгъандыла (1,335 миллион). Вирусну кётюралмай 30,7 минг адам ауушханды.
Джонс Хопкинс атлы университет белгили этген тарихлеге тийишлиликде, битеу дунияда бу ауруу 50,3 миллион адамгъа жукъгъанды. Вирусдан ауушханланы саны миллиондан озгъанды – 1,255 миллион.
