Россейде «Уллу этнография диктант» къуралгъанлы беш жыл толады. Быйыл а ол онлайн халда бардырылгъанды. Эпидемиология болум бла байламлы къыралны хар субъектинде да диктант жазылыргъа бир жер къуралгъанды. Къабарты-Малкъарда уа бу жумушха республиканы Миллет библиотекасы сайланнганды.
Бу ишге быйыл 50 адам къатышханды, аланы арасында къырал эм муниципал власть органланы къуллукъчулары, жамауат организацияланы, дин биригиулени келечилери, алимле, спортчула, культурада, билим бериуде ишлегенле бар эдиле.
Бу жарыкъландырыу проектге КъМР-ни Парламентини спикери – Россейни тарых обществосуну регионда бёлюмюню советини таматасы Татьяна Егорова да келгенди. Ол жыйылгъанланы депутатланы атындан алгъышлагъанды:
-Бюгюн биз бу проектни биринчи юбилейин белгилейбиз дерге боллукъду. Хар жылдан да акциягъа сейир ёсгенлей барады. Бюгюнлюкде ол битеу континентледе да болады. Анга гъарш окъуна къошулгъанды – орбитада космонавтла да жазадыла. Ол а шёндюгю дунияда акция артыкъда магъаналы, сейир болгъанына шагъатлыкъ этеди.
Бу башламчылыкъ бизни къыралда бошдан къуралмагъанды. Россей кёп миллетли къыралды, анда 190 халкъ бла миллет жашайдыла. Кесинги халкъынгы эмда къатынгда жашагъанланы тарыхларын, культураларын, тёрелерин билиу миллет бирликни, халкъланы араларында келишиулюкню мурдорудула.Диктантны эм жаш, аны бла биргеу уа къырал даражалы байрамны - Россейни халкъларыны бирлигини кюнюню - аллында жазгъаныбыз да магъаналыды. Проект жарыкъландырыу мурат бла бардырылады, аны себепли, мен акъыл этгенден, хар ким да, кесини билимин сынагъандан сора да, жангы, сейир шартланы билликди. Проект жылдан-жылгъа кенгере барлыгъына ийнанама. Бюгюн диктант жазгъанлагъа уа жетишимле тежейме эмда кесим да анга сюйюп къатышама,-дегенди спикер.
Алай бла бу сынаугъа къатышханла 45 минутну ичинде 30 соруугъа жууапла бергендиле. Аладан онусу регионланы тарыхы, культурасы бла байламлы эдиле.
Акция 8 ноябрьге дери бардырылады. Онлайн тестле «Уллу этнография диктант» деген сайтда басмаланыпдыла (www.miretno.ru). Диктантны Миллетлени ишлери жаны бла федерал агентство эмда Удмурт Республиканы Миллет политиканы министерствосу къурагъанларын эсгертирге тийишлиди. КъМР-де аны бардырыугъа Жарыкъландырыу, илму эм жаш тёлюню ишлери жаны бла министерство жууаплыды.
