КъМР-ни Парламентини президиумуну кезиулю жыйылыуу видеоконференция амал бла къуралгъанды. Аны спикер Татьяна Егорова бардыргъанды.
Бюджет, налогла эм финанс рынокла жаны бла комитетни башчысы Михаил Афашагов КъМР-ни Парламентини къараууну «2021 жылда эм 2022-2023 план кезиуде КъМР-ни бюджетини юсюнден» законну проекти берилгенин билдиргенди.
-КъМР-ни Башчысы Парламентге «2021 жылда эм 2022-2023 план кезиуде КъМР-ни бюджетини юсюнден» законну проекти бла бирге кёргюзтген документле эм материалла РФ-ни Бюджет кодексини 184.2-чи статьясы эмда Законну 29-чу статьясыны 4-чю эм 5-чи кесеклерине келишедиле, -дегенди Михаил Афашагов.
Аны айтханына кёре, законопроект Къабарты-Малкъар Республиканы 2021 жылда эм 2022-2023 план кезиуде социал-экономикасын айнытыуну прогноз планыны «мурдорлу» тюрлюсюне кёре къуралгъанды.
Анга тийишлиликде регионда чыгъарылгъан продукцияны ёлчеми 162,5 миллиард сом болгъанды, ол 2020 жылны 102,2 проценти тенглиди. Инфляция 3,7 процентге жетериги белгиленеди. Файдала 35,364 миллиард,къоранчла уа 36,422 сомда тохташдырылгъандыла. Бюджетни дефицити 1,058 миллиард сомгъа жетерикди.
Баш финанс документ графикге тийишлиликде КъМР-ни Парламентини комитетлерини жыйылыуларында сюзюллюкдю, алагъа жууаплы министерстволаны бла ведомстволаны келечилери чакъырыллыкъдыла. Коронавирус инфекция жайылгъан кезиуде бюджетни жамауат тынгылаулада дистанциялы амал бла сюзерге белгиленеди. Аны кезиуюнде ачыкълыкъны жалчытыр мурат бла законопроект эмда къошакъ материалла КъМР-ни Парламентини сайтында басмаланадыла. Законну проекти сюзюлген кезиуде этилген предложенияланы профильли комитет бирге тийишдирликди. Тынгылы сюзюлгенден сора баш финанс документ КъМР-ни Парламентини жыйылыууна кёргюзтюллюкдю.
Президиум «КъМР-де борчлу халда медицина страхованияны жер-жерли бёлюмюню 2021 жылда эм 2022-2023 план кезиуде бюджетини юсюнден» законну проектине да къарагъанды. «КъМР-де энчи предпринимательле женгиллетилген налог система эмда патент система бла хайырланнган кезиуде налогну 0 ёлчемде тохташдырыуну юсюнден» республикалы законну 3-чю статьясына тюзетиулени да сюзгендиле парламентарийле. «КъМР-ни Парламентини депутатыны статусуну юсюнден» республикалы законну 6-чы статьясына тюзетиулеге да къаралгъанды.
Депутатла федерал законланы проектлерин сюзгендиле, башха регионлада коллегаларыны башламчылыкъларын да тинтгендиле. Алада сёз культура хазнаны объектлерини, халкъны иш бла жалчытыуну, инсанланы социал жумушларын тамамлауну, бюджетле аралы трансфертлени юлешиуню игилендириуню юслеринден барады.
Депутатла «комитетни сагъатыны» чеклеринде видеоконференция амал бла КъМР-де Предпринимательлени эркинликлери жаны бла уполномоченный Юрий Афасижевни докладына тынгылагъандыла. Ол «КъМР-де предпринимательлени эркинликлери жаны бла уполномоченныйни юсюнден» закон жашауда къалай бардырылгъанын билдиргенди. Аны юсюнден отчёт газетде басмаланырыкъды.