|
ЗэхъуэкIыныгъэхэр халъхьэ
2 ноября, 2020 - 06:56
КъБР-м и Парламентым и зи чэзу зэхуэсыр махуэку кIуам екIуэкIащ.
ЗэIущIэр къыщызэIуихым хабзэубзыху орган нэхъыщхьэм и спикер Егоровэ Татьянэ къызэхуэсахэм ехъуэхъуащ Комсомолым и махуэ къэблэгъамкIэ икIи УФ-м и Федеральнэ Зэхуэсым ФедерацэмкIэ и Советым и УнафэщI Матвиенкэ Валентинэ къыбгъэдэкI щIыхь тхылъхэр яритыжащ КъБР-м и Парламентым и депутатхэу Бечеловэ Людмилэрэ Тхьэгъэлэдж Тимуррэ. Апхуэдэ щIыкIэкIэ къыхагъэщащ депутатхэм УФ-м и парламентаризмэр зэфIэувэным, Къэбэрдей-Балъкъэр Республикэм и хабзэубзыху IэнатIэр егъэфIэкIуэным хуащIа хэлъхьэныгъэр.
АдэкIэ депутатхэр хэплъащ закон зыбжанэм я проектхэм, апхуэдэуи Прохладнэ суд районым и 2-нэ участкэм и зэзыгъэкIуж судыщIэу ягъэуващ Чэртбий Зубер.
Парламентархэр арэзы техъуащ «КъБР-м и бюджетым хуримыкъур дыщIагъужын папщIэ федеральнэ бюджетым къыхэкIыу КъБР-м и бюджетым бюджет кредит къызэрыритым теухуа зэгурыIуэныгъэм дэщIыгъужыпхъэр къэщтэным и IуэхукIэ» КъБР-м и законым и проектым. КъБР-м финансхэмкIэ и министр Лисун Еленэ къызэрыхигъэщамкIэ, а проектым ипкъ иткIэ, республикэм щIыхуэу телъ сом мелуан 580-р 2020 гъэм имытыжми хъунущ, 2021 - 2024 гъэхэм щIыхуэм щыщу илъэс къэс процентитхур зытригъэкIыжыну Iэмал иIэнущ. апхуэдэу бюджет щIыхуэр 2029 гъэ пщIондэ ягъэIэпхъуэ - 2025 - 2029 гъэхэм республикэм къытена щIыхуэр илъэс къэс Iыхьэ-Iыхьэу тегуэшауэ итыжынущ.
«2021 гъэм КъБР-м и щIыналъэ щхьэхуэныгъэхэр къэлъытауэ лэжьыгъэ пэрытхэм я коэффициентыр гъэувыным и IуэхукIэ» проектым и мыхьэнэм тепсэлъыхьащ КъБР-м и Правительствэм и УнафэщIым и къуэдзэ Хъубий Марат.
- НэгъуэщI къэралхэм къикIыу визэншэу УФ-м лэжьакIуэ къакIуэ цIыхухэр IэнатIэ гъэувыныр, къэрал псом хуэдэу, Къэбэрдей-Балъкъэрми 2016 - 2018 гъэхэм нэхъыбэ хъуащ икIи гугъуехь гуэрхэр къишащ. Абы ипкъ иткIэ 2019 гъэм коэффициенту 2,0 ягъэуващ, ар 2020 гъэм - 3,0 хъуащ.
КъулыкъущIэм зэрыжиIамкIэ, дызэрыт илъэсым и япэ мазищым (пандемием епха мардэхэр ямыгъэув щIыкIэ) нэгъуэщI къэралхэм къикIа лэжьакIуэхэм папщIэ ягъэхьэзра патентхэр процент 39-кIэ нэхъ мащIэщ 2019 гъэм и япэ мазищым нэхърэ. Ауэ щыхъукIи республикэ бюджетым хэхъуэу процент 11-кIэ нэхъыбэ иIащ.
2020 гъэм и япэ мазищым а Iуэхум фIы и лъэныкъуэкIэ зэрызиужьам тепщIыхьмэ, КъБР-м и Правительствэм игъуэу къелъытэ 2021 гъэм а коэффициент дыдэр гъэувыныр. Абы теухуа законым и проектыр парламентархэм къызэдащтащ.
«ЛэжьапIэ къэлъыхъуэным гугъу дехь цIыху щхьэхуэхэр лэжьапIэ гъэувынымкIэ IэнатIэ квотэхэм я IуэхукIэ» КъБР-м и Законым зэхъуэкIыныгъэхэр халъхьащ. ЦIыхухэм IэнатIэ егъэгъуэтынымкIэ IуэхущIапIэхэм унафэщIхэм ирагъэхьын хуейщ яIэ лэжьапIэхэр, я Iуэху зытетыр, IуэхущIапIэм щылажьэхэм я бжыгъэр, нэгъуэщIхэри.
Япэ еджэгъуэкIэ къащтащ «Республикэ закон зыбжанэм зэхъуэкIыныгъэхэр хэлъхьэным я IуэхукIэ» КъБР-м и законым и проектыр. Ар къызыхэкIар федеральнэ зэхъуэкIыныгъэхэр зэрыщыIэрщ.
ЗэIущIэм и кIэухым депутатхэр тепсэлъыхьащ республикэм щыщыIэ эпидемиологие щытыкIэм. КъулыкъущIэхэм къыхагъэщащ COVID-19-р къомыуэлIэн папщIэ ягъэува мардэхэр цIыхухэм, псом хуэмыдэу щIалэгъуалэм зэрамыгъэзащIэр икIи къыхураджащ Роспотребнадзорым къыхилъхьа жыпхъэхэр ягъэзэщIэ-ну, нэкIуIупхъуэхэр зыIуагъэлъыну, гъунэгъуу зэбгъэдэмытыну.
- Ахэр бгъэзэщIэн щIыхуейр уи щхьэ, уи благъэ-Iыхьлыхэр уз бзаджэм щыпхъумэн щхьэкIэщ, нэкIуIупхъуэм инфекцэм ущехъумэ. Зыщыдгъэгъупщэ хъунукъым коронавирус госпиталхэм псэемыблэжу щылажьэ дохутырхэм япщэ дэлъ гугъуехьыр, ди жагъуэ зэрыхъущи, ахэри узым щицIалэ къохъу. Иджыпсту щытыкIэр нэхъри гугъу ещI бжьыхьэм къежьэ ОРВИ-мрэ пыхусыху къызэрыгуэкIымрэ. Псори дызэкъуэтмэщ, коронавирусым дыщытекIуэнур, - жиIащ КъБР-м и Парламентым и УнафэщI Егоровэ Татьянэ.
|
28.03.2024 - 09:03 ЩIыгум и ныбжьым ебгъапщэмэ, псэ зыIут дунейм еплъытмэ, цIыхум къикIуа гъуэгуанэр кIэщI дыдэщ, тхыдэм и щапхъэхэмкIэ ар мащIэщ. |
|
28.03.2024 - 09:03 Кавказ Ищхъэрэм и щIыналъэхэм алыдж-урым бэнэкIэмкIэ я спортсмен нэхъ лъэщхэр, илъэс 24-рэ зи ныбжьхэр, иджыблагъэ щызэхуэсащ Дагъыстэным и Каспийск къалэм. |
|
27.03.2024 - 13:58 Тхыдэдж-щIэныгъэлI Сокъур Валерэ «Кърым зауэр къэзыхьа ХьэтIохъущокъуэ и къуэ Кургъуокъуэ - пщыхэм я Iумахуэт» зыфIища и тхыгъэм къызэрыхэщу, зи ныбжьыр илъэс 27-рэ фIэкIа мыхъуа Къаплъэн-Джэрий, I |
|
27.03.2024 - 12:25 Мэзкуу областым и Рузэ къалэм иджыблагъэ щекIуэкIащ Олимп джэгухэм хыхьэ тхэквондо лIэужьыгъуэмкIэ (ВТФ) Урысейм пашэныгъэр къыщыхьыным хуэунэтIауэ ныбжьыщIэхэм, хъыджэбзхэмрэ щIалэхэмрэ я зэхьэзэх |
|
27.03.2024 - 09:03 (ГъащIэ теплъэгъуэ) |
|