Кёп болмай КъМР-ни промышленность эм сатыу-алыу министри Шамиль Ахубеков «БТК групп» компанияны Терек шахарда предприятиясында болгъанды. Ол фабриканы иши бла шагъырейленнгенден сора, аны производство онгларына бийик багъа бичгенди.
- «БТК Терек» республиканы иги айныгъан промышленный предприятияларындан бириди. Мындан арысында да ол халда ишлер, бирси районлада да бёлюмлерин ачар деп бек ышанабыз,-дегенди Шамиль Асланбиевич.
Министр фабриканы тигиучю цехинде болгъанды, производствону кенгертир онглары болгъанын айтып, чыгъарылгъан продукцияны качествосун да махтагъанды. Предприятияны таматасы Наур Хибиев ала бардыргъан ишге эс бургъанлары ючюн къонакълагъа ыразылыгъын билдиргенди.
- Шамиль Асланбиевич эмда аны биргесине келген къырал къуллукъчула фабрикада иш къалай бардырылгъанын бек жаратхандыла. Бизге бу магъаналы тюбешиудю. Ала предприятие бла толуракъ шагъырейленнгенлеринден сора, биз производствону айнытыр онгларын сюзгенбиз, арада къысха байламлыкъ жюрютюрге келишгенбиз,- дегенди Наур Хибиев.
«БТК Терек» Россейде эм уллу женгил промышленность предприятияладан бирине саналады. Ол бизнесге бла къырал структуралагъа юс кийимле тигеди. Аны Россейде, Белоруссияда эм Юг Осетияда да онюч бёлюмю барды.
