КIуэкIуэ Казбек иджыблагъэ яхуэзащ Къэбэрдей-Балъкъэрым и Парламентым и Президиумым хэтхэмрэ депутат фракцэхэм я унафэщIхэмрэ. ЩIыналъэм и Iэтащхьэм депутатхэм фIыщIэ яхуищIащ Iуэхур тэмэму зэрырахьэкIым, гъэ­зэщIакIуэ властым и органхэм зэра­дэлажьэм папщIэ.

КъБР-м и Iэтащхьэм и къалэнхэр пIалъэкIэ зыгъэзащIэм къыхигъэщхьэхукIащ цIыхухэм я гъащIэр егъэфIэкIуэным хуэгъэзауэ зэгурыIуэу лэжьэн зэрыхуейр. Республикэм исхэм зэIухауэ епсэлъэныр, къигъэ­лъэгъуащ абы, экономикэмрэ социальнэ ­IэнатIэмрэ къыщытпэщыт къалэн нэхъы­щхьэхэр дэгъэкIынымкIэ хэкIыпIэ лъэщщ.
Къэбэрдей-Балъкъэрым адэкIи зедгъэужьын, япэкIэ дыкIуэтэн папщIэ, жиIащ КIуэкIуэм, дэ цIыхухэм я псалъэр зэхэтхыу, абыхэм я мурадхэмрэ я гугъуехьхэмрэ зэхэтщIыкIыу, я Iуэхухэр зэрыдэдгъэкIы­ным дыхущIэкъуу дыщытын хуейщ.
ЗэIущIэм къыщыпсэлъащ КъБР-м и Парламентым и УнафэщI Егоровэ Татьянэ, «Урысей зэкъуэт», «ЩхъуантIэхэр», «За­хуагъэ здэщыIэ Урысей», «ЛДПР», «КПРФ» парламент фракцэхэм я унафэщIхэу АфэщIагъуэ Михаил, Щхьэгъэпсо Сэфарбий, Азычэ Светланэ, Гриневич Валерий, Пащты Борис сымэ.