Махуэ къэс дызэкIуалIэ еджапIэр школакIуэхэм я нэхъыбапIэм унэ етIуанэу къыдолъытэ: аращ махуэм и Iыхьэшхуэ щыдгъакIуэр, фIыуэ тлъагъу ди ныбжьэгъухэм дащыхуэзэр, нэхъыщхьэращи, балигъ гъащIэм дызэрыхэувэн щIэныгъэмрэ дуней еплъыкIэмрэ я лъабжьэхэр щыдгъэтIылъыр. КъинэмыщIауэ, школыр унэ етIуанэу къыдэзыгъэлъытэр абы дыщезыгъаджэ, ябгъэдэлъ щIэныгъэмкIэ къыддэгуашэ, зи гъэсэныгъэ дахэр щапхъэ тхуэхъу ди егъэджакIуэхэращ. Ди клас-сым щIэсхэм анэ пэлъытэу къытхэтщ адыгэбзэмрэ литературэмкIэ егъэджакIуэ Къэзанш (Тыгъуэн) Нинэ СулътIан и пхъур. Зыпэрыт IэнатIэм хуэфащэ дыдэщ а цIыху псэ къабзэр.
Дызэрыт гъэ еджэгъуэм и кIэм курыт школыр къэзыухынухэм сащыщщ сэ. ЕджапIэм сызэрыщIэс илъэс 11-м къриубыдэу зыхэсщIэну сыхунэсащ са-бийм и гъащIэм егъэджакIуэм щиIэ мыхьэнэр зыхуэдэр. Ар къыпхуэмылъытэным хуэдизу инщ. ЕгъэджакIуэм сабийхэм ди пащхьэм щызэфIигъэкI лэжьыгъэр куэд мэхъу: щIэныгъэ къыдбгъэдилъхьэ-ным зэрелIалIэм къыдэкIуэу, ар хущIокъу хьэл-щэн дахэ тхэлъу дыкъызэрыхъуным, ди гупсысэкIэм, дуней еплъыкIэм зэрызригъэужьыным, къытпэщылъ балигъ гъащIэм екIуу дызэрыхэувэфынми дыхуегъэхьэзыр. Зи гугъу сщIа псори лэжьыгъэшхуэщ, ахэр къызыхуэтыншэу зэфIэзыхыфынури Къэзанш Нинэ хуэдэ егъэджакIуэ нэсхэрщ. Ар школакIуэхэм къытхэтщ, и къару, зэман емыблэжу, и лэжьыгъэр и щхьэ Iуэхум япэ иригъэщу.
Нинэ хэлъ хьэлыфIхэм ящыщщ абы и еджакIуэ псори зэхуэдэу фIыуэ илъагъуу, ябгъэдэлъ зэфIэкIым емылъытауэ, зэхуэдэу къызэрытхущытыр. Сабийр зэпIэзэрыту къэхъунымкIэ мыхьэнэшхуэ иIэщ и егъэджакIуэр къызэрежьэр ищIэу, абы фIыуэ къызэрилъагъур псэкIэ зыхищIэу ар школым екIуэлIэным. Дэ зыхыдощIэ ар илъэс бжыгъэ хъуауэ: ди унэтIакIуэм лъагъуныгъэу къытхуиIэм малъхъэдисым хуэдэу дызэщIешхэ гупыр, ди зэхуаку пщIэрэ нэмысрэ дэлъу.
Иригъэдж предметхэмкIэ щIэныгъэ куу бгъэдэлъщ Нинэ. Ар нэрылъагъущ абы ди пащхьэ щит дерсхэр купщIафIэу, зыр адрейм емыщхьу зэрыщытымкIэ. Дызэшу, тщIэн щыдмыгъуэту е «зэ иухащэрэт» жытIэу а дерсхэм зэи къыщытхуихуэркъым. Уеблэмэ щыдгъэщIагъуэр нэхъыбэщ ди егъэджакIуэм къызыкъуих щIэныгъэ хьэлэмэтыщэхэм я куэдагъыр. Адыгэбзэмрэ литературэмкIэ ЕГЭ-хэрдымытынуми, ди егъэджа-кIуэм и фIыщIэщ дэ а предметхэм гулъытэшхуэ зэрахуэтщIыр. Къапщтэмэ, сэри къыздеджэхэм ящыщ куэди щIэх-щIэхыурэ дыхэтщ ди анэдэлъхубзэмкIэ къалэм, республикэм къыщызэрагъэпэщ зэпеуэ зэмылIэужьыгъуэхэм. Ди егъэджакIуэр дымыгъэукIытэу утыку дыкъызэрикIыжынми дыхущIокъу. Къэзаншыр езы-ри сыт щыгъуи жыджэру хэтщ апхуэдэ зэхьэзэхуэхэм: «Си бзэ - си псэ, си дуней», «Джэгурэш», «БэрэIущ», нэгъуэщIхэми. Хэтым и мызакъуэу, увыпIэфIхэр къыщехь, езыри дэри щIыхь, фIыщIэ тхылъхэмкIэ дагъэлъапIэу. Нинэ къыхуагъэфэща апхуэдэ тхылъхэм яхэлъщ КъБР-м ЕгъэджэныгъэмкIэ, щIэныгъэмрэ щIалэгъуалэм я Iуэхухэм- кIэ и министерствэм, Налшык къалэм егъэджэныгъэмкIэ и IэнатIэм, ДАХ-м, КъАХ-м, ХьэтIохъущокъуэ Къазий и цIэр зезыхьэ Адыгэбзэ хасэм, нэгъуэщIхэми къабгъэдэкIахэр. Илъэс зыбжанэ лъандэрэ Нинэ хэтщ ди республикэм анэдэлъхубзэр щезыгъэджхэм я методикэ советым.
Ди лъэпкъ дахэм и къэкIуэнум хьэлэлу илъэс 20-м щIигъуауэ хуэлажьэ ди Нинэ, гудзакъэ зиIэ цIыху щыпкъэм, иригъаджэхэм анэ етIуанэ тхуэхъуам, и гъэсэн псори дохъуэхъу ЕгъэджакIуэм и махуэмкIэ. Узыншэу, и мурадхэр къехъулIэу, зэлIалIэ и еджакIуэхэм гушхуэныгъэ къыхалъхьэу куэдрэ Тхьэм игъэпсэу, игъэлажьэ.