29 сентября, 2020 - 07:32
Быйыл Къабарты-Малкъарда «АПК-ны продукциясыны экспорту» деген проектни чеклеринде мадар этиуге былтырдан эсе юч кереге аслам ахча къоратыллыкъды. Аны юсюнден республиканы Эл мюлк министерствосундан билдиргендиле. Субсидия къоллу болургъа умут этгенледен документлени алыу да башланнганды.
Айтылгъаныча, быйыл сагъынылгъан ишлеге 349 миллион сом жиберилликди. Сёз ючюн, былтыргъы болушлукъну ёлчеми 112,5 миллион сом эди. Аны хайырындан суу салыннган жерлени саны 1,6 минг гектаргъа кёбейгенди. Алада энчи машиналаны хайырланадыла. «Быйыл аллай жерлени ёлчеми тёрт минг гектаргъа кёбейирикди», - деп белгилегенди эл мюлк министр Хасан Сижажев.
Тийишли жорукълада айтылгъаныча, бу субсидияны иели мюлклери болгъан гражданладан эмда эл мюлк хайырланыучу кооперативледен башхала алыргъа боллукъдула. Кеслери да эл мюлк производство бла кюрешгенле.
Ахча гидромелиорация жумушлагъа этилген къоранчланы бир кесегин жабаргъа боллукъду. Сёз мында ол санда гидротехника объектле къурауну эмда жангыртыуну, суу салгъан машинала, аппаратура, насос оборудование сатып алыуну юслеринден барады. Бериллик ахчаны ёлчеми къоранчланы 70 процентине жетерчады.
Документлени алыу 29 сентябрьге дери барлыкъды. Аланы МФЦ-гъа элтип берирге неда почта бла жиберирге боллукъду.