Ставрополь щIыналъэм хыхьэ Псыхуабэ къалэм фокIадэм и 11-м къыщызэIуахащ къэралым щынэхъ ин дыдэхэм ящыщ «Урысей - си тхыдэ» музей-гъэлъэгъуапIэ комплексыр.
ГуфIэгъуэм хэтащ Урысей Федерацэм и Президентым и полномочнэ лIыкIуэу Кавказ Ищхъэрэ федеральнэ округым щыIэ Чайкэ Юрий, Къэбэрдей-Балъкъэрым и Iэтащхьэ КIуэкIуэ Казбек, УФ-м и Президентым Къэрал кIуэцI политикэмкIэ и управленэм щIыпIэ унафэр зегъэкIуэнымкIэ и департаментым и унафэщIым и къуэдзэ Бадмаев Санал, КИФЩI-м хыхьэ щIыналъэхэм я унафэщIхэр, дин зэгухьэныгъэхэм я лIыкIуэхэр, къалэдэсхэмрэ абы и хьэщIэхэмрэ.
Псыхуабэ къалэ-зыгъэпсэхупIэр илъэс 240-рэ щрикъум ирихьэлIэу музей-гъэлъэгъуапIэ комплекс къызэрызэIуахыр икъукIэ нэщэнэфIу къызэрилъытэр жиIащ Чайкэ Юрий, къызэхуэсахэм защыхуигъазэм. «Псыхуабэ щыпсэухэми къалэм и хьэщIэхэми мы махуэ лъапIэм сехъуэхъуну сыхуейщ мамырыгъэ, гуапагъэ, зэIузэпэщыгъэрэ зэгурыIуэныгъэрэ яIэу псэуну. Мыпхуэдэ гуфIэгъуэ зэхыхьэхэр нэхъыбэ ирехъу», - къыхигъэщхьэхукIащ Чайкэ Юрий.
УФ-м и Президентым Къэрал кIуэцI политикэмкIэ и управленэм щIыпIэ унафэр зегъэкIуэнымкIэ и департаментым и унафэщIым и къуэдзэ Бадмаев Санал къеджащ УФ-м и Президентым и Администрацэм и УнафэщIым и япэ къуэдзэ Кириенкэ Сергей къигъэхьа хъуэхъу телеграммэм.
Къэбэрдей-Балъкъэрым и Iэтащхьэ КIуэкIуэ Казбек къызэхуэсахэм ехъуэхъуащ Кавказ Ищхъэрэ псом дежкIэ мыхьэнэшхуэ зиIэ Iуэху къазэрехъулIамкIэ: «Зэи хуэмыдэжу мы зэманым жылагъуэр хуэныкъуэщ ди тхыдэр хъумэжыным хуэгъэпса мыпхуэдэ Iуэху щхьэпэ-хэм. Комплексыр къызэрызэIуахыр ди блэкIар тщымыгъупщэным хуэунэтIа хэлъхьэныгъэшхуэщ. Ар Псыхуабэрэ Ставрополь щIыналъэмрэ щыпсэухэм я мызакъуэу, Кавказ Ищхъэрэ округым хыхьэ щIыналъэхэм я дежкIи саугъэты-фIу зэрыщытым шэч къытесхьэркъым. Ар Урысей Федерацэм щыпсэухэм зэгъунэгъуфI зэхущытыкIэхэр, зэныбжьэгъугъэр, лъэпкъ зэкъуэтыныгъэр яхъумэнымрэ ахэр ягъэбыдэнымрэ хуэлажьэ зы IэмалыфIщ», - жиIащ КIуэкIуэ Казбек.
«Урысей - си тхыдэ» федеральнэ гъэлъэгъуэныгъэ проектым хохьэ мультимедие тхыдэ паркхэр, абыхэм къызэщIаубыдэ Урысейм и блэкIар - пасэ зэманым къыщегъэжьауэ ди нобэм къэс. Адрей езым хуэдэхэм ар къазэрыщхьэщыкIыр абы Хэкум къикIуа гъуэгуанэр иджырей интерактивнэ Iэмал куэдыкIейр къагъэсэбэпурэ ину, зыубгъуауэ уи нэгу къызэрыщIагъэхьэфырщ. Экспозицэхэм хэтщ мультимедие техникэ щэ бжыгъэхэр, кино ущеплъ хъуну пэшхэр, тхыдэ къэхъукъащIэхэр къэзыгъэлъэгъуэж 3D-Iэмалхэр, мультимедие картэхэр, ягъэлъагъуэр уафэгум къищу къыпщызыгъэхъу проекцэхэр, панорамэхэмрэ декорацэ зэмылIэужьыгъуэхэмрэ, тхыдэм и «лентI псо» метрищэхэр.
Урысейм апхуэдэ музей-гъэлъэгъуапIэ центру 20-м щIигъу щолажьэ мы зэманым.
УхуэныгъэщIэм метр зэбгъузэнатIэ минипщI хуэдиз еубыд. Абы и зэхуэдитIым щIигъур экспозицэхэм хухахащ. Ахэр ягъэлажьэ мультимедие техникэу 1100-м. Гъэлъэгъуэныгъэм утыку кърехьэ къэралымрэ Ставрополь щIыналъэмрэ Кавказ Псы Хущхъуэхэм нэхъ ятегъэщIа я тхыдэм мыхьэнэ ин щызыубыд и напэкIуэцIхэр, апхуэдэуи Кавказ Ищхъэрэ федеральнэ округым хыхьэ щIыналъэхэм я тхыдэми ущегъэгъуазэ.
Тхыдэ паркым хъыбархэр зэрызэIэпах Iэмал куэд щызэтегъэпсыхьащ: сенсор дискхэр, стIол щхьэхуэхэмрэ экранхэмрэ, коллажхэр, проекторхэмрэ кинектхэмрэ. Экспозицэр щагъэхьэзырым къагъэсэбэпащ видеоинфографикэ, анимацэ, мардищым тещIыхьа проект щIыкIэр, бжыгъэр зи лъабжьэ реконструкцэхэр.
Абдежым щагъэуващ сенсор хъыбарегъащIэ стIолищ. Абыхэм ящыщ зым щагъэлъагъуэ Псыхуабэ и тхыдэр къыщыщIидзэ Константиногорск быдапIэм теухуа проектыр, етIуанэм ХIХ лIэщIыгъуэм Псы Хущхъуэхэр зыхуэдар я нэгу къыщIегъэувэж зыплъыхьакIуэхэм, ещанэм - «Лъэпкъ куэдым къыхэкIахэр щыпсэу Кавказ Ищхъэрэ» зыфIащам - щIыналъэм и турист объект нэхъ гъэщIэгъуэнхэм я гугъу къахуищIынущ абы еплъхэм.