Орта кюн Нальчикде Къырал концерт залда Устазны кюнюне аталгъан къууанчлы жыйылыу болгъанды. Аны кезиуюнде окъутуу-юйретиу ишге къыйын салгъан тёрт педагог белгиленнгендиле. Ингирни хурметли къонакълары уа республиканы Башчысыны къуллугъун болжаллы халда толтургъан Казбек Коков, КъМР-ни Парламентини председатели Татьяна Егорова, Правительствосуну Председатели Мусукланы Алий, Правительствону келечилери, депутатла, министерстволаны, район администрацияланы башчылары, школланы директорлары эм кёп башхала болгъандыла.
Байрамны шахар мектеплени окъуучулары назмула, жырла бла ачып, устазланы алгъышлагъандыла. Сабийлени бла жаш тёлюню чыгъармачылыкъларыны юйюню выпускниклери Апполаны Жаннета, Жамал Теунов, Юсуф Оглу, Къабарты-Малкъаргъа аталгъан жырны айтып, ызы бла онбеш жыл мындан алгъа аны бу сахнада биринчи кере залда КъМР-ни биринчи президенти Валерий Мухамедович Коков олтургъанында эшитдиргенлерин билдиргендиле.
Казбек Валерьевич а, эм алгъа жыйылыугъа келгенле бла саламлашып, жашлагъа-къызлагъа, аланы юйретгенлеге да ингирни алай эсде къалырча ариу ачханлары ючюн ыспас этгенди. Педагогланы профессионал байрамлары бла алгъышлай, устаз- - ол жаланда усталыкъ угъай, жюрекни излеми, къыйын эмда жууаплы борч болгъанын чертгенди.
-Устазны къыйыныны магъанасы жангыз да билим берген бла чекленмей, андан иги да кенгди. Сиз окъуучуларыгъызгъа жюрек жылыуугъузну бересиз, аланы ахшыны-аманны айырыргъа, таматалагъа хурмет этерге юйретесиз. Сизни ёлчемсиз къыйыныгъыз, тёзюмюгюз, акъылыгъыз, сайлагъан ишигизге кертичилей къалгъаныгъыз ючюн баш урама. - деп, алагъа саулукъ-эсенлик, жетишим, насып эмда монглукъ тежегенди.
Ызы бла, хычыуун жумушну бардыра, эм ахшы педагогланы саугъалагъанды. Алай бла, Прохладна районну билим бериу управлениясыны башчысыны орунбасары Татьяна Пантелеймоновна Золко КъМР-ни Сыйлы грамотасы бла белгиленнгенди. Зольск районну Каменномостское элини экинчи номерли битеулю билим берген мектебини директору Фатимат Мухамедовна Маргушевагъа «КъМР-ни билим бериуюню сыйлы къуллукъчусу» деген даражалы ат берилгенди.
«КъМР-ни сыйлы устазы» деген атха уа экеулен тийишли болгъандыла. Ала – Элбрус районну Кёнделен элини Доттуланы Ахмат атлы биринчи номерли орта школуну малкъар тилден бла адабиятдан устазы Газаланы Аслижан Сюттюновна бла Черек районну Жемтала элини биринчи номерли мектебини орус тилден бла литературадан педагогу Елизавета Касимовна Кардановадыла.
Саугъалауладан сора къууанчлы жыйылыугъа келгенлени белгили эмда сахнада ал атламларын энди этген артистле хунерликлери бла къууандыргъандыла. Тепсеу, жыр, назму да бир бирлерин алышындыра, концерт программа залдагъыланы кёллерин кётюргенин, ала ыразылыкъларын да кеслерини къарслары бла билдиргендиле. «Балкария» къырал фольклор-этнография эмда «Кабардинка» къырал академиялы тепсеу ансамбльле, жырчыла Гергъокъаланы Халимат, Жаболаны Замира, КъМКъУ-ну «Амикс» жыр театры, «Каллисто» тепсеу театры эм кёп башхала ингирге бютюн къууат къошхандыла.
Айхай да, устазны къыйыныны, аны ёсюп келген тёлюню ёсдюрюуде жерини, ёмюрледен бери жамауатны арасында болгъан даражасыны, хурметини юслеринден байрамны кезиуюнде эсгертилгенлей тургъанды. Кертиди, жюрегибизде школ чакъланы, сабийликни зауукълу кезиуюн сакълагъаныбыз бла бирге, къайсы бирибиз да огъурлу, халал да педагогларыбызны сыфатларын сакълайбыз. Аланы барысын да дагъыда бир кере алгъышлай, мамырлыкъ, жан ырахатлыкъ эмда жангы жетишимле, бийикликле да тежейбиз.
