УФ-ми КъБР-ми я цIыхубэ артист, режиссёр, сценарист цIэрыIуэ Сокуров Александр и гъэсэн Мэстафэ Тинэ мы зэманым Налшык щытрех Къэбэрдей-Балъкъэрым теухуа фильм гъэщIэгъуэн.
«Занять своё место» фильмым и сюжетым и лъабжьэр иджыри щэхущ. Апхуэдэу хъуми, кинопроектхэмкIэ зэпеуэр къызэзыгъэпэщахэм къыхагъэщащ Мэстафэм «цIыху цIыкIум», щIалэгъуалэм, лъэпкъ щэнхабзэм теухуа еплъыкIэщIэ зи лъабжьэ лэжьыгъэ утыку къызэрырихьэнур. Фильмым текIуэдэну мылъкур хухахащ кинематографиемкIэ «Пример интонации» мыкоммерцэ фондымрэ президент грантхэмкIэ «Ленфильм» фондымрэ.
Мэстафэ Тинэ и фильмым щыджэгуну иригъэблэгъащ актёр IэщIагъэм хуемыджа къызэрыгуэкI налшыкдэсхэр, КъБКъУ-м и студент театрым хэтхэр. КъищынэмыщIауэ, абы елэжьхэм яхэтщ Санкт-Петербургрэ Москварэ я кинематографист Iэзэхэр.
КъыжыIапхъэщ, Мэстафэм нэхъапэIуэкIи кинематографием хэлъхьэныгъэ зэрыхуищIар. Абы и Iэдакъэ къыщIэкIащ «Счастливая семья» фильм кIэщIыр.
Фигу къэдгъэкIыжынщи, Сокуровым и гъэсэнхэм дунейпсо кинофестивалхэм ехъулIэныгъэхэр щызыIэрагъэхьащ. Апхуэдэу Канны щекIуэкIа зэхуэсышхуэм Бэлагъы Къантемыр и «Дылда» фильмым саугъэт къыщыхуагъэфэщащ, «Особый взгляд» унэтIыныгъэм режиссёр нэхъыфIу къызэрыщалъытам къыхэкIыу. Битокъу Владимир адыгэбзэкIэ утыку кърихьа «Псы куухэр» фильмыр «Кинотавр» зэхыхьэм дебют нэхъыфIу къыщалъытащ.