Къабарты-Малкъарны Башчысы Казбек Коков видеоконференция халда КъМР-ни Правительствосуну оноучулары эм муниципал районланы, шахар округланы таматалары бла ишчи тюбешиу бардыргъанды. Аны ишине КъМР-де Росреестр Управленияны башчысы Виталий Дмитриев да къатышханды.
Повестканы биринчи сорууну чегинде бизнесни бардыргъанда женгиллендирген процедураланы кёрюмдюлерине эм Россей Федерацияны субъектлерине инвестицияланы келиулерине себеплик этген ишлеге къарагъандыла. Ол вопрос бла байламлы баш докладчы Виталий Дмитриев болгъанды. Адамлагъа жумушла тапдырыу бёлюмде КъМР-де Росреестр Управленияны бла муниципал районланы, шахар округланы араларында байламлыкъланы кючлерге тийишлиси белгиленнгенди.
Билим бериу махкемелени жангы окъуу жылгъа хазырлылыкъларыны эм 2020 жылны 1 сентябрине, Билим бериуню кюнюне, аталгъан жыйылыуланы юсюнден КъМР-ни жарыкъландырыу, илму эм жаш тёлюню ишлери жаны бла министрини къуллугъун толтургъан Анзор Езаов хапарлагъанды. Ол билдиргенича, республиканы билим бериу системасыны жангы окъуу жылгъа хазырланыуу ахырына жете турады. Элледе орналгъан 18 мектеп спортзалланы ремонтлары тындырылады, «Точка роста» цифралы эм гуманитар ызлы 42 билим бериу ара къураладыла. Билим бериу организацияла хакъсыз дерсликлени юлешедиле. Быйыл ол жумушлагъа КъМР-ни республикалы бюджетинден 46,4 миллион сом бёлюннгенди.
Беш мингден артыкъ устазгъа 1 сентябрьден башлап класс башчылыкъ ючюн къошакъ тёлеуле этилликдиле. Анга тийишли ырысхы 2020-2022 жыллагъа Къабарты-Малкъаргъа федерал бюджетден берилгенди. Андан сора да, 1-4 классланы 50 мингден артыкъ окъуучусу кюн сайын толу халлы исси аш бла жалчытылынырыкъдыла. Хакъсыз аш бериуню къурау эм класс башчылагъа ахча тёлеу жаны бла чыкъгъан соруулагъа деп КъМР-ни Минпросвещениясыны сайтында «исси ыз» ишлерикди.
2020 жылны 1 сентябринден 31 декабрине дери школлада бла сабий садлада эпидемиягъа къажау мадарла этилгенлей турлукъдула, ол санда отоуланы, къаты затланы башларын дезинфекциялы жууу, хауаны тазалау, ашны хазырлагъанла энчи къорууланыу затланы хайырланырыкъдыла.
Билимни кюнюне жораланнган къууанчлы жыйылыула санитар-эпидемиология излемлени сакълап къураллыкъдыла. КъМР-ни Коронавирусдан сакъланыу эм аны жайылыууна контроль этиу жаны бла оператив штабыны жууукъ заманда бардырыллыкъ кенгешинде билим бериу организациялада аланы бардырыу халларын тохташдырлыкъдыла.
Казбек Коков КъМР-ни Минпросвещениясына эм жер-жерли администрацияланы таматаларына жангы окъуу жылгъа хазырланыу вопросланы контрольда тутаргъа, болумну сюзгенлей турургъа, устазла, ата-анала бла байламлыкъ жюрютюрге, энчи билим бериу махкемеледе проблемаланы ачыкъларгъа эм алагъа терк къараргъа буюргъанды.
Муниципалитетледе миллет проектлени регион бёлюмлери къалай толтурулгъанларыны эм бёлюннген ырысхы къалай хайырланнганыны юсюнден КъМР-ни Правительствосуну Председатели Мусукланы Алий хапарлагъанды. КъМР-ни муниципал къуралыуларыны тийрелеринде миллет проектлени бардырылыулары бла байламлы борчлагъа федерал эм республикалы бюджетледен бёлюннген ырысхыны саулайда ёлчеми быйыл 1,2 миллиард сом болгъанды. 18 августха аны 56 процентден артыгъы хайырланылгъанды. Муниципал контрактла жаны бла келишимле этиу иш ахырына жете турады.