Кёп болмай РФ-ни Эл мюлк министри Дмитрий Патрушев, «Эл жерлени Комплекс халда игилендириу» къырал программа къалай толтурулгъаны бла шагъырейленир муратда, регионлада ведомстволаны таматалары бла видеконференция халда кенгеш бардыргъанды. Анга КъМР-ни эл мюлк министри Хасан Сижажев да къатышханды, деп билдириледи КъМР-ни Эл мюлк министерствосуну пресс-службасындан.
Тюбешиуню ача, Дмитрий Патрушев «Комплекс халда эл жерлени айнытыу» къырал программа, быйыл ишлеп башлагъан эсе да, хайырлы болгъанын кёргюзтгенин, проект жюзле бла эл мюлклеге аякъ юсюне турургъа болушханын да белгилегенди.
- Программаны чеклеринде къыралда 132 проект жашауда бардырылады - социал эм& инфраструктура объектлени къурулушлары, ремонтлары бла реконструкциялары, тёгерек-башны игилендириу, транспорт связьни айнытыу эм кёп башха жумушла тындырыладыла. Эсге сала айтсакъ, бусагъатда элде халкъны тёртден бири жашайды. Аны ючюн тамамланнган жумушла эм биринчиден аланы болумларын игилендирирге керекдиле, -дегенди Дмитрий Николаевич.
Бюгюнлюкде Къабарты-Малкъар да программагъа тири къатышхан регионладан бириди. Аны чеклеринде элледе инженер инфраструктура эм тийреле да игилендириледиле.
- Быйыл ол ишлеге бюджетден 249 миллион сомдан аслам бёлюнюрюкдю. Алай бла жылны ахырына республиканы эллеринде 4,3 километрге газ эм 11,4 километрге суу ызла тартыллыкъдыла. Андан сора да, Май районда кир суу баргъан быргъыла эм аны тазалагъан комплекс да ишленирикдиле. Аны бла бирге транспорт инфраструктура да айнырча мадар этиледи. Быйыл тёрт элде 2,83 километр чакълы участокда социал магъаналы объектле орналгъан автомобиль жоллагъа тынгылы ремонт этиледи. Саулай айтханда, бу ишлеге 35,6 миллион сом къоратыллыкъды,- дегенди Хасан Лабидович.
Дмитрий Патрушев тийишли жумушланы тамамлар ючюн быйыл регионлагъа 140 миллирд сомдан аслам бёлюннгенин, ол белгиленнген ахчадан алты кереге кёп болгъанын да чертгенди. Аны бла бирге ведомство программаны 2030 жылгъа дери созарча эм финансированиясын да кёбейте барырча мадар этеригин да билдиргенди.
Ол льготалы эл ипотекагъа уллу сурам болгъанын да сагъыннганды. Бусагъатда аны 80 субъектде 15,6 минг адам хайырланнганды. Алагъа саулай да 27 миллиард сомдан аслам ёнкюч берилгенди. Болсада банкга 215 миллиард сом багъасы 100 мингден аслам адамдан заявка келгенди.
Россельхозбанкны Къабарты-Малкъарда бёлюмюню эсеплерине кёре, быйыл республикада 102 миллион сом тенгли бир ипотека ёнкючню 46 адам алгъанды. Кенгешни ахырында Дмитрий Патрушев бу жаны ишни бютюн тири бардырыргъа эм адамлагъа бютюн къыйматлы онгла къуралыргъа кереклисин да да эсгертгенди.
