Ди къэралым и егъэджэныгъэ-гъэсэныгъэ IэнатIэм, хабзэ хъуащи, зэхъуэкIыныгъэхэр щокIуэкI дапщэщи. Абыхэм я нэхъыбапIэр хуэгъэпсащ егъэджакIуэхэм я пщIэр жылагъуэм къыщыIэтыным, езы IэнатIэм щызэфIах лэжьыгъэр егъэфIэкIуэным, Iуэху зехьэкIэщIэ мардэхэр абы шэщIауэ къыщыгъэсэбэпыным.
УФ-м ЕгъэджэныгъэмкIэ и министр Кравцов Сергей иджыблагъэ зэрыжиIамкIэ, етIанэгъэ къыщыщIэдзауэ пэщIэдзэ, курыт школхэм щылажьэ IэщIагъэлIхэм къахэхъуэнущ IэщIагъэщIэхэр. Апхуэдэхэщ, къапщтэмэ, егъэджакIуэ-методистхэмрэ егъэджакIуэ-унэтIакIуэхэмрэ. А унэтIыныгъэхэм егъэджакIуэхэр хэхауэ хуагъэхьэзырынущ, ябгъэдэлъ квалификацэкIи щIэныгъэкIи яIыгъ къулыкъум хуэкIуэн хуэдэу. КъинэмыщIауэ, министрым зэрыжиIамкIэ, 2021 гъэм и фокIадэм лэжьыгъэм хагъэхьэнущ егъэджакIуэхэмрэ гъэсакIуэхэмрэ я зэфIэкIыр къызэрапщытэ IэмалыщIэхэри. Ахэри сэбэп хъунущ егъэджэныгъэм и фIагъыр хэгъэхъуэнымкIэ.
Фигу къэдгъэкIыжынщи, Кравцовым нэхъапэIуэкIэ жиIащ фокIадэм и 1-м сабийхэр гъэсапIэхэмрэ еджапIэхэмрэ зэреса хабзэм тету зэрекIуэлIэжынур, гъэ еджэгъуэр зэраублэжынур. АтIэми сакъыныгъэр зыщыдгъэгъупщэ зэрымыхъунуми къытригъэзэжащ.
