|
Республикэпсо зэпеуэм кърикIуахэм хоплъэж
10 августа, 2020 - 06:55
«Адыгэ псалъэ» газетымрэ Къэбэрдей Адыгэ Хасэмрэ къыхалъхьауэ КъБР-м ЦIыхухэр егъэджэнымкIэ, щIэныгъэмрэ щIалэгъуалэм я IуэхухэмкIэ и министерствэм ди щIыналъэм щригъэкIуэкI «Си бзэ - си псэ, си дуней» республикэпсо фестиваль-зэпеуэм 2020 гъэм кърикIуахэр иджыблагъэ наIуэ щащIащ къэпщытакIуэ гупым я зэхуэсым.
Зэпеуэм и къалэн нэхъыщхьэу щытыр анэдэлъхубзэр хъумэнырщ, хабзэмрэ щэн дахэмрэ щIэблэм зэрыбгъэдалъхьэ Iэмал нэхъыщхьэхэр, бзэм ди еджапIэхэм щиубыд увыпIэр наIуэ къэщIынырщ. А мурадыр яIэу, адрей илъэсхэми хуэдэу, мы гъэми зэпеуэм хэтыну жэрдэм зыщIар еджапIэ мащIэтэкъым. Ди жагъуэ зэрыхъунщи, коронавирус узыфэ зэрыцIалэм и зэранкIэ, гупыж зыщIахэм ящыщу зэпеуэм зи зэфIэкI къыщызыгъэ- лъэгъуэну Iэмал зыгъуэтар еджапIитхумрэ зы сабий садымрэщ. Мэлыжьыхь мазэм нэсыху министерствэм къахуигъэува махуэ хэхахэм къэпщытакIуэхэр здэщыIа еджапIэхэм я лэжьыгъэм теухуа я Iуэху еплъыкIэхэр ягъэнэхуащ.
Апхуэдэу, «ЩIэблэр лъэпкъыпсэу гъэсэнымкIэ ехъулIэныгъэ нэхъыфIхэр къэзыгъэлъэгъуа еджапIэ» унэтIыныгъэм гран-прир щыхуагъэфэщащ ЩоджэнцIыкIу Алий и цIэр зэрихьэу Бахъсэн къалэ дэт 2-нэ курыт еджапIэм; япэ увыпIэр къихьащ IутIыж Борис и цIэр зэрихьэу Зэрэгъыж къуажэ дэт курыт еджапIэм; етIуанэ увыпIэр зэдагуэшащ Нал- шык дэт 32-нэ, Нартан дэт езанэ курыт еджапIэхэм; ещанэ увыпIэр къихьащ Къэрэгъэш къуажэм дэт езанэ курыт еджапIэм.
Зэпеуэм жыджэру хэта егъэджакIуэхэм я дерсхэм я зэхэлъыкIэм хэплъащ къэпщытакIуэхэр икIи нэхъыфIхэркъыхагъэщащ. ЕгъэджакIуэхэр къэралым иубзыхуа пщалъэхэм арэзы укъищIу зэрыщыгъуазэр, дэтхэнэ зы егъэджакIуэми езым и Iуэху еплъыкIэ, и зэгъэзэхуэкIэ хилъхьэкIэрэ дерсыр щIэщыгъуэ зэрищIыр, сабийхэр къыдэхьэха хъуным зэрытелажьэр, я псэлъэкIэр, я гупсысэр къызэраIуатэ щIыкIэр, - а псори лэжьыгъэ екIуэкIам наIуэ къищIащ.
Апхуэдэу, зэпеуэм хэта школхэм адыгэбзэмрэ литературэмкIэ я егъэджакIуэ нэхъыфIу къалъытащ Къалмыкъ Джульеттэ (IутIыж Борис и цIэр зэрихьэу Зэрэгъыж къуажэм дэт курыт еджапIэ), Куржы Асярэ Гуэнгъэпщ Мадинэрэ (ЩоджэнцIыкIу Алий и цIэр зэрихьэу Бахъсэн къалэ дэт 2-нэ курыт еджапIэ), Срыкъуэ Иринэ (Налшык дэт 32-нэ курыт еджапIэ), Махъцы Зитэрэ Къарэмы-зэ Заремэрэ (Къэрэгъэш къуажэм дэт езанэ курыт еджапIэ), Шыбзыхъуэ Индирэ (Нартан дэт езанэ курыт еджапIэ) сымэ.
Хэгъэгупсо зэпеуэм адыгэбзэмрэ литературэмкIэ езыгъаджэхэм я методикэ лэжьыгъэхэмкIэ щызэхьэзэхуэ Iыхьэм лэжьыгъэ 20-м нэблагъэ къагъэхьат. КъэпщытакIуэхэм я къалэнт лэжьыгъэхэр зэрытха бзэм и къабзагъэм, и шэрыуагъэм, зэпкърах Iуэхугъуэмрэ ар къыщIащта щхьэусыгъуэхэмрэ зэрызэтехуэм, бгъэдыхьэкIэ къыхуагъуэтам, ирагъэкIуэкIа къэхутэныгъэм щIэщыгъуэу, щIэуэ халъхьам кIэлъыплъыну.
А зэпеуэм къыхэпэжыкIахэщ адыгэбзэр езыгъэджхэу:
Япэ увыпIэр иратащ Нэгуэр Iэминат (Куба дэт 2-нэ курыт еджапIэ).
ЕтIуанэ увыпIэр хуагъэфэщащ ПщыукI Ритэ (Къэрэгъэш къуажэм дэт 2-нэ курыт еджапIэ).
Ещанэ увыпIэр къихьащ Лу Маритэ (Къэрэгъэш къуажэм дэт курыт еджапIэ).
«Си бзэ - си псэ, си дуней» зэпеуэм унэтIыныгъэ щхьэхуэу хэтщ еджакIуэ цIыкIухэм я къэхутэныгъэ лэжьыгъэхэр. Мы гъэм екIуэкIа зэпеуэм и темэ нэхъыщхьэу яубзыхуат «Ди щIыналъэм и щIыпIэцIэхэр». Мы Iыхьэми узыгъэгушхуэ, узыгъэгуфIэ лэжьыгъэ купщIафIэ куэд къэпщытакIуэхэм я пащхьэ къыщрахьащ. Абыхэм я нэхъыфIу къалъытащ Инарыкъуей дэт курыт еджапIэм и 9-нэ классым щIэс Джатэжьей Ан-зор, Урожайнэ къуажэм щыIэ курыт еджапIэм и 11-нэ классым щеджэ ГъукIакъуэ Виолеттэ, Джэрмэншык дэт курыт еджапIэм и 8-нэ классым щеджэ Соблыр Астемыр сымэ.
Зи IуэхущIафэр утыку къэзыщIа дэтхэнэ зы егъэджакIуэми абыхэм я гъэсэнхэми фIыщIэ яхуэфащэщ .
Зэпеуэм къыхэжаныкIахэр гъэ еджэгъуэщIэм щIидзэжмэ щагъэлъэпIэнущ КъБР-м ЦIыхухэр егъэджэнымкIэ, щIэныгъэмрэ щIалэгъуалэм я IуэхухэмкIэ и министерствэм.
|
29.03.2024 - 08:57 Урысей Ипщэмрэ Кавказ Ищхъэрэмрэ регби 7-мкIэ пашэныгъэр къыщыхьыным теухуа зэхьэзэхуэ иджыблагъэ Налшык къалэм щекIуэкIащ. |
|
29.03.2024 - 08:56 КъБР-м щIыхь зиIэ и журналист, Урысей Федерацэм, Къэбэрдей-Балъкъэрым щэнхабзэмкIэ щIыхь зиIэ я лэжьакIуэ, жылагъуэ лэжьакIуэ, «Советская молодёжь» газетым и редактор нэхъыщхьэу щыта Къардэн Мухьэм |
|
29.03.2024 - 08:56 Пхъэщхьэмыщхьэмрэ хадэхэкIымрэ къыхащIыкI консерву Кавказ Ищхъэрэм къыщыщIагъэкIым и процент 90-р Къэбэрдей-Балъкъэрым къылъос. |
|
28.03.2024 - 09:03 ЩIыгум и ныбжьым ебгъапщэмэ, псэ зыIут дунейм еплъытмэ, цIыхум къикIуа гъуэгуанэр кIэщI дыдэщ, тхыдэм и щапхъэхэмкIэ ар мащIэщ. |
|
28.03.2024 - 09:03 Кавказ Ищхъэрэм и щIыналъэхэм алыдж-урым бэнэкIэмкIэ я спортсмен нэхъ лъэщхэр, илъэс 24-рэ зи ныбжьхэр, иджыблагъэ щызэхуэсащ Дагъыстэным и Каспийск къалэм. |
|