КIуэкIуэ Казбек республикэм и Правительствэм хэтхэмрэ муниципалитетхэм я Iэтащхьэхэмрэ хэту бадзэуэгъуэм и 26-м «Хьэмащэ» хъупIэм щригъэкIуэкIащ Къэбэрдей-Балъкъэрым Iэщ гъэхъун IэнатIэм зыщегъэужьыным, гъэмахуэ хъупIэхэр фейдэ нэхъыбэ къату къэгъэсэбэпыным теухуа Iуэхухэм щытепсэлъыхьа зэIущIэ. Абы хэтащ Ветеринар, фитосанитар кIэлъыплъыныгъэмкIэ федеральнэ IэнатIэм и управленэу КъБР-м щыIэм, КъБР-м Агрохи-мие къулыкъущIапIэмкIэ и станцым, Ветеринар медицинэмкIэ Къэбэрдей-Балъкъэр центрым, «Хьэмащэ» хъупIэм и дохутыр IуэхущIапIэм, фермер хозяйствэхэм я лIыкIуэхэр.
НехьэкI-къехьэкI хэмылъу екIуэкIа псалъэмакъыр теухуауэ щытащ республикэм и Iэщ гъэхъун IэнатIэм мы зэманым щыщыIэ щытыкIэм, абы зегъэужьынымкIэ гъэмахуэ хъупIэхэм яIэ мыхьэнэм, щыIэ гугъуехьхэмрэ къалэнхэмрэ щхьэтечу къагъэлъэгъуащ, абыхэм хэкIыпIэ яхуэхъуну къалъытэхэр къыжаIащ.
Псалъэм папщIэ, къыхагъэщащ 2020 гъэм и япэ илъэс ныкъуэм мэкъумэшхэкIыу къыщIагъэкIар 2019 гъэм и иджы хуэдэ лъэхъэнэм елъытауэ проценти 104,7-рэ зэрыхъуар. Былымылрэ джэдкъазылу тонн мин 48,2-рэ къалэжьащ (проценти 101,7-рэ), шэуэ тонн мин 227-рэ къашащ (проценти 104,8-рэ). Мы гъэм бадзэуэгъуэм и 1-м ирихьэлIэу Iэщышхуэу яIащ мин 271,2-рэ. Илъэс кIуам елъытауэ былымым и бжыгъэр 5415-кIэ нэхъыбэ хъуащ, мэл-бжэныр - 19298-кIэ, шыхэр - 488-кIэ.
Гъэмахуэ хъупIэхэм щолажьэ цIыху 976-рэ. Ахэр Iэщыхъуэхэрщ, фермер IуэхущIапIэхэм я IэщIагъэлIхэрщ, лэжьакIуэхэрщ. Абыхэм я бжыгъэми мы дызэрыт илъэсым къахэхъуащ цIыхуи 180-рэ.
Къызэхуэсахэм захуигъазэкIэрэ, КIуэкIуэ Казбек къыхигъэщащ Iэщ гъэхъун IэнатIэм зегъэужьыныр, абы хъеру къыпэкIуэм хэгъэхъуэныр республикэм и экономикэмрэ социальнэ IэнатIэмрэ къыщыув къалэн нэхъыщхьэхэм зэращыщыр. «Абы епхащ цIыхухэм IэнатIэ яIэныр, я хэхъуэхэр бэгъуэныр, шхын узыншэкIэ къызэгъэпэщыныр, ерыскъыпхъэ шынагъуэншагъэр», - жиIащ республикэм и УнафэщIым. Мэкъумэш IэнатIэм къыщрахьэлIэ продукцэ псоми я процент 40-м щIигъур Iэщ гъэхъун IэнатIэм къыпыкIа хъерщ.
IэнатIэм зиужьынымкIэ хэкIыпIэ нэхъыщхьэхэм ящыщу республикэм и Iэтащхьэм къигъэлъэгъуащ гъэмахуэ хъупIэхэр нэсу къэгъэсэбэпыныр. Апхуэдэ лэжьыгъэр къызэгъэпэщыным и пIалъэ ящIэ икIи республикэм абы фIы къыхудэкIуэу щытащ. А лэжьыгъэр зэтеухуэныр мыбдежым къэрал Iуэхуу къыщылъытапхъэщ, абы тэмэму бгъэдыхьапхъэщ. А лэжьэкIэм зи фейдэ хэлъ IуэхущIапIэ псори а Iуэхум хузэщIэгъэуIуэн икIи зэдегъэгугъун хуейщ.
«КъБР-м и гъэмахуэ хъупIэхэр фIыгъуэшхуэщ. Ауэ, ди жагъуэ зэрыхъунщи, щхьэусыгъуэ зэмылIэужьыгъуэхэм къыхэкIыу, ахэр нэсу къэдгъэсэбэпакъым. Дэ тэмэму зетхьэн хуейщ гъэмахуэ хъупIэхэр икIи абы фейдэуэ къыпэкIуэр Къэбэрдей-Балъкъэрым щыпсэу дэтхэнэми ифI зыхэлъхэм хуэдунэтIыпхъэщ», - къыхигъэщащ КIуэкIуэ К. В.
КъБР-м и Iэтащхьэм апхуэдэуи жиIащ а къалэнхэр зэбгъэхъулIэн папщIэ фермерхэр а щIыпIэм тыншу щылэжьэфын щхьэкIэ зыхуэныкъуэ псомкIи къызэрызэгъэпэщыпхъэр - абы хохьэ гъуэгухэр зэIузэпэщ щIынри, электрокъару яхуэшэнри, псыкIэ ирикъуу къызэгъэпэщынри, нэгъуэщI къалэн зыбжани. Апхуэдэуи Iэщ гъэхъун IэнатIэм зегъэужьыпхъэщ лъэпкъыфIхэр гъэхъуным зетауэ, абы папщIэ щIэныгъэр зи лъабжьэ лэжьэкIэщIэхэм хуэкIуэн, мэкъумэш IэнатIэм щылажьэхэм я гулъытэри абы хуэунэтIын хуейщ.
КъБР-м и Iэтащхьэм Правительствэм пщэрылъ щищIащ гъэмахуэ хъупIэхэм я Iуэху зыIутыр къипщытэну, а щIыналъэр нэхъыфIу къэгъэсэбэпа хъуным хуэунэтIа программи зэхилъхьэну.
Мэкъумэш-промышленнэ комплексым и унэтIыныгъэ мыхьэнэшхуэ зиIэхэм ящыщу къагъэлъэгъуащ фIагъ лъагэ зиIэ, ерыскъы къабзэ, гурыхь къыщIэгъэкIыныр, ар зышхым сэбэп хуэхъун, цIыху псоми ар къащэхуфу щытын хуэдэу. Абы мыхьэ-нэ нэхъ мащIэкъым иIэр республикэм и бгылъэ щIыпIэхэм зегъэужьынымкIи, абыхэм лэжьапIэ IэнатIэщIэхэр къыщызэIухынымкIи, цIыхухэм я хэхъуэхэр нэхъыбэ хъунымкIи.
ЗэIущIэм щхьэхуэу щыхэплъащ Iэщыр хъупIэхэм зэрыщаIыгъыпхъэ щIыкIэм, ягъэхъуну нэхъыфI лIэужьыгъуэхэм, абыхэм продукцэу къыщалэжьыфынур зыхуэдизынкIэ хъунум, къыщIагъэкIым елэжьыным, хъумэным, щэным ехьэлIа Iуэхухэм, Iэщ гъэхъун IэнатIэм иджырей технологиехэр къыщыгъэсэбэпыным.
Зи гугъу ящI Iуэхухэм теухуауэ зэIущIэм къыщыпсэлъащ КъБР-м мэкъумэш хозяйствэмкIэ и министр Сыжажэ Хь. Л., КъБР-м щIымрэ мылъкумрэ я IуэхухэмкIэ и министр Тэхъу А. Д., Шэрэдж, Бахъсэн щIыналъэхэм я администрацэхэм я Iэтащхьэхэу Муртазов Б. С., Балъкъыз А. Хь., Ветеринар, фитосанитар кIэлъыплъыныгъэмкIэ федеральнэ IэнатIэм и управленэу КъБР-м щыIэм и унафэщI Меркулов Д. Е., КъБР-м ВетеринариемкIэ и управленэм и Iэтащхьэ Iэрэмысэ А. М., «Рассвет-Н», «Малка» IуэхущIапIэхэм, мэкъумэшыщIэ-фермер хозяйствэхэм я унафэщIхэр.
ЗэIущIэр щиухым КIуэкIуэ Казбек фермерхэм, IэщIагъэлIхэм, зи гъащIэр а лэжьыгъэ мытыншым езыпха дэтхэнэми фIыщIэ яхуищIащ икIи ехъулIэныгъэхэр яIэну ехъуэхъуащ. ЩIыналъэм и Iэтащхьэм IэнатIэм и лэжьакIуэхэр къигъэгугъащ гъэмахуэ хъупIэхэм Iэщыр щыгъэхъуным къэрал гулъытэ зэригъуэтынумкIэ.