Алим Пшемахович Кешоковну, Социалист Урунууну Жигитини, РСФСР-ни Горький атлы Къырал саугъасыны, СССР-ни Къырал саугъасыны иесини, КъМР-ни халкъ поэтини, аты бизни республикада, андан тышында да кенг белгилиди. Быйыл ол туугъанлы 106 жыл толады. Ол датагъа жораланып, Нальчикде аны эсгертмесине гюлле салыу болгъанды.

Поэт, прозачы, драматург, къырал къуллукъчу, журналист Алим Кешоков миллет адабиятны, маданиятны айныуунда жарыкъ ыз къойгъанды. Ол суратлау сёзню кючюн билген фахмулу жазыучуча, ёз жерини керти патриотуча, адамлыкъ ышанлагъа табыннган инсанча къалгъанды ёмюрлеге халкъны эсинде. Аны чыгъармачылыгъы ёсюп келген тёлюлени кёз къарамларыны къуралыуларында, халкъланы араларында шуёхлукъ байламлыкъланы кючлеуде уллу себеплик этген къыйматды.
Алим Пшемахович аслам назму жыйымдыкъны, бир ненча пьесаны, киносценарийни, романланы, автобиографиялы повестьни, хапарланы, новеллаланы авторуду. Аны чыгъармачылыгъы  Шимал Кавказ адабиятны айныууна, алгъа атлаууна сезимли юлюш къошханды.

Поэтни туугъан кюню республикада жашагъанлагъа энчи магъананы тутады. Ол къууанч жыл сайын кенг белгиленнгенлей тургъанды. Алай быйыл эпидемия болум ючюн тёрени тюрлендирирге тюшгенди, жазыучуну эсгертмесини аллында кёп адам жыйылырча онг болмагъанды. Гюллени салыргъа КъМР-ни маданият министри Мухадин Кумахов, республиканы Жазыучуларыны союзуну правленини председатели Беппайланы Муталип, Чегем районну администрациясыны келечилери, КъМР-де Китапла сюйгенлени биригиуюню таматасы  Наталья Шинкарёва, республикалы Жамауат палатаны келечиси Александр Кочесоков келгендиле.
«Тарыхда аллай инсанла бардыла, саулай халкъ болумну жыйымдыкъларыча. Алим Пшемахович да ёз миллетини атын жашагъан къадарында тийишлисича элтгенледенди», - дегенди жыйылыуну ахырында Мухадин Кумахов.